ANNA WANGENHEIM:
Peqqinnissamut isumaqatigiissutip tupamik imigassamillu atuineq akiorniarpaa
Peqqissutsimut Naalakkersuisup Anna Wangenheimip tupamik imigassamillu atuinerup annertusiartornera ernummatigaa, taamaattumillu nuna tamakkerlugu peqqinnissaq pillugu isumaqatigiissuteqartoqarnissaa sulissutiginiarlugu.
Anna Wangenheimip Naalakkersuisullu erseqqissarpaat tupamik imigassamillu atuinerup siunisssami annikillisarneqarnissaanut, siunissaq ungasinnerusoq eqqarsaatigalugu aaqqiissutissaqartariaqartoq.
Assi: Oscar Scott Carl
Tupat eqqunneqartut ukiut marluk ingerlaneranni 9 procentimik amerleriarpuut. Sunoorsit 2024-miit 2025-mut marloriaammik amerleriarput, imigassanillu eqqussuineq/tunisassiorneq ukiup ataatsip ingerlanerani 3 procentingajannik amerleriarsimallutik.
- Naalakkersuisut kisitsisit nutaat tupamik, pingaartumik sunoorsimik atuinerup annertusiartorneranik takutitsisut eqqumaffigaat. Ineriartorneq ernumanartorujussuuvoq, tupamimmi atuineq napparsimalersitsisartoq, toqussutaasartoq ukiullu inuuffigisat amerlasuunik annaasaqaataasartoq ilisimaneqarpoq, Anna Wangenheim Sermitsiamut oqarpoq.
Naalakkersuisut Inatsisartuni partiit peqqissutsimut isumaqatigiissuteqarfiginiarlugit sulissuteqartut, tassanilu peqqinnerulersitsiniaaneq pinaveersaartitsinerlu annerusumik pingaartinneqartut, Sermitsiamut oqarpoq
Piujuartitsisumik iliuuseqarneq
Anna Wangenheimi Naalakkersuisullu aaqqiissutissaq siunissaq ungasinnerusoq eqqarsaatigalugu iliuuseqarnikkut, naalakkersuisooqatigiit nutaat pilersinneqarneranni allanngortinneqariaannaasumik, tunngaveqartariaqanngitsoq erseqqissarpaat. Siusinnerusukkut tupamut immiaaqqanullu, viinninut imigassamullu tunngasunik iliuuseqartoqarnikuuvoq piffissap ingerlanerani Inatsisartuni amerlanerussuteqartut allanngortinneqarnikumik.
- Misilittakkat takutippaat imigassaq tupalu pillugit suliniutit eqqarsaatigalugit pitsaanerpaajusartoq ukiuni arlalinni suliniutit attanneqaraangata. Tamanna anguneqarsinnaassappat suliniutit siunissamut ungasissumut isiginissaat aamma ingerlatiinnarneqarnissaat pingaaruteqarpoq, naak politikkikkut aqutsinermi allanngortoqaraluartoq, Anna Wangenheim oqarpoq nangillunilu: "Peqqinnissamut isumaqatigiissutip annertusineqarneratigut suliniutinut tunngaviusoq nukittorsarneqassaaq, taamaalillunilu suliniutip ingerlateqqinneqarsinnaanissaa ilimanarnerulerluni, taamaalillunilu kissaatigisatut sunniuteqarluarnerulissalluni.“
Imigassamik atueriaaseq maani nunami imigassamik atuinermik inuiaqatigiinut ajornartorsiutaanerpaasoq, inuiaqatigiillu peqqissusaannut annertuumik unammillertoq ilaatigut tikkuarpaa.
Aalakoorujussuarniarluni imigassartorneq
- Aalakoorujussuarluni imigassartorneq inuiaqatigiinni annertuumik ajoqusiisuuvoq. Aalakoorujussuarneq nakuusernernut, ajutoornernut, sumiginnaanernut, atornerluinernut inuusuttullu imminut toquttarnerannut erseqqissumik attuumassuteqarpoq, Anna Wangenheim oqarpoq, nangillunilu:
- Naalakkersuisut peqqinnissaq pillugu isumaqatigiissummut annertusineqartumut isumaqatigiissitsiniartartut suleqatigalugit, nuna tamakkerlugu imigassaq pillugu isumaqatigiissummik ineriartortitsinissaq pillugu najoqqutassianik siunertanillu nalunaarut siunissami imigassamut politikkimik suliaqarnermut sinaakkutaasussaq ilanngunneqarnissaa kissaatigaat.
“Naalakkersuisut partiit ataatsimeeqatiginissaat qilanaaraat, akisussaaffimmik innuttaasullu inuunerannik ataqqinninnermik tunngaveqartumik imigassamut politikkimik pilersitsisinnaanerput oqaloqatigiissutigissallugu.” Peqqissutsimut Naalakkersuisoq naggasiilluni taama oqarpoq.
