KL

DK

KUJALLEQ KILLILIIVOQ

Pilersuisumi imigassat kingusinnerusukkut aamma ammartalissasut - nunaqarfinniunngitsorli

Brugsenip Pisiffiullu imigassanik arfininngornikkut kingusinnerusukkut maajimiilli tuniniaasalernini iluatsilluareeraallu Pilersuisup pisiniarfii malinnaasussanngorput. Imigassammi arfininngornikkut qulinut ammassaarlutik ulloqeqqanut ammartalissapput, kisianni Pilersuisup pisiniarfiini amerlanerpaani tamanna atuutissanngilaq.                                   

Pilersuisup nunatsinni pisiniarfii katillugit 64-upput, taakkunannga 53-it nunaqarfinniillutik. Nunaqarfinni pisiniarfiit sivikinnerusumik ammasarmata imigassanik arfininngornikkut tuniniaasarneq allanngortinneqassanngilaq.
Arnaq Nielsen Arnaq Nielsen tusagassiortoq
Saqqummersinneqarpoq

Pilersuisup illoqarfinni pisiniarfiini aqqaniliusuni imigassanik arfininngornikkut tuniniaasarneq nalunaaquttap akunnerinik marlunnik kinguartinneqarluni, ulloqeqqanut aatsaat ammartalissaaq. Ammasarfinnik allannguineq arfininngorpat oktobarip 17-iani atuutilissalluni.

- Pilersuisup pisiniarfiini illoqarfimmiittuni tamanna atuutissaaq. Nunaqarfinni ammasarfiit sivikinnerummata ilanngunneqanngillat, KNI-mi sulisoqarnermut, attaveqaqatigiinnermut piujuartitsinermullu pisortaq Juliane Henningsen Heilmann Sermitsiamut taama allappoq.

Pisiniarfissuarnut allanut malinnaalersut

Pisiffik Brugsenilu arfininngornikkut kingusinnerusukkut imigassaarniartarlutik maajimiilli misiliutigaat. Ammasarfiit allanngortinneqarnerat imigassat tunisaasa 12-14 procentimik appariarnerannik kinguneqarpoq.   

Maanna Pilersuisumi pisiniarfiit ilaat malinnaasussanngorput.

- Arfininngornikkut ullaap tungaa sulisunut pisisartunullu toqqissisimaffiunissaa siunertaavoq. Allannguinitsinni ilissinnik illersuinerunissarput pisisartullu eqqissillutik pisiniarsinnaanissaat siunertaraarput, Juliane Henningsen Heilmann allappoq. 



arfininngorneq pisiniarfiit imigassat pilersuisoq juliane henningsen heilmann inuiaqatigiit

Atorfiit tamaasa takukkit

PODCASTI

Powered by Labrador CMS