Pilersuisup nerisassat 11,2 millionit koruuninik nalillit igiinnarai

KNI-p ataani Pilersuisoq, sumiiffinni 64-ni katillugit 67-inik pisiniarfiuteqarpoq. Pisiniarfiit Siorapalummit, Aappilattumut Ittoqqortoormiinullu siaruarsimapput. Sumiiffippassuarni Pilersuisoq taannaavoq najugaqartut pisiniarfigisinnaasatuaat. 

KNI A/S-ip 2025-imi apriilip aallaqqaataanit 2026-imi marsip naaneranut naatsorsuutini saqqummiuteqammerpai. Ingerlatseqatigiiffik Namminersorlutik Oqartussanit pigineqartoq ukiumi naatsorsuusiorfigisamini, suli akileraarnani, 152,4 millionit koruuninik sinneqartoortoq, Sermitsiap tallimanngornermi allaaseraa.

Suliffeqarfissuup ukiumut nalunaarummini Pilersuisup pisiniarfiini nerisassanik suli pisiarineqanngitsunik eqqaaginnartarnini qanoq naleqarnersoq allaaseraa. Nerisassat 11,2 millionit koruuninik nalillit Pilersuisumi sulisut igiinnarpaat. Tamanna sulisunik aningaasanillu atuilussinnarnerusoq, ingerlatseqatigiiffik allappoq.

- Nerisassanik maangaannartitsinermi pineqarput asuliinnartitsineq kiisalu aningaasaqarnikkut artorsinneqarneq, taamaattumik nioqquteqarnermut ingerlatsivimmi nioqqutinik igitsiinnartarnerup annikillisarnissaanik suliaq pingaaruteqarluinnartuuvoq, KNI A/S ukiumut nalunaarummini allappoq.

AAMMA ATUARUK

KNI A/S millioninik pingasunik kisitsisilinnik sinneqartoortoq

Nalitunernik eqqaanikuusut

Pilersuisup nerisassat suli naleqarnerusut ukiut siuliini igiinnartarpai. Ukiumi naatsorsuusiorfiusumi 2021/22-mi nerisassat 24,4 millionit koruuninik aamma 2024/25-mi 15,2 millionit koruuninik nalillit igiinnarneqarput. Taamaattumik maanna angusaq ukiuni kingullerni aatsaat taama pitsaatigaaq. Tamannalu ingerlatseqatigiiffiup ukiuni kingullerni ukkatarisimagaa, aamma allaaserisaqarpoq. 

- Inuussutissat suli annerusumik atorluarneqarnissaat siuarsarneqarpoq, assersuutigalugu nioqqutit sivikinnerusumik piunertussusillit nereriaannartut nioqqutissiarinerisigut kiisalu sinnilinnik pigisat igiinnarnissaasa annikillisaavigineratigut, suliffeqarfik allappoq.

Tamannalu attatiinnarusullugu pilersaaruteqarput.

- Taamatut siumukarnerup attatiinnarnissaanut nukittorsarnissaanullu qaammatit pingasukkaarlugit nutaatut ingerlanneqartartussat nioqquteqarnermut ingerlatsiviup pilersaarutigaa, taakkua allapput.

Nutaatut suut ingerlanneqalersaarnersut ukiumoortumik nalunaarummi itisilerneqanngillat.