Naalakkersuisut aatsitassarsiorfimmit 560.000 koruuninik tunineqaqqissasut
Greenland Mineralsip Københavnip eqqartuussivianut suliakkiinerminut Naalakkersuisunut 560.000 koruuninik akiliutigissavai.
Greenland minerals akiligassinneqassaaq
Foto: Trine Juncher Jørgensen
Greenland Minerals/Energy Transition Mineralsip Namminersorlutik Oqartussat suliami aningaasartuutai akilertussanngorai, Naalakkersuitu paasissutissiissutigaat.
Tamatumuuna Københavnip eqqartuussiviani Greenland Minerals A/S-ip Naalakkersuisunut, Inatsisartunut Namminersorlutillu Oqartussanut suliassanngortitsinerani Namminersorlutik Oqartussat aningaasartuutaat 560.000 koruunit pineqarput.
Tamatuma saniatigut suliffeqarfiup Danmarkimi Klima-, Energi- og Forsyningsministeria eqqartuussivimmut aamma suliassanngortinnikuuaa.
Suliarli eqqartuussivimmi suliarineqarsinnaanngitsoq 2025-mi novembarimi eqqartuussivimmit nalilerneqarpoq.
Naalakkersuisoq: Suliassanngortitsisaqattaarneq ajortuuvoq
Naalakkersuisoq Naaja H. Nathanielsen (IA) aalajangiineq naammagisimaaralugu oqarpoq:
- Suliami suliassamut aningaasartuutinik tunineqartussanngornissarput soorunami naatsorsuutigisimavarput, tassami suliassaq taanna eqqartuussivimmit itigartinneqareermat. Kisianni aningaasartai qaffasipput, tassami suliassaq Københavnimi ingerlanneqarsinnaassanersoq, suliassami taamaallaat pineqarmat.
- Isumaqarpunga suliassap suliakkiissutigineqartup anguniakkat qaangerujussuarlugit ingerlanneqartutut eqqartuussiviup naliliisimanera, aningaasartaasa qaffasinnerannut pissutaasoq. Greenland Minerals talerpimmut saamimmullu suliassanngortitsisaqattaarsimavoq, maannallu paasinarsivoq pisuni marlunni tamanna periusissatut atorsinnaanngitsoq, Nathanielsen tusagassiuutitigut nalunaarummi oqarpoq.
Naalakkersuisut isumaqatigiissitsiniartartut Greenland Minerals suliami tamatumani Namminersorlutik Oqartussanut 14,4 millionit koruuninik akiliissasoq aalajangeraat ataasinngornermat nalunaarutigereeraallu una maanna pisoq nalunaarutigineqarpoq.
