Nassuiaat: Illoqarfimmi ataasiinnarmi namminersortutut nakorsiartarfeqartoqarsinnaavoq
Kalaallit Nunaanni namminersortutut nakorsiartarfiliornissamut periarfissat nassuiaammi nutaami nalilersorneqarput. Namminersortutut nakorsiartarfeqarneq peqqinnissaqarfimmut oqilisaataasinnaavoq, akerlianilli aamma peqqissutsikkut assigiinngissuteqarnerulernermik kinguneqartitsisinnaavoq, nalunaarusiami erseqqissarneqarpoq.
Inatsisit atuuttut namminersortut peqqinnissaqarfimmik pilersitsisinnaanerannik periarfissiigaluartut namminersortut pisortallu peqqinnissaqarfiisa akornanni , ilaatigut malittarisassat, pitsaassutsimik qulakkeerinninneq innuttaasunillu sullissineq eqqarsaatigalugit suleqatigiinnissaq pillugu aalajangersimasunik sinaakkutissaqanngilaq, Naalakkersuisut nalunaarusiaq nutaaq tunngavigalugu allapput.
Foto: Oscar Scott Carl
Inuttussuseq tunngavigalugu nunatsinni Nuummi kisimi namminersortutut nakorsiartarfeqartoqarsinnaavoq.
Tamanna nalunaarusiami nutaami Naalakkersuisut suliassiissutaanni, Kalaallit Nunaanni Peqqinnissaq pillugu Ilisimatusarfimmit peqqinnissaqarfimmi aningaasaqarneq inatsisinillu immikkut ilisimasallit suleqatigalugit suliarineqartumi, erserpoq.
Namminersortut peqqinnissaqarfimmi kiffartorsinnaaneri pillugit apeqqut Peqqissutsimut isumaqatigiissutip atuutilersinneqarnerata kingorna saqqummiunneqarpoq, tassanilu namminersortut peqqinnissaqarfimmi sulisinnaanerat misissorneqassasoq isumaqatigiissutigineqarpoq.
Inatsisit malillugit namminersortumik nakorsiartarfimmik ullumikkut pilersitsisoqarsinnaavoq, nalunaarusiamilu Nuummi kigutit nakorsaataat, ernisussiortut aamma pillorissaasut namminersortut pioreersut, namminersortumilli nakorsiartarfeqanngitsoq tikkuarneqarsimavoq. Peqqinnissaqarfimmi namminersorlutik kiffartortut tamarmik 100 procentimik atuisunik akiliisitsisarlutik ingerlapput.
Peqqissutsikkut assigiinngissuteqarnerulersitsisinnaasoq
Aaqqiissutissat assigiinngitsut politikkikkut oqallisigineqarnissaat allaaserisami siunnersuutigineqarpoq, aamma namminersortut qanoq ilillutik qanorlu annertutigisumik peqqinnissaqarfimmi akulerutsinneqarsinnaanerat pillugu pingasunik periusissiaqarpoq.
Periutsit tamarmik immikkut iluaqutissartaqarlutillu ajoqutissartaqartut nalunaarusiami allassimavoq, inuiaqatigiinnili peqqissutsikkut naligiinnginnerup assigiinngiiaartumik annertusinissaa assigiissutigaat, tamatumanilu kikkunnik anguniagaqarneq qanorlu piumasaqaateqarneq apeqqutaavoq.
Innuttaasut ilaat namminersortunut nakorsiartartut sukkanerusumik nakorsamut ornigutsinneqartarnerat taamaalillutillu misissortinnissamut ingerlaannaq innersuunneqartarsinnaanerat assigiinngissutaasinnaavoq.
Namminersortut peqqinnissaqarfimmit ullumikkut suliarineqarsinnaanngitsut suliarisinnaagaat inuit pingaarutillit arlallit erseqqissarsimagaat nalunaarusiami allassimavoq.
Aammattaaq nakorsat namminersortut annikitsunik ajornanngitsunillu ajornartorsiutilinnut aamma nakorsaasinnaassapput, taamaalillunilu Nuummi pisortat nakorsiartarfiini sianertut utaqqisut amerlassusii ikileriarsinnaallutik.
Nalunaarusiaq tamarmi Naalakkersuisut nittartagaanni atuarneqarsinnaavoq.
