Peqqissaasut tarrarsuisartullu nutaanik siulersuisoqalersut
PK-mi siulittaasunngortup peqqinnissaqarfimmi sulisut tusaaneqarnissaasa sulissutiginisssaat piareersimaffigaa.
Siulersuisunut ilaasortat sisamat Nuummi atorfeqarput, pingasullu Sisimiuniillutik.
Assi: PK
Peqqissaasut Kattuffiat (PK) nutaanik siulersuisoqalerpoq. Ataatsimeersuarnermi siulersuisuni ilaasortat qinerneqaqqammerput.
Peqqissaasut Kattuffiat tusagassiuutitigut taama nalunaaruteqarput.
Navarana Johansen PK-mi siulittaasutut septembarimi qinerneqarpoq, maannalu Ken Jensen pisortatigoortumik taarserlugu.
- Sulilernissara qilanaarisimaqaara. Siulersuisunik nukittuunik Nuummiit sineriammiillu sinniisussanik maanna pilersitsivugut. Taakku peqatigalugit PK-p ukiuni aggersuni sulinissaanut siunnerfilernissaa qilanaaraara, Navarana Johansen oqarpoq.
Aamma siulittaasuusimasoq siulersuisunillu ilaasortaasimasut qutsavigai.
- PK inuiaqatigiinni nukittuumik pingaaruteqartumillu nipeqarluni inissisimaffeqarpoq. Oqariartuuteqaraangatta tusaaniarneqartarnerput malugisinnaavara. Tamanna siulima sulisimanerannik pissuteqaqaaq – pingaartumik Ken Jensenip ukiuni qulingiluani kingullerni siulittaasuunerani, oqarpoq.
Kalaallit oqariartuutaat pingaaruteqartut
Peqqissaasut aningaasarsiaannut isumaqatigiissut nutaaq septembarimi taasissutigineqarmat taasisut nalingiipput. Isumaqatigiissutip akuerineqarneranik taanna kinguneqarpoq. Taamaammat Navarana Johansenip sulisut kattuffianni ataqatigiinnerulernissaq sulissutigilerpaa.
PEQQISSAASUT KATTUFFIANNI SIULERSUISUT NUTAAT
Siulersuisut nutaat ima inissisimapput:
• Navarana Johansen - siulittaasoq
• Hanne Marie Olsen Fontain
• Helle Berg
• Ina Olsen
• Inaluk Olsen Heilmann
• Katrine Olsvig-Kleist
• Selvi Mahalingam
- Taasinerit eqqarsaatigalugit marlunnut avissaartuussimasutut isikkoqarsinnaavoq. Ilaasortalli oqaloqatiginerini taamatut misiginngilara. Tamatta angorusutarput assigiippoq: peqqinnissaqarfik ingerlalluartoq, sulisut atugarissaartut innuttaasullu sullilluarneqarnissaat tamatta angorusupparput. Taamatut suliniuteqarneq ingerlateqqissavarput, siulittaasunngorlaaq oqarpoq.
Siulittaasunngorlaap peqqissaasut kalaallit oqariartuutaasa ersarinnerulernissaat immikkut ukkatariniapaa, aamma Kalaallit Nunaanni peqqissaanerup ineriartortinneqarnerata Kalaallit Nunaat aallaavigalugu pinissaa qulakkeerniarlugu.
Naak politikerit sulisussaaleqinermi ajornartorsiutit aaqqinniarlugit nunanit allaneersunit tikisitsinikkut aaqqiiviginiarsarigaluaraat, innuttaasut napparsimasut peqqinnissaqarfimmilu sulisut namminneq peqqinnissaqarfimminni nalornisutut misiginnginnissaat pinagaruteqartoq Navarana Johansenip naqissuserpaa.
- Immitsinnut mattutissanngilagut, aammali Kalaallit Nunaanni suut iluatsilluarnersut suullu iluatsinngitsoornersut nipituumik oqaatigisinnaasariaqarpagut. Uaguuppummi misilittagaqartuullutillu ilisimasaqartut, oqarpoq.
