Pisiffiup Brugsenillu inuusuttut imigassartornikinnerulernissaat anguniarpaat

Pisiffik Brugsenilu, pisisartunik nuannaartitsiniarlutik ukiorpassuarni unammisartut, maanna ataatsimoorlutik paasititsiniaanermik annertuumik aallartitsipput.

Imigassamik atueriaatsip, ingammik inuusuttut akornanni, allanngortinniarneranut suliniut ataasinngorpat aallartissaaq. Inuit immiaaqqamik viinnimilluunniit imertigatik eqqarsaqqaartariaqarnerat suliniutigineqartup siunertaraa.

Taama Pisiffik Brugsenilu ataatsimut oqariartuuteqarput.

- Brugsenimi imigassamik tuniniaaneq ukiuni arfinilinni kingullerni annikilligaluttuinnarpoq.

- Ineriartornerup tamatuma ingerlaannarnissaa qulakkeerniarlugu Pisiffik suleqatigalugu suliniutit arlallit aallartissavavut.

Aalakkoorujussuarneq ajutoornissamut navianaateqarpoq

- Brugsenip Pisiffiullu paasititsiniaanikkut inuusuttut annikinnerusumik imigassartortalernissaannik kajumissaarniarpaat, aanna aalakoorujussuarniarluni imigassartorneq mianersoqqussutiginiarlugu, Brugsenimi pisortaaneq Allan Kristoffersen Sermitsiamut oqarpoq.

Aalakoorujussuarniarluni imigassartorneq tassaavoq imigassat tallimat amerlanerusulluunniit tulleriitsiinnarlugit imerneq. Aalakoorpallaarneq ajutoornissamut nakuusertoqarnissaanullu aarlerinarnerulersitsisarlunilu, siunissaq ungasinnerusoq eqqarsaatigalugu timimut tingumullu ajoqusiisinnaavoq.

Brugseni Pisiffillu imigassamik atornerluinerup annikillisinnissaanut nunatsinnilu imigassamut tunngatillugu peqqinnarnerusumik kultureqalernissamut suliniutinik assigiinngitsunik ataatsimoorussanik aallartitsissapput.

Imigassat aalakoornartortaqanngitsut naliginnaasunngorsarneqarnissaat pisiniarfinni, inuit attaveqaqatigiittarfiini oqallinnernilu peqataanikkut pisinnaavoq.

Pisiffik Brugsenilu imigassaarniarfiit kioskillu imigassamik aalakoornartulinnik imallit ikilisinneqarnerisigut imigassamut tunngatillugu annikillisaalereerput.

Imigassaq aalakoornartortalik ulluinnarni pisiniarfinni ikilillutillu aalakoornartortaqanngitsut pisiarisineqarsinnaasut amerlanerulerput. Tamannalu ulluinnarni nioqqutissanik tuniniaasartut taakkua marluk oqaluttuaannut ilaavoq.

Sapaatip-akunnera sammisaqarfiusoq

Sapaatip-akunnerani 18-imi, tassa sapaatip-akunnerata tulliani, Kalaallit Nunaanni imigassamik kulturi pillugu sammisaqarfiusumi, imertarnerup qanoq ittuuneranik meeqqanut inuusuttunullu toqqissisimanartunik avatangiiseqartitsinissaq pillugu sammisaqarfiusumi, Brugseni Pisiffillu imigassamut tunngassuteqanngitsunik nioqquteqarniarnermik ukkataqarput.

– Sapaatip-akunnera imigassamut aalakoornartoqanngitsumut tunngasoq pingaarutilik, suliarpulli tamatuma kingorna uninnavianngilaq. Ulluinnarni nioqqutinik tuniniaasartutut inuit naapittarpavut, tamatumalu akisussaaffilerpaatigut imigassamik qanoq sassaalliisoqartarneranut pineqarsinnaaneranut, Brugsenimi pisortaaneq Allan Kristoffersen oqarpoq.

Pisiffiup Brugsenillu pisiniarfiini imigassamik aalakoornartoqanngitsumik nioqquteqarnerulissaaq, aammalu ulluinnarni imigassartornaveersaarnermik toqqaanissaq ajornannginnerulersillugulu isumassarsinarnerulersitsisumik sammisassaqartitsisoqalissalluni.

Imigassamik eqqussuineq appariartupiloortoq

Suliffeqarfiit taakku marluk imigassamik atuineq pillugu oqallinnermi pingaarutilimmik maluginiagaqarput. Kalaallit Nunaannut imigassap eqqussugaanerata tamarmiusup 2025-mi qaffariarnera, imigassamik aalakoornartortalimmik atuisut amerleriarsimaneranik isumaqanngilaq.

