Nuuk: Takornariaqarnermut pilersaarummi nutaami sanaartornissat allaaserineqarput

Mittarfiup nutaap ammarneqarnerata kingorna takornariaqarneq siuariartupiloorpoq, takornariaqarnermullu pilersaarutip nutaap siunertaraa “Illoqarfik najoruminartuussasoq" aamma "illoqarfik tikeraaruminartuussasoq”.

Pilersaarut aqqutigalugu Sanarfinermut Avatangiisinullu Ingerlatsivik aqutsinermut sakkussaqalernissaminik kissaateqarpoq, taassumalu suliniuterpassuit nutaat ineriartornermut naapertuuttumik pingaarnersiorneqartalernissaat qulakkiissavaa. Ilaatigut sammisassaqartitsiviit nunaminertani inississorneqarnissaat eqqarsaatigalugu nunaminertamik pisariaqartitsinerit pineqarput.

Anguniangaq ataatsimut isigalugu: "Nuuk ukioq tamaat piujuartitsisumik ornigarneqartartutut, pinngortitap, kulturip ulluinnarnilu inuunerup misigisassaqarfiusuni naapeqatigiiffittut, innuttaasunut tikeraanullu iluaqutaasumik, ineriartortinneqassaaq”.

Siunniussat sisamat uku tunngavigineqassasut siunnersuutigineqarpoq:

• Nuup oqaluttuassartaanik immikkuullarissusaanillu nukittorsaaneq: Takornariaqarnermut pilersaarut naapertorlugu Nuummi misigisassat assigiinngitsut, kulturi oqaluttuarisaanerlu pillugit annertunerusumik paasissutissiinissaq periarfissaalluarpoq. Ilaatigut tamanna pisinnaalluni takuniagassani nunalluunniit assingini allagartarsualersuinikkut. Qitiusumillu ornigarneqartartuni takuniagassanik takusassiinikkut. 

• Misigisassat akornanni ataqatigiissitsinissamik qulakkeerinninneq:

  Pilersaarummi aamma "takornarianut aqqutit“ illoqarfimmi misigisassanik assigiinngitsunik takornarianut ornigarneqartussatut siunertaapput, taamaalillunilu takornariaqarneq ulluinnarni nanertuutaanngitsutut misigineqarsinnaaniassammat.

• Ukioq kaajallugu nutaanik misigisassanik periarfissaqalersitsineq: 

  Sammisassaqartitsinerit takornarianut aqqutinik tikkuussissapput, tamatumalu saniatigut Nuummi misigisassanik neqerooruteqartoqarnerulissalluni.

• Piujuartitsisumik ineriartortitsisumik takornariaqarnermik siuarsaaneq:

  Pilersaarut naapertorlugu takornarianut misigisassanik, nioqqutissanik nerisassanillu tuniniaaviit pilersinneqarsinnaapput, aammattaaq ulluinnarni meeqqerivinnit paaqqinnittarfinnillu taquartortarfittut atorneqarsinnaassallutik.

Ukkatarineqartut pingasut

Pilersaarummi illoqarfimmi ukkatarineqartut pingasut pingaarnerit aamma allassimapput:

• Illoqarfiup oqaluttuarisaanera (Orsiiviup nuunngua, Nuutoqqamut atassutilimmi), 
• Kulturi nutaaliaasoq (Imaneq, illoqarfiup niuernermut pisuinnaallu aqqutaanut pingaarnersaa)   
• Nuup Tunuatungaanut isaariaa (Qinngorput, illoqarfimmit pinngortitamut kusanartumut ikaarsaariarfissanngortussaq).

Orsiiviup nuunngua eqqarsaatigalugu, pilersaarutaavoq tamassuma (Nuutoqqamit Nunatta Katersugaasivianit Nuullu Katersugaasivianit) sissamut qulaatigut pisuinnarnut aqqummut atassuserneqassasoq, pilersaarummi oqaatigineqartutut ”angisoorujussuarmik atorneqanngitsumik periarfissaqarluni”.

Piviusumi illuliortoqassasoq siunnersuutigineqarpoq, sammisassaqartitsiviusumik saqqummersitsiffiusinnaasumik, sammisaqartitsilluni isumasioqatigiiffiusinnaasumik, ilinniartitsiffiusinnaasumik, najukkami pigisanik tuniniaaviusinnaasumik imaluunniit taqussanik neriffiusinnaasumik.   

Pilersaarummi aamma allaatigineqarpoq ukiukkut nalunnguarfiusinnaasumik pilersitsisoqarsinnaassasoq, ilaatigut saunamik, oqquisarfimmik immamut aqqartarfimmik kiisalu malinnut illersuusiap sanaartorneqarnerani arfernut arsarnernullu isiginnaartarfiliortoqarsinnaassalluni.

Illoqarfiup qeqqanut pilersaarut

Imaneq Nuup illoqarfittut nutaaliaasutut takutinneqarsinnaaneranut qitiulluinnartutut allaaserineqarpoq — kulturip, ulluinnarni illoqarfimmi inuunerup takutinneqarsinnaaneranut qitiulluinnartutut: 

”Kuussuup Imanerullu naapiffianni bussit takornarianik angallassisartut arlallit unittarput, takornariarpassuillu illoqarfiup kulturianik nutaaliaasumik misigisaqarnissaat tassani aallartittarluni. Tassunga tikiuttarfimmut iluaqutaasussamik ataatsimoortumik naapittarfiliineq pitsanngorsaataassaaq.”

Pilersaarut naapertorlugu Nuuk illoqarfittut uummaarissutut ineriartortinniarlugu Imanerup sinaatigut nunaminertat utaqqiisaasumik illuaqqanik aliannaarsaarfissanik,  tuniniaavinnik pequtinillu sanaartorfiusinnaasutut atorneqarsinnaassapput.

Nuup timaanut isaariaq

Ukkararineqartut pingajuat tassaavoq Qinngorput, pinngortitamut isaariatut inerisarneqarsinnaasoq.

Qinngutsinni nermallagiami biilinut unittarfik pilersaarummi sammineqarpoq, tassanngaanniimmi Viska Horses-imut aqquteqarpoq nunami hiisterfiusinnaasumik kiisalu Qallussuarmut aqquteqarluni Quassussuup qaavanut imalluunniit Quassussuaq kaajallallugu Ukkusissamullu timmullu ingerlaqqiffiusunik.

Biilit unittarfiata eqqaani naapittarfiliortoqassasoq siunnersuutigineqarpoq, tassanilu oqquiffiliortoqarsinnaassalluni, issiavissaqassalluni, tamanut perusuersartarfiliortoqarluni, paasissutissanik allagarsiisoqartassalluni, uummammik aallartitsiniuteqassalluni aamma wifi-mik attaveqaateqassalluni. 

Politikkikkut suliassat

Takornariaqarnermut pilersaarusiaq 18-inik quppernilik, innuttaasunit peqataatitsinikkut Cowi A/S-ip suliaa, ukiumi nutaami ataatsimiinnermi siullermi Teknikimut Avatangiisinullu ataatsimiititaliami politikerinut saqqummiunneqassaaq. Pilersaarut akuerineqarpat Aningaasaqarnermut Inuussutissarsiornermullu ataatsimiititaliamut ingerlateqqinneqassaaq naggataatigullu kommunalbestyrelsimi tamarmiusumi oqallisigineqassalluni.