KNI A/S millioninik pingasunik kisitsisilinnik sinneqartoortoq

Suliffeqarfik nioqqutissanik ikummatissanillu Kalaallit Nunaanni pilersuisussaatitaasoq, KNI A/S, naatsorsuutiminik naammassinneqammerpoq. Namminersorlutik Oqartussat ingerlatseqatigiiffiutaat Sisimiuni qitiusumik allaffeqarfeqartoq,  naatsorsuutimini kingullerni suli akileraarnani 152,4 millionit koruuninik sinneqartoorpoq.

Tamanna ingerlatseqatigiiffiup pisortaata nuannaarutigeqaa.

- Ukiumoortumik angusat takutippaat suliffeqarfiup ingerlatsiviisa pingaarnerit annertuut marluusut, ataatsikkut ineriartortinneqartinneqarnerat iluatsissimagipput. Ikummatissaqarnermut ingerlatsivimmi niuernikkut annertunerusumik angusat, pitsanngoriaateqarfiusullu anguneqarput umiarsuarnut takorniartaatinut, kilisaatinut aatsitassarsiornermillu suliaqartunut ikummatissamik tunisaqarnikkut.

- Nioqqutissaqarnermik ingerlatsivimmi pilersuisussaatitaanerput ataqqillugu allannguisoqarpoq, ingerlatsineq niuernerpalaarnerusumik aaqqissuuteqqinneqarmat ingerlatsivigut angusarissaarfiupput, KNI-p pisortaanera, Jeppe Jensen, tusagassiorfinnut nalunaarummi oqarpoq.

Ingerlatseqatigiiffik suli akileraarnani siorna angusarluppoq, 83,2 millionit koruuninik amigartoorami.

Polaroilip angusarissaarluarnera sunniuteqartoq

Ingerlatseqatigiiffiup ikummatissanik nioqquteqartartua, Polaroil, ukiumi naatsorsuusiorfiusumi angusarissaarluarpoq. Akileraarutit suli akilernagit 116,2 millionit koruuninik sinneqartoorpoq. Tamanna orsussap pisisartunut siorna maajip qaammataani akisunerulersinneqarneranik ilaatigut aallaaveqartoq, pisortaq nassuiaavoq. Polaroil ukiumi naatsorsuusiorfimmi kingullermi 9,5 millionit koruuninik sinneqartoorpoq.

Pilersuisoq angusarinneroqisoq

Ingerlatseqatigiiffiup suliffeqarfiutaa, Pilersuisoq, nioqqutissanik sumiiffippassuarni pilersuisussaatitaavoq. Pilersuisoq akileraannginnermini 32 millionit koruuninik sinneqartoorpoq. Suliffeqarfik aningaasatigut ingerlanerlulluni ukiup siuliani 95,7 millionit koruuninik amigartoorpoq.

Maanna pitsaanerusumik inissinnermut periusissiornikkut anguniakkat nutaat, niuernerpalaarnerusumik ingerlatsineq, nioqqutissanik qiniataagassanik aqutsineq, sullitanik ukkataqarneq aningaasartuutinillu aqutsilluarneq aallaaviusut ingerlatseqatigiiffik allappoq.

- Nioqquteqarnermut ingerlatsivik ukiuni arlalinni aningaasaqarnikkut ajornartorsiortarsimasoq, 2025/26-mi ilorraap tungaanut aallarpoq, tamatumalu uppernarsarpaa niuernikkut nukittorsaaneq kiisalu inuiaqatigiinni akisussaaqataaneq ingerlaqatigiissinnaalluartut, Jeppe Jensen oqarpoq.

Siulittaasoq: Sinneqartoorutit ukununnga atussapput 

KNI A/S-ip ukiumi naatsorsuusiorfiusumi maanna qaangiuttumi, sanaartornermi aningaasaliinernut 108,2 millionit koruunit atorpai. Maannalu sinneqartoorutaasut suliassanut taakkununnga aamma atussasut siulersuisut aalajangiipput.

- 2025/26-mi sinneqartoornitsigut pigisatta nalillit aningaasaliivigisariaqartut aningaasaliiviginissaat naatsorsuutigaarput, taamalu ililluta sulisunut, ullut tamaasa angusaqarumallutik suliuartunut, pisisartunullu tunngatillugu suli pitsaanerusunik atugassaqartitsinissatsinnut tunngavissiilluta.

- Taamaaliornitsigut nunatsinni, ukiuni tulliuttuni, pilersuinerput patajaatsumik ingerlateqqissinnaassavarput angusaqarluarnerusinnaallutalu, KNI-mi siulersuisuni siulittaasoq, Inger Eriksen, oqarpoq.

Ingerlatseqatigiiffiup ukiumi missingersuusiorfimmi tullermi naatsorsuutiminik sinneqartooqqinnissi aamma naatsorsuutigaa. Tamatumuuna sinneqartoorutit 100 millionit koruunit 125 millionit koruunillu akornaniinnissaat naatsorsuutaavoq.