Naalakkersuisut Tunumut helikopterimik taartaasumik isumaqatigiissuteqarput

Tunumi angallannerup tuttuiginarnerunissaa qulakkeerniarlugu, Naalakkersuisut Air Greenlandimik isumaqatigiissuteqarput.

Taamaattumik qulimiguulik pingaarnerpaaq atorsinnaajunnaarpat novembarimiit 2026-miit maajimi 2027-mut qulimiguulimmik AS350-imik taartaasumik atuisoqarsinnaassaaq.

AAMMA ATUARUK

Tunumi angallannikkut ajornartorsiutit suli ilungersuatitsipput

Tamanna Naalakkersuisut tusagassiuutinut nalunaarummi allapput.

Nunap immikkoortuanut tikeraarnermi kingorna isumaqatigiissuteqartoqarsimasoq, Naalakkersuisoq Iddimanngiiu Jensen Bianco (IA) oqaluttuarpoq:

– Kulusumut, Tasiilamut, Kuummiunullu tikeraaqqammernera tunuliaqutaralugu nuannaarutigingaarlugu maanna Tasiilami, eqqaanilu nunaqarfinni innuttaasunut nalunaarutigisinnaanngorpara, ukiuunerani qulimiguulimmik sillimmateqartitsinissaq isumaqatigiissusiorfigineqarmat.

– Neriuppunga tamanna innuttaasunut pitsaanerusumik, toqqissisimanerunermillu kiisalu pingaartumik ukiuunerani assartuusseriaatsimik tatiginarnerusumik kinguneqassasoq, Attaveqaasersuutinut, Ineqarnermut Isorliunerusunut Upalungaarsimanermullu Naalakkersuisoq Iddimanngiiu Jensen Bianco oqarpoq.

Tunumi silaannakkut angallanneq piffissami sivisuumi isornartorsiorneqartarpoq, ingammik nunaqavissunit.