Nuuk innuttaasunik inuussutissarsiortunillu peqateqarluni siunissami takornariartitsinermik ilusilersuissasoq

Nuuk aasaanerani takornarialerinermi 2025-mi aatsaat taama ulapitsigissaaq.

Mittarfiup nutaap ammarneqarnera Visit Nuummilu nittartagaanik aatsaat taama atuisoqartiginera pissutigalugit pissutsit ersarilluinnarput: Takornarialerineq ineriartorpoq, ingerlatsisullu ilaannut ingerlalluartoq illoqarfik piareersimanersoq allat aperipput, ineriartornerullu innuttaasunik takornariaqarnermik inuussutissarsiuteqartunik aallaaveqarluni periusissiorluni aqunneqarnissaa pisariaqarluinnarpoq.

Innuttaasunik ataatsimiititsinermi borgmesteri Avaaraq Olsen (IA), Kommuneqarfik Sermersuumi takornariaqarnermut pisortaq Mads Daniel Skifte aamma Visit Nuuk-mi takornariaqarnermi pisortaq Bea Husum Terkildsen kiisalu innuttaasut inuussutissarsiortullu sinniisaat peqataapput.

Innuttaasunik qitiutitsilluni ineriartortitsineq piujuartitsiffiusoq

Innuttaasunik ataatsimiititsinermik aaqqissuussisut Kommunalbestyrelsip 2025-miit 2029-mut naalakkersuisooqatigiinnissamut isumaqatigiissutaat saqqummiuppaat, tassani kommunip piujuartitsisumik ataatsimoortumillu takornariartitsisarneq, inuussutissarsiornermik nukittorsaasoq ukiullu ingerlanerani inuiaqatigiinnut iluaqutaasussaq pilersinniaraa erseqqippoq, tamannalu aallaavigalugu 2026-mi takornariaqarnermut politikki ineriartortinneqarumaarpoq. Tamanna borgmester Avaaraq Olsenip tikilluaqqusilluni oqalugiarnermini erseqqissarpaa:

- Takornariaqarneq innuttaasunit soorunamilu aamma takornariartitsisartunit iluaqutissatut ineriartortittariaqarparput. Siunissami takornariaqarnermut politikki ilusilersorniarlugu innuttaasut peqataatinneqarnissaat pisariaqartipparput, neriuppungalu ataatsimiinneq manna isumassarsiassinnik saqqummiussinissassinnut atorumaarissi, taanna oqarpoq.

Takornariaqarneq ineriartortinneqartoq innuttaasut inuussutissarsiortullu naleqalersitsisumik sunniuteqarluartumillu misigisaqarfigissagaat takorluugaavoq.

Aasaq ulapaarfiusoq nutaanillu ilikkagaqarfiusoq

Kommuneqarfik Sermersuumi takornariaqarnermut pisortap 2025 kingumut qiviarpaa, tassanilu mittarfik nutaaq atulermat illoqarfiup oqaluttuarisaanerani siullerpaamik aasaanerani aatsaat taama ulapitsigisoqarpoq. Taxartartut ulappupput, neriniartarfiit ulikkaaqqapput, angalatitsisullu takornarianik angallassinermik ulapputeqarput.

- 2025-mi Nuummi siullermeerluni ulapaarfiuvoq. Ilaat angusaqarluarsimallutik oqarput. Allat naammaginartumik piareersimasimanersugut aperipput. Misilittakkatta atorluarnissaat pingaaruteqarpoq, takornariaqarnermut pisortaq Mads Daniel Skifte oqarpoq. Aamma paasissutissanik digitalinik saqqummiussivoq:

- Mittarfiup ammarneqarnera sioqqullugu Visit Nuuk 87.000-init takuneqartarpoq – ammarneratalu kingorna 212.000-inut amerleriarsimavoq. Nuuk arlalippassuarnit soqutigineqartoq takuneqarsinnaavoq – taakkunanngalu amerlasuut siunissami maanngarumaarput, taanna oqarpoq, atuisullu ilarparujussui Amerikamiuusut nassuiarpaa.

Innuttaasut illoqarfik kikkunnut tamanut iluaqutaasoq kissaatigigaat

Visit Nuuk-mi takornariaqarnermut pisortap Bea Husum Terkildsenip innuttaasunik ataatsimiititsinermi innuttaasut takornarialerisullu siunnersuutaat hundredellit tusarpaat. Siunnersuutit katersorneqarlutillu, misissorneqarlutillu nassuiarneqarput, sammisallu qitiunerusut arlallit uteqqiapput:

- Innuttaasut pitsaanerusumik qaammaqquteqarusullutillu illoqarfiup eqqiluitsuunissaa eqqakkanillu pitsaanerusumik isumaginninnissaq kissaatigaat. Aamma ukioq naallugu innuttaasunut, ilaqutariinnut meerartalinnut tikeraartunullu sammisassaqartitsisoqarnissaa kissaatigaat. Illoqarfimmi pinngortitamilu allagartalersuineq pitsaanerusoq, soorlu assersuutigalugu Quasussuarmut pisuttuarusuttunut aqqutit allagartalersorneqarnissaat. Tamatuma saniatigut Visit Nuup suliassaasa suliniutaasalu ersarissumik saqqummiunneqarnerunissaat kissaatigaat, Bea Husum Terkildsen oqarpoq, innuttaasullu toqqaannartumik saaffigai:

- Innuttaasut tusarneqarusupput — tusaaneqartariaqarput. Takornariaqarneq illoqarfimmut iluaqutaassasoq qulakkeerusupparput, uagutsinnullu apeqquteqartoqarsinnaallunilu isumassarsianik anngussisoqarsinnaassaaq. Attaveqalersitsisuussaagut, Visit Nuuk-mi takornariaqarnermut pisortaq oqarpoq.

Inuussutissarsiutip ineriartornera

Visit Nuuk takornariartitsinermik inuussutissarsiuteqartut pitsaanerusumik ingerlatsilernissaat sulissutiginiarlugu pikkorissaanernik, piginnaanngorsaanernik, nittarsaassinermut pikkorissartitsinernik, takornariaqarnermut inatsisinik isumasioqatigiinnernik pinngortitamilu isumannaatsuunissamik ilinniartitsinernik aaqqissuussisarpoq.

- Ingerlatsiviit amerlasuut attaveqatigiinneq nersualaarpaat, matumani ukiup ingerlanerani ataatsimiinnerit misilittakkanillu paarlaateqatigiinneq inuussutissarsiummik piorsaanerupput, Bea Husum Terkildsen oqarpoq.

Politikkikkut sammivik nukittorsarneqarsimasoq

Kommuneqarfik Sermersooq takornariaqarnermut politikkimik 2026-mi naammassisaqassaaq. Tassani innuttaasut siunnersuutaat inuussutissarsiornermillu misilittakkat ilanngunneqassapput. Takornariaqarnermi pisortaq Mads Daniel Skifte inerniliivoq:

- Siunnersuutit tamaasa katersoreerutsigit misissorneqarlutillu politikkimut ataatsimut ilanngunneqarumaarput. Pilersaarut atorluarsinnaasoq innuttaasullu namminneq atorsinnaasaat kissaatigaarput.

Nuummi innuttaasunik ataatsimiisitsineq kisimi suliniutaanngilaq. Tasiilami Paamiunilu decembarip aallartinnerani assingusumik ataatsimiititsisoqassaaq. Anguniagaq ersarippoq: Ukioq naallugu takornariaqarneq suleqatigiinnermik, sumiiffimmi kinaassutsimik inuussutissarsiutinillu piujuartitsinermik tunngaveqartoq.