Naleqqap Folketingimut sassartitai sisamaasut partiip siulittaasuata saqqummiummagit suna tamarmi orangerasaarpoq. Kikkut sassartitsinersut apeqqusigassaanngilaq.Partiilu Danmarkimi Folketingimut qinersereernermi ministeriuneruninngortussamik piukkussaqarnersoq aperigaanni siulittaasoq nalorninngilaq.
Ministeriunissamik piukkussaqareerpisi?
Naleqqap Folketingimut sassartitai sisamaasut partiip siulittaasuata saqqummiummagit suna tamarmi orangerasaarpoq. Kikkut sassartitsinersut apeqqusigassaanngilaq.Partiilu Danmarkimi Folketingimut qinersereernermi ministeriuneruninngortussamik piukkussaqarnersoq aperigaanni siulittaasoq nalorninngilaq.
Ministeriunissamik piukkussaqareerpisi?
- Suu, uagut qinigaatitassarput. Asuki, naamik, Pele Broberg illarlunilu oqarpoq.
Partiip siulittaasua piaaraluni taama akereerluni ingerlaannarluni ilumoorsaalerpoq. Ministeriunertut piukkussaminnik, Siumukkut Inuit Ataqatigiillu assigalugit, tikkuussereerusunngillat.
- Uagut suleqateqanngilagut Danmarkimi, imaanngitsoq suleqateqarsinnaanngitsugut, tungujortuunatalu aappaluttuunngilagut. Oqaatigisarparput orangesarpugut. Tupigilaarpakka maaniittut tungujortukkormiunik suleqatillit tungujortukkormiunik taasisinnaannginnerat, aappaluttukkormiunillu suleqatillit aappaluttukkormiunik taasisinnaannginnerat, Pele Broberg oqarpoq.
Kikkulluunniit suleqatigisinnaagaat
Danmarkimi tungujortukkormiut aappaluttukkormiullu nunatsinnut assigiinngitsutigut iliuuseqarsimanerat siulittaasup maluginiarsimavaa.
- Siusinnerusukkut takunikuusagut tassaapput tungujortukkormiut tassaasut namminersornermut inatsimmut, naak piumanngikkaluarlutik, inissiinikut. Kingorna aappaluttukkormiut aamma ikiuillattaanikuupput. Taamaammat inissereernianngilarput kina toqqarniarnerlugu, siulittaasoq oqarpoq.
Piumasaqaatissaalli ersarinnerupput.
- Qulakkiigassatsinni pingaarnerpaaq tassaavoq, inuiaat kalaallit pisinnaatitaaffii ataasinnguamilluunniit nikisinneqassanngitsut ajornerulersinneqassanngitsut uagut tapersiissagutta. Tulliatut danskit akuliukkusukkaluttuinnarnerat killilersimaarneqartariaqartoq nakkutigineqartariaqartoq, nunatsinnut piginnittoorusunnerat malunnarsigaluttuinnarami.
Danskit nunatsinni iliuuserisimasaat assigiinngitsut suli maannamut kinguneqartut Pele Brobergip ilanngullugu taavaa.
- Ajornartorsiutigisarput tassaavoq, sooq aatsaat assorooqqaarluta kukkussutitik nassuerutigisinnaavaat? Tassa taanna tamatigut utikattuartoq, nassuerutigerusunneq ajoramikku, nunarput qanoq isiginerlugu, nunattalu inui. Taamaammat uagut pingaartorujuttut isigivarput, kalaallit maaniittut aammalu Danmarkimiittut, ilinniariarusuttut ilaalu ilanngullugit illersorneqarnissaasa qulakkeernissaa.
- Massakkummi tusaavakka inuusuttortagut Danmarkimi ilinniarusukkaluarlutik qunugigaat, meeqqanik arsaarneqarnissartik peqqutigalugu. Nalinginnaasunngungaarmat kalaallinik meeqqanik Danmarkimi arsaarinnittarneq, Pele Broberg oqarpoq.
