KL

DK

Nunanit tamalaanit timmisartumik Nuummut tikittut amerleriarujussuartut

2025-mi takornariat ukiup siulianut sanilliullugit 8 procentimik amerlanerupput, taakkuali ilarpassui Kangerlussuakkooratik Nuummi mittarfittaamut tikittarput.

Nuummi mittarfissuaq novembarimi 2024-mi ammarmalli, takornariat nunanit allaneersut Nuup mittarfiatigoortalerput.
Hanna Hviid Hanna Hviid Tusagassiortoq
Saqqummersinneqarpoq

Nuummi mittarfik Kalaallit Nunaanni pingaarnersaalernikuuvoq, tamannalu nunanit allanit tikittut amerlassusaani takuneqarluarsinnaavoq. 2024-mi nunanut allaniit Nuummut tikittut 11.306-iupput, 2025-milu 93.753-iullutik.

Tassa 729 procentimik amerleriarput.

Tamanna Visit Greenlandip takornariaqarnermi kisitsisit pillugit nalunaarusiaani nutaami atuarneqarsinnaavoq.

Nuummi mittarfissuaq 2024-mi novembarimi ammarpoq.

Nuummulli nunanit tamalaaniit tikittartut amerlinerat Kangerlussuarmut sunniuteqarpoq, tassa 2025-mi nunanit allaniit tikittut 88,2 procentimik ikileriarsimapput.

Takornariat ataatsimut isigalugu 8 procentinik amerleriarsimapput. Nalunaarusiami kisitsisit taakku nalorninarsinnaasut naqissuserneqarpoq, angalasummi 91,4 procentii nunamiit suminngaanneernertik nalunaarsorsimanngilaat.

Umiarsuit takornariartaatit illoqarfinnut amerlanerusunut talittut

Umiarsuarnik takornariartaatinik ilaallutik takornariat 1,4 procentimik ikilerialaarsimagaluartut, talittarfinnut amerlanerusunut tulattoqarsimavoq. Tassa 2025-mi nunamut tulattut 17,8 procentinik amerleriarsimapput.

Ingammik Paamiunut umiarsuarmik takornariartaammik tikeraartut 2024-mi 5.196-iniit 2025-mi 29.873-inut amerleriarujussuarsimapput — 474,9 procentimik amerleriarsimallutik.

Nuummi umiarsuarnut takornariartaatinut ilaasut 18,6 procentimik amerleriarsimapput.

Inoqarfiit minnerit tikinneqarnerusorujussuanngorsimanerat nalunaarusiami eqqaaneqarpoq.

Qassiarsuup 2024-mi tikinneqarnera annikikkaluartoq, 2025-mi umiarsuarnik takornariartaatinik takornariat 888 procentimik qaffariarsimapput.

Tasiilamut umiarsuarnik takornariartaatinik tikittut 190,6 procentimik amerleriarsimapput, Aasiannilu 141,0 procentiullutik.

Aamma takornariaqarnerup sivisunerulersinnaanera ilimanaateqarpoq. Takornariat upernaakkut ukikkullu amerlanerulersimapput, apriilimi septembarimilu 17 procentit sinnerlugit amerleriarsimallutik, Visit Greenland nalunaarusiamini allappoq.

nuummi mittarfik visit greenland takornariaqarneq nuuk kangerlussuaq inuiaqatigiit

Atorfiit tamaasa takukkit

PODCASTI

Powered by Labrador CMS