Ataatsimiititaliaq innersuussivoq: Nalunaaqutaq nikiseqqinneqassaaq 

Inatsisartut Inatsisinut Ataatsimiititaliaata nalunaaquttap aalajangersarneqarneranut inatsisip aappassaaneerneqarnissaanut isumaliutissiissutaa piffissaq sivisooq ingerlareersoq, saqqummiunneqarpoq. Inatsisartullu nittartagaanni maanna atuarneqarsinnaavoq.

AAMMA ATUARUK

Nalunaaquttap aalajangersarneqarnera pillugu siunnersuut kinguarteqqinneqarpoq

Tassani pineqarpoq Naleqqap Siumullu aasaanerani nalunaaqutaq atorunnaarsinniarlugu aamma piffissaq UTC-3-mut utertinniarlugit siunnersuutaat.

Siunnersuutit upernaaq misissorneqarnerani ataatsimiititaliap aalajangerpaa kingusinnerpaamik 2028-mi januaarip aallaqqaataani, aasaanerani nalunaaqutaq atorunnaarsinneqarumaartoq maannakkullu piffissaq UTC-2 atuutiinnartussatut, aalajangerneqarluni.

Maannali allatut nipilerlugu oqariartuutigineqarpoq.

Aasaanerani nalunaaqutaq januaarip aallaqqaataani 2027-mi atorunnaarsinneqarnissaa, aamma piffissaq UTC-3-mut 2028-mi utertinneqarnissaa, Inatsisinut Ataatsimiisitaliap inassutigaa.

Tamanna Inatsisinut Ataatsimiititaliami amerlanerussuteqartut, tassa Demokraatit, IA aamma Atassut – tassa Naleraq Siumullu – allannguutissatut siunnersuutaanni, allannguutissatut siunnersuutigineqarpoq, naak siunnersuutaat tunngaviatigut akuerineqaraluartoq.

Tamanna qanoq paasisariaqarpa?

Piffissat assigiinngitsut aasaaneranilu nalunaaqutaq paatsiveerusimaarnarsinnaapput, taamaattumik aasaanerani nalunaaquttamik atorunnaarsitsineq piffissallu allanngortinneqarnissaa qanoq paasisariaqarpat?

Ataatsimiititaliap allannguutissatut siunnersuutaa Inatsisartunit akuerineqarpat, aallaqqaammut arfininngornermi marsip 27-ani nalunaaqutaq 23.00 Europami aasaanerani piffissamut ukiuuneranilu piffissamut nuuttoqartillugu nalunaaqutaq akunnermik ataatsimik siuartinneqanngisaannassaaq imaluunniit sapaatiuppat oktobarip 31-anni unnuap qeqqani nalunaaqutaq akunnermik ataatsimik kinguartinneqanngisaannassasoq.

Taamaalilluni Kalaallit Nunaat 2027-mi aasakkut Danmarkimit Europallu kitaanit nalunaaquttap akunnerinik sisamanik siuarsimalissaaq, taakkumi suli aasaanerani nalunaaqutaq atortarpaat. Aappaagu ukiukkut nalunaaquttap akunnerinik pingasunik nikingalerlutik.

Kalaallit Nunaanni nalunaaqutaq 2028-mi marsip 25-ata kingorna nalinginnaasoq, aamma piffissaqarfik UTC-3-mut allanngortinneqassaaq, taamaalilluni Europami aasaanerani nalunaaqutaq atuutilerpat nalunaaqutaq akunnermik ataatsimik kinguartinneqassalluni.

Tamanna isumaqarpoq 2028-miit Kalaallit Nunaat aasaanerani Danmarkimit Europallu kitaanit nalunaaquttap akunnerinik tallimanik nikingalernissaanik ukiukkullu nalunaaquttap akunnerinik sisamanik nikingasalissallutik.

EU-p aamma aasaanerani nalunaaqutaq atorunnaarsinniarlugu, eqqartortareerpaa. Taamatulli pisoqartinnagu Kalaallit Nunaata ukiup affaata ingerlaneranni EU-mut nalunaaqutaq akunnermik ataatsimik nikisittarpaa.

Aasaanerani nalunaaqutaq atorunnaarpat aasaanerani ullaakkut nalunaaquttap akunneranik ataatsimik siusinnerulaartumik qaamalissaaq unnukkullu nalunaaquttap akunneranik ataatsimik taarsiaarnerusalissalluni – immaqali oqartoqarsinnaavoq tamanna allannguutaavallaanngitsoq, Kalaallit Nunaata annersaani ullut takisarneri pissutigalugit.

Nalunaaqutaq ukiukkut UTC-3-mut nuunneqarnera pissutigalugu ullaakkut nalunaaquttap akunneranik ataatsimik qaammajaarnerusalissaaq unnukkullu nalunaaquttap akunneranik ataatsimik taarnerusalissalluni.

Akuersisut akerliusullu

Piffissaq pillugu oqallinneq sivisooq misigissutsinik aamma atuiffiuvoq.

Inuit amerlasuut 2023-mi UTC-2-mut allanngortitsineq naammagittaalliutigaat, oqarlutillu meeqqat ullaakkut makinnissartik ajornakusoornerulersikkaat seqineq kingusinnerusukkut nuisalermat.

Tamanna Islandimi ilisimatuup uppernarsarpaa, taassumalu Sermitsiamut oqaluttuaraa seqernup ingerlaarnera ullup ingerlarngani allanngujaatsuunera pingaaruteqartoq.

Timersortartut oqaatigaat ualikkut nalunaaquttap-akunneranik ataatsimik qaamanerulernera ukiuunerani timersornermut iluaqutaasoq.

Inuussutissarsiornermik suliaqartut piffissaq maanna atuuttoq, iluarisimaarlugu oqaatigaat. Air Greenlandip ilaatigut oqaluttuaraa Danmarkimit nalunaaquttap-akunnerini pingasuni nikingasoqarnera annertuumik iluaqutigalugu, aamma UTC-3-mut uterneq aningaasatigut kinguerluuteqarumaartoq.

Inatsisinut Ataatsimiisitaliami amerlanerussuteqartut allannguutissatut siunnersuut tapersersorpaat, Inatsisartulli tamanna aalajangiiffigissavaat. Piffissamik aalajangersaanermut siunnersuutit marlunngorpat oktobarip 13-ianni aappassaaneerneqassaaq. Inaarutaasumillu aalajangiiffigisassanut oktobarip 21-ani pingajussaaneerneqassalluni.