- Eqqussukkat amerlassusaat atuinerup piviusortaanik takutitsisinnaanngillat. Annertunerusunik toqqorsiveqalerneq, eqqussuinerup annertuseriarneranut peqqutaaqataasinnaavoq.

- Pisiniartunut toqqaannartumik tunisat misissornerisigut atuineq pillugu eqqornerusumik takuneqarsinnaavoq, Pisiffiup pisortaanera Per Steen Larsen oqarpoq.

Brugseni Pisiffillu imigassamik tuniniaaneq siorna appariarujussuarsimasoq nalunaaruteqarput. Ukiuni arlalinni taamaappoq.

– Imigassamik tuniniaanerup appariartornera malugisinnaavarput, tamannalu piffissap ingerlanerani takusimavarput. Tamanna atuisut pissusilersornerannik allannguinermut takussutissaavoq, amerlanerillu allatut toqqaasarput, Allan Kristoffersen oqarpoq.

Unammilleqatigiit akisussaaffeqaqatigiittut

Suliniut tamanna immikkuullarissoq tassaavoq unammilleqatigiit Brugsenip Pisiffiullu inuiaqatigiinni unammilligassaq ataatsimut aaqqiiviginiarlugu suleqatigiinnerat.

Ulluinnarni nioqqutissanik pisiniarfiit imigassanik aalakoornartortalinnik tuniniaanerat ingerlatiinnarneqaraluartoq, suliffeqarfiit taakkua tamarmik inuiaqatigiinni akisussaaffeqarlutillu suliniuteqarnissartik kissaatigaat.

- Sunniuteqanngitsutut immitsinnut isigisinnaanngilagut. Imigassaq ilaqutariinnut, meeqqanut atugarissaarnermullu ajortumik sunniuteqarsinnaammat aaqqiissutissamik pilersitseqataarusuppugut.

– Aammattaaq suliniuteqartut amerlanerusut suleqatigiinneq pillugu isumaqatigiissummut peqataatinniarpavut. Siunissaq ungasinnerusoq eqqarsaatigalugu periusissiorlunilu iliuuseqartoqartariaqarpoq, inuiaqatigiinni suliniuteqartut assigiinngitsorpassuit peqataatinneqarlutik, taamaalilluta ataatsimoorluta imigassamik kulturimik allanngortitsinissamut immiaaqqanillu atuinnginnerup nalinginnaanerulersinnissaanut suleqatigiinnermullu periarfissat atorluarnerusinnaaniassagatsigit, Pisiffimmi pisortaq Per Steen Larsen oqarpoq.

Imigassamik aalakoornartortaqanngitsumik suliniut

Kalaallit Nunaanni Uge 18 imigassamik atuineq pillugu oqaloqatigiinnermik ukiorpanni pilersitseqataasarpoq. Allatut periarfissanik eqqarsaatiginneqqissaarneq atuisunit sulisunillu eqqarsalersitsisartoq, suliffeqarfiit taakku marluk paasisimavaat.

– Imigassamik aalakoornartortaqanngitsunik periarfissaqartoq amerlanerusunik maluginiarneqaleraangat, oqaloqatigiinnerit nutaat atuisullu pissusaat nutaaq akisussaaffeqarnersorlu pilersarpoq. Pisisartutsinni sulisutsinnilu.

Siunissaq ungasinnerusoq eqqarsaatigalugu iliuusissat

Suliniutit siunissaq ungasinnerusoq eqqarsaatigalugu pilersaarusiorneqarput, ilaatigut sulisut pisiniarfinnilu oqaloqatigiinneq pitsaanerulersinniarlugu atuisullu ataqqinninnerunissaat paasitinnissaat siunertaralugu.

– Aalakoornartortalinnik aalakoornartortaqanngitsunillu nioqqutissat qanoq ilillugit ilioqqaavinnut inissinneqarnersut kisiat pineqanngillat, aammali sulisut pisisartullu naapittarnissaat pineqarpoq. Taamaattumik sulisutta piginnaasai nukittorsarniarpavut, ulluinnarni pisartunut piareersimanerulerniassammata, Pisiffiup pisortaaanera Per Steen Larsen oqarpoq.

Pisiniarfinni aalakoornartortaqanngitsut ersarinnerulersinneqarnissaat, nalinginnaasunngorsarneqarnissaallu siunertaavoq - toqqarnaveersaakkatut pinnagu, naligiimmik periarfissatut isigineqartariaqarpoq, oqarpoq.

Brugseni Pisiffillu ataatsimoorlutik suliniuteqarnermikkut inuit atugarissaarnerulernissaat imigassamillu atornerluisarneq pillugu ilisimasaqarnerulernissaq sulissutigaat. Sapaatip-akunnerani 18-imiinnaanngitsoq, ukiulli ingerlanerani.