Naalakkersuisoqarfimmi pisortaq isumaqarpoq Trumpip oqaasii taama ilungersunartiginngitsut

"Minnerusunik arlariinnik misissuisoqalerpoq, aallartinnissaalli ukiut arlaqartut qaangiuppara aatsaat, pisinnaavoq.“ Jørgen Hammeken-Holm, Inuussutissarsiornermut, Aatsitassanut, Nukissiuuteqarnermut, Eqqartuussiveqarnermut Naligiissitaanermullu Naalakkersuisoqarfimmi pisortaq, USA-mi tusagassiorfimmut CNN-imut taama oqarpoq.

Annertuumik misissuisoqarnissaanik USA-p præsidentiata Donald Trumpip Truth Socialimi USA-p nalunaaqutaa naapertorlugu pingasunngornerup unnuaani allaaserinninnerani,t pivoq: “Kalaallit Nunaanni nutaami pigisatsinni kusanartumi uuliamik, gasimik aatsitassanillu annertuumik misissuisoqarnissaa piareersarneqaleruttorpoq”.

AAMMA ATUARUK

Trump: Kalaallit Nunaanni uuliamik, gassimik aatsitassanillu annertuumik ujaasisoqalerpoq

Taamatut pisoqarnissaa ilimagisariaqarparput

Aatsitassanut siusinnerusukkut naalakkersuisup Naaja Nathanielsenip, Inuit Ataqatigiit sinnerlugit Folketingimut ullumikkut ilaasortaasup, præsidentip allagai kingulliit Facebookimi oqaaseqarfigai.

"Siullertut eqqarsaatigaara amerikamiut Kalaallit Nunaata nunataata pisuussutaanut aningaasaliinerat tikilluaqqusaasoq - aamma siornatigut taamaassimasoq - inatsisivut malittarisassavullu malinneqartillugit. Taamaattumik soorunami naatsorsuutigaara kikkut tamarmik taakku maleruassagaat. Aappaatut eqqarsaatigaara Trumpip ilanngussaa immaqa pingaartumik nammineq nunamini innuttaasunut saaffiginnittuusoq, præsidentip qinigaaffiata qeqqani qinersinissaq qanilliartortillugu. USA-mimi ikummatissat akii qaffasipput, ilaatigut USA-p Iranimut sorsunnera pissutigalugu. Siusinnerusukkut oqaatigisattut inuit attaveqaqatigiittarfiisigut taamatut suaartartoqartarnera naatsorsuutigisariaqarparput. Algoritminit aqunneqartinnaveersaarta. Illersornissamut isumaqatigiissutip atsiorneqaqqammersup Folketingimi eqqissisimasumik piviusorsiortumillu naammassillugu suliarineqarnissaa nikallujuillunga ukkataralugu sulissutigiuassavara."

Sermitsiap naalakkersuisoqarfik aperaa Kalaallit Nunaanni uuliamik, gasimik aatsitassanillu misissuisoqarnissaa ilisimaneraat, sulili akissutissarsineqanngilaq.