Nuup ilisarnaatissaanut ajugaasoq saqqummiunneqarpoq
Sermitsiamut isikkivik Nuup ilisarnaataanut ilanngutissaaq.
“Sermitsiap Qilaataa” Sermitsiamut eqqumiitsuliatut titartaariaatsimullu nersorinnissutaavoq, Kalaallit Nunaanni illoqarfiit pingaarnersaannut ilisarnaatitut kinaassutsitullu.
Assi: Kommuneqarfik Sermersooq
Nuuk siunissami takuneqarsinnaasumik ilisarnaateqassaaq, tassungalu atatillugu Kommuneqarfik Sermersooq illoqarfiit pingaarnersaata ilisarnaatissaanik unammisitsivoq.
Ajugaasorlu toqqarneqarsimalerpoq.
Illussanik titartaasartoq Bilo Høegh Stigssenip siunnersuutaa “Sermitsiap Qilaataa” ajugaasuuvoq.
Kommuneqarfik Sermersooq tusagassiuutitigut nalunaarummi allappoq.
“Sermitsiap Qilaataa” Sermitsiamut eqqumiitsuliatut titartaariaatsimullu nersorinnissutaavoq, Kalaallit Nunaanni illoqarfiit pingaarnersaannut ilisarnaatitut kinaassutsitullu. Suliniummi kalaallit qilaataat Qilaat ammalortuulluni qaqqap tungaanut tikkuaqqasoq isumassarsiarineqarpoq.
- Sermitsiaq Nuummut ilisarnaataalluartuujuaannarnikuuvoq – qaqqaq eqqissinermik, nukittunermik kinaassutsimillu inissaqartitsisoq. ‘Sermitsiap Qilaataa’-nik pinngortitap kulturillu naapiffiannik qaqqamut kalaallillu qilaataanut nersorinninnermik pilersitsinissaq kissaatigaara.
- Suliaq ammasumik isikkiveqarluni ammasuussaaq kajungernarlunilu, tassani innuttaasut tikeraallu kinguaariit, oqaatsit kulturillu assigiinngitsut ataatsimoorsinnaassapput. Eqqarsaatersuuteqarfiusinnaasoq, sammisaqarfiusinnaasoq ataatsimoorfiusinnaasorlu – qaqqatsinnit qilaatitsinnillu ataatsimoortinneqartoq, Bilo Høegh Stigsen oqarpoq.
Suliniut illoqarfiup pingaarnersaanut periusissiamut Nuuk 2035-mut ilaavoq.
271-nik taaneqartut
Ilisarnaat Nuup kinaassusaanut ersarissumik ilisarnaataassasoq aamma innuttaasut naapeqatigiiffigisinnaassagaat illoqarfimmilu kulturimik pinngortitamillu misigisaqarfigisinnaassagaat, Borgmesterip Avaaraq Olsenip (IA) tusagassiuutitigut nalunaarummi erseqqissarpaa.
- Innuttaasut tusarnaarpagut. Nuuk2035-p suliarineqarnerani innuttaasut ersarissumik ilisarnaateqarnissaq kissaatigaat – ataatsimoorfik issittumi illoqarfiit pingaarnersaattut kinaassutsitsinnut takussutissaq. Taamaattumik unammisitsineq aallartipparput massakkullu ajugaasoq nassaaraarput.
Ilisarnaatissamik taasinissaq soqutigineqarpallaarsimanngilaq. KNR-ip allaaserinninnera naapertorlugu sapaatip-akunnerata ataatsip matuma siorna innuttaasut 200-t sinnilaarlugit taasisimapput.
Innuttaasut katillugit 271-it taasisimapput. Innuttaasunik peqataatitsinissamut quppernermi qanoq taasisoqarsinnaanersoq ilitsersuutigineqarpoq. Nuummi najugallit 20.000-it sinneqarput.
Aningaasat pingaaruteqarnerusunut atorneqarunik pitsaanerusoq, inuit Facebookimi isummersuutaanni atuarneqarsinnaavoq.
2024-mut missingersuutinut atatillugu kommunalbestyrelsip suliniummut 5 millionit koruunit immikkoortippai.
