Naalakkersuisoq takorusunneqartoq Kangerlussualialersaanngitsoq

Kangerlussuarmi ineqarnikkut, ineriartornikkut Illersornissaqarfiullu Kangerlussuarmik atuinerulernerani pissutsit nunaqavissunut Kangerlussuarmi najugalinnut qanoq innersut Sermitsiamit maajip 29-ani allaaserineqarpoq.

Issittumi Sakkutooqarfik Kangerlussuarmi innuttaasunik maajip 25-ani  ataatsimiititsivoq. Qeqqata Kommuniani borgmesteri, Malik Berthelsen (S), ataatsimiinnermi najuuppoq.

AAMMA ATUARUK

Kangerlussuarmioq: Naaguku Naalakkersuisut?

Kangerlussuarmiut ataatsimeeqatigineqarneranni apeqqutit amerlasuut Naalakkersuisunit akisassatut innersuunneqarlutik akineqarneq ajortut, innuttaasoq, Ajaaja Schmidt, taamanikkut oqarpoq. 

- Politikkikkut apeqqutit oqaaseqarfigisinnaannginnamikkit taamaammat oqaatigisinnaasaat killeqartorujussuupput, Ajaaja Schmidt, Sermitsiamut taamanikkut oqarpoq.

Taamaattumik nunaqarfik taassumalu siunissaa pillugu Naalakkersuisut Kangerlussuarmukartariaqartut taanna maajimi isummerpoq.

Naalakkersuisoq pilersaaruteqanngitsoq

Naalakkersiusoq akisussaasoq, tassa Ineqarnermut, Attaveqaasersuutinut, Isorliunerusunut, Upalungaarsimanermullu Naalakkersuisoq, Iddimanngiiu Jensen Bianco (IA), Kangerlussualialersaarnersoq Sermitsiap maajip naalernerani aperaa. Naalakkersuisoq qaammatip aappaa affaq qaangiuttoq Sermitsiap saaffiginnissutaanut akissuteqarpoq. Akissutaa Kangerlussuarmiunut Naalakkersuisumik takorusuisunut nuannaajallannassagunanngilaq.

- Kangerlussualiarnissaq massakkut pilersaarutaanngilaq. Periarfissarli kingusinnerusukkut misissoqqikkusuppara, matumani aamma ukiaru pisussat pilersaarusiorneqarnissaannut atatillugu, Naalakkersuisoq allappoq.

Taassuma innuttaasut orninnianngikkaluarlugit ernumassutaat paasisinnaallugit aamma oqaatigaa.