Imminut toqussimasut ukiuni arfineq-pingasuni aatsaat taama amerlatigipput

Kalaallit Nunaanni imminut toquttartut nunanut allanut sanilliullugit amerlanerujussuupput, 2018-imiilli aatsaat taama amerlatigisut 2025-mi imminnut toqupput.

Tamanna Nakorsaaneqarfiup 2025-mi imminut toquttarneq pillugu ukiumoortumik nalunaarusiaani atuarneqarsinnaavoq.

Nunatsinni inuit 50-it 2025-mi imminut toqupput, tassa innuttaasut 1000-iugaangata 0,88-it, tamanna Danmarkimi nunarsuarmilu agguaqatigiissillugu atugaasunit arfineq-marloriaammik quligiluariaammillu annertuneruvoq.

Nalunaarusiaq naapertorlugu Canadami Alaskamilu Inuit akornanni aamma imminut toquttartut amerlapput.

Siorna toqusut 84 procentii angutaapput, amerlanerillu inuusuttuupput 15-it 24-llu akornanni ukioqarlutik. Agguaqatigiissillugu imminut toqussimasut 32-nik ukioqarput.

Imminut toqunnissamut pinaveersaartitsinerit iluaqutaanngillat

"Imminut toqunnerup tarnikkut nappaateqarnermut, siornatigut imminut toqoriarsimanermut aanngajaarniutinillu- ilaatigut imigassamik atornerluinermut attuumassuteqarajunnera, nunani tamalaani ilisimatusarnerup takutippaa,“ nalunaarusiami allassimavoq.

2025-mi imminut toquttunit 50-iusunit 30 procentii tarnimikkut nappaateqarput, 24 procentiilu siusinnerusukkut imminut toqunniarlutik misileereersimallutik.

Inuit imminut toqunniarlutik misiliisimasut peqqinnissaqarfimmit imminut toqunnginnissamut ikiorneqarsinnaasut neqeroorfigineqartarsimasut nalunaarusiami allassimavoq. Inuit aqqaneq-marluk siusinnerusukkut imminut toqoriarsimapput. Taakkunannga sisamat ikiorneqarnissamik neqeroorfigineqarput, pingasut ikiorneqarnermik naammassinnipput, ataaserlu suli utaqqisuniitsilluni toqukkut qimaguppoq.

Imminut toquttut qulit imigassamik sunnerneqarsimallutik iliuuseqarsimapput, sinnerilu imminut toqunneq sioqqullugu imigassartorsimanersut ilisimaneqanngilaq.

Imigassamik atornerluinerup pinaveersaartinnissaa pingaarnerutinneqartariaqarpoq

Inuit 50-it taakkua arlaannaataluunniit sapaatip-akunnerani toqunissi sioqqullugu nakorsiartarfik imminut toqunnissamik eqqarsaateqarneq pillugu saaffigisimanngilaa.

Tamanna maluginiarnartuusoq nalunaarusiami tikkuarneqarpoq. Amerlanertigut eqqarsaqqaarnatik imaluunniit isumatsassimallutik, ilaannikkut imigassamik atuivallaarnertik pissutigalugu, imminut toquttartut misissuinerit takutippaat.

"Tamanna inunnut ataasiakkaanuinnaq suliniuteqarnissap sunniutaanik killiliivoq aaqqissuussamillu pitsaaliuinermik nukittorsaanissamik piumasaqaatitaqarluni," nalunaarusiami allassimavoq.

Nalunaarusiami erseqqissarneqarpoq imigassamik atornerluineq pinaveersaartinniarlugu iliuuseqarneq imminut toqunnissamut pinaveersaartitsinermut ilaasoq, ingammik nunatsinni aalakoornartortalimmik imigassartortarneq imigassamillu atornerluinermut atatillugu naalliuutit suli atugaammata.

Inuup ataasiakkaatut katsorsarneqarnera ajornartorsiorneranilu akuliuttarneq aaqqissuussaasumik iliuuseqartarnermit ilaneqartariaqarput imigassamik atornerluinerup kingunerisaanik nanertuutaasunik annikillisaataasinnaasumik, inuiaqatigiinni illersuutaasunik nukittorsaataasinnaasunik ajornartoorfimmilu piaarinani iliuuseqarnissamut aarlerinartoqarpallaannginnerutitsisunik, nalunaarusiami inerniliunneqarpoq