Naalakkersuisup apersoqqunnginnera illuatungiliuttut isoraat

Nukissiorfiit siorna 32 millionit koruuninik amigartoorpoq. Tamanna Sermitsiap ataasinngornermi oqaluttuaraa.

Nukissiorfiit siulersuisoqanngillat. Taamaattumik Avatangiisinut, Pinngortitamut, Nukissiutinut, Ilisimatusarnermullu Naalakkersuisup, Jørgen Rosbachip (D), akisussaaffiata ataaniipput. Sermitsiap suliffeqarfiup amigartoornera pillugu politikkikkut akisussaanerpaaq arlaleriarluni marlunngornermit apersorniaqattaaraluarpaa. Naalakkersuisorli apersorneqarani allakkatiguinnaq akerusuttoq, naalakkersuisoqarfianit akissutaajuarpoq.

Tamanna Inatsisartuni illuatungiliuttuni ilaasortaqarnerpaameersup, Jens Napãtûp (N), isumaqatiginngilluinnarpaa. Taassuma oqarnera naapertorlugu Naalakkersuisoq tusagassiorfimmit apersorneqarsinnaasariaqarpoq, allakkatigut akinani.

- Tusagassiortut killilersorneqartussaanngillat. Taanna uanga imaannaanngitsorujussuartut isigivara, tassa allakkatiguinnaq, atorfilittat aqqutigalugit ingerlalerneq, Jens Napãtôk’ Sermitsiamut oqarpoq, nangillunilu:

AAMMA ATUARUK

Nukissiorfiit millioninik marlunnik kisitsisitalinnik amigartooqqittoq

- Apersorneqarsinnaanerata taama kipparitsiginera tamat oqartussaaqataanerannik innarliinertut uanga isigaara. Akisussaaffimmik kivitsisinnaannginnermik takutitsineruvoq, taanna oqarpoq.

Naleraq isorinnittutuaanngilaq. Inatsisartuni illuatungiliuteqataasut partiianit Siumumeersup, Naalakkersuisup allakkatigut akinani tusagassiorfinnit apersorneqarsinnaasariaqarnera oqaatigaa.

- Soorunami. Taanna pisussaaffigivaa. Ilungersunarpoq tusagassiorfiit saaffiginnittut akinaveersaarlugit pilersimagunigit.

- Akisussaaffigisani oqaasissaqarfiginngikkaa, akissuteqarfigisinnaanngikkaa taava aperisariaqarpoq taavami suna apeqqutigissavarput akisussaaffiata ataaniittoq, Erik Jensen Sermitsiamut oqarpoq.

Siumut: Allakkatigut akissutit atorfilittat suliarisarpaat

Naalakkersuisunut ilaasortat allakkatigut akissappata tamanna atorfilittanit suliarineqassasoq Siumumeersoq, aamma Naalakkersuisunut ilaasortaanermik misilittagaqartoq, misilittakkani pillugit oqarpoq.

- Allakkatigut akissuteqarneq tassaavoq akisussaaffik tigunagu akissuteqarnissamut atorfilittanut missingiummik suliaqartitsineq. Tassa imaappoq, politikkikkut isummerfigisassat isummerfiginagit nammineq atorfilittaminut akisussaaffik tunniukkaa, Erik Jensen oqarpoq.

Naalakkersuisorlumi akisussaaffigisani pillugit akinissaminut eqeersimaarnerusariaqartoq, Naleraq isumaqarpoq.

- Imaannaanngilaartumik inissisimavoq Naalakkersuisoq. Politikkikkut akisussaaffigisani, nukissiuuteqarneq, eqeersimaarfiginerullugu akisinnaanerusariaqarpaa. Taamaanngikkuni naleqqutinngilaq tassaniinnissaminut, Jens Napãtôk’ oqarpoq.

Sermitsiap Avatangiisinut, Pinngortitamut, Nukissiutinut, Ilisimatusarnermullu Naalakkersuisoq, Jørgen Rosbach, apersorniarlugu suli sulissutigaa.