Nukissiorfiit imermik illunut pajuttussaarusuttut

"Imermik pajuttuinerup atuukkunnaartikkiartornissaa Nukissiorfiit kissaatigaa". Nukissiorfiit ukiumoortumik nalunaarumminni kingullermi ilaatigut taama allapput. 

AAMMA ATUARUK:

Nukissiorfiit millioninik marlunnik kisitsisitalinnik amigartooqqittoq

Kalaallit Nunaanni sumiiffippassuarni imermut toqqaannartumik aqquteqanngilaq. Tassa imaappoq najugarpassuit imermik pilersorneqarnerat biilit imermik aatsisartut atorlugit ingerlanneqarpoq. Bilinik imermik pajunneq aquttumut nukersornartoq suliffeqarfimmullu akisusoq, Namminersorlutik Oqartussat suliffeqarfiutaanni, teknikkimut pisortap oqaluttuaraa. 

- Erngup assartornera akisoorujussuuvoq. Biilini aquttut aamma suliassamik isumaginnittut sulinerat timikkut nukkiornartuuvoq, Nukissiorfinni teknikkimut pisortaq, Filip Sivertsen Sermitsiamut oqarpoq.

Taakkulu ilaatigut tunngavigalugit Nukissiorfiit siunissamut allannguiniarluni pilersaaruteqarpoq. Allannguinerilli qanoq piffissalersorneqassanersut maanna akineqarsinnaanngilaq.

Illoqarfiit ilaat piareeqqanerusut

Imermik pajuttortarunnaarnissaq piffissami aalajangersimasumi ataatsikkut pissanngilaq. Illoqarfiimmi assigiinngitsut nalilersuiffigineqaqqaassapput. Illoqarfiit pajuttorneqartarunnaartussat siulliit ilimagisaasut tassaapput: Nuuk, Narsaq, Paamiut aamma Sisimiut.

- Tassami illoqarfinni atuisut ikittuinnaammata, aamma imermik pissarsiniarnissamut periarfissat allat piummata, teknikkimut pisortaq oqarpoq.

Taassuma oqarnera naapertorlugu nuna tamakkerlugu illut ilaasa eqqaanni erngup kuuinnarluni toqqaannartup aqqutaanik peqaraluartoq piginnittut attartortulluunniit suli imermik pajutsittarput. Tassa imermut kuuinnartumut attaveqaratik. Taama periarfissallit aamma pajuttorneqartarunnaarnissaannik ilisimatinneqassapput.

- Sumiiffinni imermik aqqutilersuiffioreersuni, kisiannili atuisut suli attavilerfiginngisaanni, imermik assartuinermik ingerlatsiinnassanngilagut. Imeqarnermut attaveqarnissamut allatut periarfissaqarpoq. Taamaattumik sumiiffinni taakkunani biilinik imertaatinik imermik pilersuineq unitsinneqartussaasoq sioqqutsisumik nalunaarutigissavarput, pisortaq oqarpoq.

Nukissiorfiit 2024-imi 110.000-riarlutik imermik pajupput. Nukissiorfiit nunaqarfinni imermik pajuttorneq ajorput. Nunaqarfimmiut nunaqarfiup iluani imertartarfinnut imermik aallernissamik periarfissaqarput.

Illoqarfiit ilaat pajunneqaannartarallassasut

Illoqarfiit ilaat, soorlu Upernavik, tamarmi kuuinnartumik imeqarluni pilersuiffiunissaa ajornakusoortoq, pisortaq oqarpoq. Tamatumunnga illoqarfiup imeqarfiata annertussusaa peqqutaavoq. Imeq kuuinnartoq pissarsiarineqarsinnaaleraangat atuineq annertunerulertartoq taanna aamma oqarpoq.

- Sumiiffiit ilaanni imermut aqqutilersuisoqarnikuunngilaq. Tassani aamma kommunip peqataasariaqarnera pisariaqarpoq, Filip Sivertsen oqarpoq.

Imeq biilinik pajugutaasoq pitsaassutsimigut toqqaannartumik imeqarnermit pitsaannginnerusoq taanna aamma oqarpoq. Illummi iluini imermut tankit salinnerat aserfallatsaalinerallu atuisut namminneq akisussaaffigisarpaat. Nukissiorfiilli imermik pajuttornermi atortutik, soorlu slangit erngup aqqutai, salittaritsik pisortaq nassuiaavoq. 

Kalaallit Nunaata avannaani Ittoqqortoormiinilu imermik pajuttortarnerit amerlasuujusut, Filip Sivertsenip aamma nassuiaatigaa.