Nuna allanngutsaaliugaq 747.000 koruunit atorlugit eqqakkanik katersiffiulersoq

Kommune Qeqertalik, Qeqqata Kommunia aamma Pinngortitamut Avatangiisinullu Naalakkersuisoqarfik suleqatigiillutik kommunini pineqartuni nunaminertarujussuaq juunip aallaqqataanit nuna allanngutsaaliukkatut pineqarnissaa aalajangernikuuaat. Nunaminertarujussuaq Kangerlussuup avannaatungaanit Qasigiannguit kujataatungaanut killeqarfeqarpoq.

Nuna allanngutsaalineqartussanngormat kommunit naalakkersuisoqarfillu innuttaasunik arlaleriarlutik ataatsimeeqateqarput. Ataatsimiinnerni nuna pineqartoq assut eqqagassaqartoq innuttaasunit oqaatigineqartarsimasoq, Avatangiisinut Pinngortitamullu Naalakkersuisoq, Jørgen Rosbach (D), Inatsisartunut ilaasortamut, Kristian Jeremiassenimut (IA), akissummini allappoq. 

Nunap allanngutsaalisap eqqagassanik katersiffiulluni salinneqarnissaa maannakkut pilersaarusiorneqalereerpoq. Aasallu ilaa tamanna aallartissaaq. Kommunit pineqartut saliinermi isumaginnittuussapput. Eqqakkanik aappaagu upernarnera ilanngullugu katersisoqassaaq.  

- Immikkut ittumik saliinissamut aningaasartuutissat katillugit 100.000 eurot missaanniipput, tamanna 747.00 kr. missaannut naapertuupput. Taakkunani EU 712.000 kr. missaannik aningaasaliivoq, naalakkersuisoqafillu 35.000 kr. missaannik aningaasaliilluni. 

- Kommunit eqqakkanik tunngatillugu suliniummut aningaasaliisussaatitaanngillat, Naalakkersuisoq allappoq.

Eqqagassat tamakkersinnaanngikkaat

Naak pisortat eqqagassarpassuarnik aallaqqaammut kisimiillutik katersilersaaraluarlutik, innuttaasunut siunissami sumiiffimmi eqqakkanik katersinerunissamik kajumissaarusiornissartik suliuniutiginiarpaat.

- Sumiiffiup saligaatsuutinnissaanut kikkut tamarmik akisussaassuseqarnissaat anguniarneqarpoq, Jørgen Rosbach allappoq.

Eqqagassat aningaasaliissutaasut atorlugit tamaasa katersorsinnaanngikkitsik, Naalakkersuisoq nassuerpoq. Pingaarnersiuisariaqarpullu.

- Aningaasartuutissat sumiiffimmi eqqakkat suussusersinissaannut tamaasaluunniit peernissaannut naammanngillat. Taamaattumik ajornartorsiutaanerpaat kommuninit salliutinneqassapput, Naalakkersuisoq allappoq.

Siunissamilu aningaasartornerulluni saliisoqarsinnaanissaa periarfissatut ammatinneqarpoq.

- Annertunerusumik saliisoqartariaqarpat, naalakkersuisoqarfik kommunillu suliniutip ingerlaannarnissaa anguniarlugu siunissami periarfissanik misissuissapput.

Nuna allanngutsaaliugaq qanoq taaguuteqassanersoq juulip tallimaat ilanngullugu unammissutaavoq. Qanorli taaguuserneqarnissaa pillugu ulloq manna tikillugu suli nalunaarutaanngilaq. Sermitsiap Pinngortitamut Naalakkersuisoqarfik qanoq atsiisoqarsimanersoq pillugu attaveqarfigaa. Sulialli suliarineqarnerani akisoqanngilaq.