Nuuk Snow Festimi Franskit ajugaasut

Holdit aqqaneq marluk sisamanngormalli Nuup qeqqani kulturikkut illorsuup silataani apummik ilusilersukkanik kusanartunik sanallutik ulappupput.

Holdit sisamat arfineq pingasullu akornanni peqataasoqartut, tamatumalu saniatigut aaqqissuussap ingerlanneqarnerani namminneq piumassutsiminnik sulisut 20-iusimasut, Nuuk Snow Festimi suliniummi aqutsisoq, Jørgen Spring Sermitsiamut ilisimatitsivoq.

Nuuk Snow Fest ukioq manna aammaarluni ornigarneqarluartoq, taanna oqaluttuarpoq:

- Ullut tamakkerlugit takuniaasoqarluartarpoq, taakkulu aputit kipparissut qaqortut kusanartunik ilusilersuganngortinneqariartornerat malinnaavigaat. Meeqqat inersimasullu taamak amerlatigisut takuniaanerat takullugu nuannerpoq, meeqqallu isaat ilusilersukkanik kusagisaminnik takusut takullugit kissaammernarpoq, Jørgen Spring oqarpoq.

Sapaammilu ajugaasut toqqarneqarput, taakkulu franskiupput; Rouges Gorges. Ajugaasut tullii Clanker Slayyyersikkuupput, pingajuilu Pingajussaakkuupput.

Takuniaasut akissarsiarititaat aamma franskit Rouges Gorgesikkut pissarsiaraat.

Ilusilersukkat sapaatip akunnera naallugu napatinneeqassasut, Jørgen Springip oqaluttuaraa, taamaammallu kusassaataanissaannut piffissaqarluarpoq.

Nuuk Snow Fest Kommuneqarfik Sermersuup Grønlandsbanki Airgreenlandilut suleqatigalugit aaqqissuuppaa. Tamatumalu saniatigut suliffeqarfiit amerlasuut tapiipput, ilaatigut Ral, Pisiffik Nanoq FM-ilu.

Apummik ilusilersuinermik festivali iluatsittoq nanginneqassasoq, Jørgen Springip ilimagiaa, taamaalilluni tamanna aamma 2027-mi ingerlanneqaqqissalluni.