Paarisa nittartakkatigut siammarterinermi mianerinninnissamik isumassuinissamillu kajumissaarivoq
Oqaatsit assillu sunniuteqartorujussuusinnaappoq, amerlasuunullu eqquisinnaallutik. Taamaamat nittartakkatigut attaveqatigiittarfimmi qanoq allannerluni eqqumaffissaavoq, ikiortissarsiornissamillu siunnersorneqarnissamullu saaffissat innersuunneqartassallutik.
- Pingaaruteqarpoq inuiaqatigiittut ataatsimoorluta akisussaaffimmik tigusinissarput, attaveqaqatigiittarfikkut paasissutissat pillugit siammarterinermi siammartikkap imarisaa eqqarsaatigilluartaqqullugu, meeqqanut, inuusuttunut, inatsisit atuutsinneqarnerannut naligiissitaanermullu naalakkersuisoq Mariane Paviasen Jensen (IA) oqarpoq.
Assi: Signe Goldmann/Ritzau Scanpix
Alianartumik pisoqarsimatillugu inuit nittartakkatigut attaveqatigiittarfiini siammarterineq allannerlu eqqarsaatigilluarneqaqqaartariaqarput.
TUSAANNGA
Imminut toqunnissamik eqqarsaateqaruit, eqqarsaatinnik annissiumallutit Tusaannga-mut attaveqartuaannarsinnaavutit.
Kinaanerit isertuullugu ulloq unnuarlu akeqanngitsumik sianersinnaavutit allassinnaallutilluunniit.
Oqarasuaammut 80 11 80-imut. SMS 1899.
Paarisa Meeqqanut, Inuusuttunut Ilaqutariinnullu Naalakkersuisoqarfillu tusagassiuutitigut nalunaarummi taamatut kaammattuipput.
Pisoq alianartoq inuiaqatigiinni annertunerusumik eqqumaffigineqarneruleraangat inuit amerlasuut sunnerneqarsinnaasarput – pingaartumik inuusuttut aammalu siornatigut eqqugaasimasut.
Paarisap ikiorneqarnissamik pisariaqartitsisunut saaffissanik innersuussisarnissaq aamma tapersersuisoqartarnissaa naqissuserpaa:
- Pingaaruteqarpoq inuiaqatigiittut ataatsimoorluta akisussaaffimmik tigusinissarput, attaveqaqatigiittarfikkut paasissutissat pillugit siammarterinermi siammartikkap imarisaa eqqarsaatigilluartaqqullugu, oqaatsit assillu isumalerujussuusinnaapput, pingaarpoq ilisimassallugu inunnut amerlasuunut sunniuttarmata.
- Tamatumalu peqatigisaanik kikkut tamarmik ajornartorsiortut kaammattorusuppakka ikiorneqarnissaminnut saaffiginneqqullugit. Tapersersuisussaqarpoq, aamma kisimiissanngilatit, meeqqanut,
inuusuttunut, inatsisit atuutsinneqarnerannut naligiissitaanermullu
naalakkersuisoq Mariane Paviasen Jensen oqarpoq.
Kammalaatit Tusaanngaluunniit saaffigineqarsinnaasut
Paarisap ikiortissarsiorluni, siunnersortinniarluni, imminullu isumassornissamut qanoq iliortoqarsinnaaneranut saaffissat suuneri piffissami tulliuttumi paasititsiniutigissavai.
Kammalaatit ilaquttat nalunngisannulluunniit oqaloqatiginissaat imaluunniit Tusaannga ulloq unnuarlu periarfissaaasoq aamma paasissutissiissutigineqarpoq.
Paarisap inuit tamaasa mianerinneqqullugit isumassueqqullugillu kajumissaarpai – attaveqaatitigut kiisalu inuit akornanniitillutit.
Ajornartorsiuteqaruit imminulluunniit toqunnissannik eqqarsaateqaruit, pingaaruteqarpoq oqaloqateqarnissat.
2025-imi imminut toqunnerit amerlassusaat Kalaallit Nunaanni ukiuni arfineq-pingasuni aatsaat taama amerlatigaat. Nakorsaaneqarfiup 2025-mi imminut toquttarneq pillugu ukiumoortumik nalunaarusiaani atuarneqarsinnaavoq.
PISUNI ILUNGERSUNARTORSIORFIMMI SIUNNERSUUTIT PITSAASUT:
- Sunik siammarterinerlutit eqqarsaatigilluaruk
- Ersarissumik tunngavilimmik saqqummiussisarit
- Suminngaanniit ikiorneqarsinnaaneq pillugu paasissutissiigit
- Nammineq allallu qanoq qisuariaateqarnerannik maluginiagaqarit
- Attaveqatigiittarfiit oqimaatsorsiortitsippata unitsikkallakkit
Tusarfik: Meeqqanut, Inuusuttunut Ilaqutariinnullu Naalakkersuisoqarfik
