Nukissiorfiit millioninik marlunnik kisitsisitalinnik amigartooqqittoq

Suliffeqarfiup, Nukissiorfiit, ukioq 2025-mi naatsorsuutitigut angusani saqqummiussimalerpai. Ukiuni kingullerni amigartoortuarneq suli ingerlaannarpoq. Nukissiorfiit siorna 32,7 millionit koruuninik amigartoorput. 

- Ukiumi angusat 32,7 mio. kr.-inik amigartooruteqarfiupput. Tamanna ukioq taanna missingersuutinut naapertuuppoq. Ukiumi immikkut ittumik pisoqanngilaq angusanut sunniuteqartumik, eqqaassanngikkaanni suliffeqarfiup sanaartornermut atortuutaanik kiisalu aningaasaliissutaasimasunik suli ingerlanneqartunik nalikilliliinnernik, suliffeqarfik naatsorsuutimini allappoq.

Suliffeqarfik pigisaminik siorna 235,6 millionit koruunit naliganut nalikilliliivoq. Nukissiorfiit 2024-imi 60,2 millionit koruuninik aamma 2023-imi 86,2 millionit koruuninik amigartoorpoq. Taamaammat 2025-imi amigartooruteqarneq ukiut siuliinit pitsaanerusumik isikkoqaraluarpoq.

2025-imi angusarlunnermut pisortaq ilaatigut ima nassuiaateqarpoq:

- Aasianni novembarimi decembarimilu ikuallattoornerit, kiisalu Kangaatsiami Uummannamilu uuliakoornerit ilungersunartuupput, ingerlatsinermik kisimi ajoqusiiginnaratik aamma avatangiisimut inuiaqatigiinnullu sunniuteqartarmata. Piffissalli ingerlanerani sumiiffinni arlaqartuni ingerlatsinermi ajoqusersuinerit aamma qajannaassutsip, upalungaarsimanissap aserfallatsaaliuinerullu ingerlaavartumik ukkatigineqartuaannarnissaata pingaaruteqassusaanik ersarissaasuuvoq.

- 2025 allatut oqaatigalugu ukiuuvoq, eqqortumik iliuuseqarnitsinnik uppernarsaaginnarani – iliuusissatut amigaatitsinnik aamma eqqaasitsisoq, Johan Danielsen aallaqqaasiinermini allappoq.

Aningaasameernerup saniatigut atortut nutaanngilisut

Nukissiorfiit nuna tamakkerlugu illuuterpassuaqarlunilu nalilinnik pigisarpassuaqarpoq. Tamakkuali amerlasuut nutaanngilisut aserfallattullu ukiuni kingullerni tusarsaajuarput. Suliffeqarfillu aningaasarlioraluarpalluunniit atortut pitsanngorsartariaqartut pisortaq aamma allappoq.

- Atortulersuutitta amerlanerpaartai pisoqalipput, taarsersorneqarnissaannullu aamma nutarterneqarnissaat pisariaqartinneqalersimalluni. Piffissaq qaninnerusoq aningaasaliissuteqanngikkutta, qamittoornerit amerlanerusut aningaasartuutillu annertunerusut aqqusaarnissaannut annertusaataapput. Aningaasaleeqqinnerit taamaattumik teknikkikkut pisariaqaannaratik – tunngaviusumik aalaakkaasumik pilersuinissamut aamma akisussaaffilimmik aningaasaqarnissamut qulakkeerinnittuussaaq.

Atuisut akiliinerusalissasut

Nukissiorfiit pigisamik aserfallatsaalinissaannut kinguaattoorutaat 2023-imi 1,8 milliadit koruuniupput. Aningaasartuutit isertitallu oqimaaqatigiilernissaat anguniarlugu akit 2028-ip tungaanut ukiumut 7 procentimik qaffattassasut, 2025-imi aalajangerneqarpoq. Akit akisunerulernissaannut suliffeqarfiup siunnersuutaa Naalakkersuisut taamanikkut akueraat.

Amigartooqqinnissamik naatsorsuuteqartut

Nukissiorfiit ukiuni kingullerni maanna arlalinni ukiumut aningaasaqarnikkut angusarluttarpoq. Tamannalu 2026-imi naatsorsuutinut aamma atuukkallassasoq suliffeqarfiup naatsorsuutigaa.

- Tamanna tunngavigalugu Nukissiorfiit naatsorsuutigaa 2026-mi ukiumi isertitat tamarmiusut 975 – 1.000 mio. kr.-ip akornanniissasut aammalu isertitat ilanngaatereerlugit 890 – 910 mio. kr.-ip akornanniissasut. Ukiumi angusat naatsorsuutigineqarput -25 mio. kr.-imiit -50 mio. kr.-imut inissisimassasut, suliffeqarfik allappoq.