Angut 29-nik ukiulik aningaasanik peqquserluutinik 621.200 koruuninik malunnarunnaarsaanissaq siunertaralugu Kalaallit Nunaanniit Danmarkimut 2025-mi septembarip 22-ani anngiortumik annisseriaraluarpoq. Nuummi mittarfimmi misissuisoqarnerani paasisaagami iluatsinngitsoorpaa.
Maanna sapaatit-akunneri arfineq-marluk qaangiuttullu, angut Eqqartuussisoqarfik Sermersuumi pineqaatissinneqarpoq.
Angut 29-nik ukiulik aningaasanik peqquserluutinik 621.200 koruuninik malunnarunnaarsaanissaq siunertaralugu Kalaallit Nunaanniit Danmarkimut 2025-mi septembarip 22-ani anngiortumik annisseriaraluarpoq. Nuummi mittarfimmi misissuisoqarnerani paasisaagami iluatsinngitsoorpaa.
Maanna sapaatit-akunneri arfineq-marluk qaangiuttullu, angut Eqqartuussisoqarfik Sermersuumi pineqaatissinneqarpoq.
Unnerluutigineqartoq nassuermat suliaq pingasunngornermi ullaap tungaani ingerlaannaq naammasinneqarpoq. Eqqartuusseqataasut peqataatinnagit aalajangiiffigineqarluni.
Eqqartuussisup angut 29-nik ukiulik, mittarfimmi paasisaanerminiilli tigummigallarneqartoq, qaammatini tallimani pineqaatissinneqarsimasunut inissiisarfimmiittussanngortippaa. Unnerluussisussaatitaasup qaammatini tallimani pineqaatissinneqarsimasunut inissiisarfimmiittussanngortinneqarnissaa aamma kissaatigaa. Aningaasat soorunami aamma arsaarinnissutigineqarlutik.
Angut pineqaatissinneqarnermi saniatigut Kalaallit Nunaanniit anisitaasussanngortinneqarpoq ukiunilu tallimani iseqqusaajunnaarluni. 29-nik ukiulik Islandimi innuttaassuseqartoq, unnerluussisussaatitaasoq ilisimatitsivoq. Afrikap avannaaneersuuvoq eqqartuussivimmilu tuluttut oqalulluni.
Inuunini ingerlateqqissagaa
Unnerluutigineqartup qaammatini tallimani pineqaatissinneqarnini akueraa, aamma nunamit anisitaanissani iseqqusaajunnaarninilu akerlilernagu. Inuttut Kalaallit Nunaannut attuumassuteqanngilaq, ilaqutaalu Reykjavikimiillutik.
- Eqqartuussut naammasseriarlugu inuunera ingerlateqqissavara, unnerluunneqartoq eqqissisimasumik oqarpoq.
Angutit marluk suliamut attuumassuteqartut politiinit unnerluussisussaatitaasunillu eqqumaffigineqarput, taakkuli pingasunngornermi eqqartuussivimmi sassartinneqaratik. Aappaata illersuisua eqqartuussinermi malinnaavoq.
Angutip 29-nik ukiullip Brugsenimi nakkutilliissummi immiussani imminut tikkuarpoq inuillu alla aqqatigut taallugu. Kuffertit aningaasanut nassatassatut tulluartut tassani misissorpaat.
- Taamaaliornissaq inerteqqutaasoq piffissami tassani ilisimanngilara. Inerteqqutaasoq maanna paasivara, kinguneralu akueralugu, angut eqqartuussivimmi oqarpoq.
621.200 koruunit aningaasarpassuugaluartut, aningaasanillu allanit anngiortumik anninneqaraluarnikuniit ikinnerupput. Angut 32-nik ukiulik 7 millionit koruunit sinnerlugit nassatalik Nuummi mittarfimmi 2025-mi maajimi tigusarineqarpoq.
