Pride Month Kommuneqarfik Sermersuumi nalliussineqartoq

aamma atuaruk

Pride Month 2026: Sapaatit akunnerata tulliani ingerlanneqassaaq

Pride Month juunimi ingerlanneqartarpoq - LGBTQIA+-imi ataatsimooqatigiinneq pillugu nalliuttorsiorneq. Kommuneqarfik Sermersooq assigiinngisinaarnermik, ataqqinninnermik ilaatitsinermillu suliniuteqarnerminut atatillugu malunnartitsivoq.

Taama Kommuneqarfik Sermersooq nittartakkamini allappoq.

Pride Month ilaatigut kommunip allaffiisa silataanni erfalasunik neriusaartalinnik nivinngaanermikkut, kommunip Facebookimi ilisarnaataa neriusaap qalipaataanik tunuliaquserneratigut Nuummilu Sipisaq Kangillermi qulliit taakkuninnga qalipaateqartinnerisigut malunnartippaat.

- Inuit tamarmik namminiusinnaanissaminnut aamma ataqqineqarlutik toqqissisimallutillu inuusinnaanissaannut malunnartitsinermut Pride Month pingaaruteqarpoq. Kommuneqarfik Sermersuumi inuiaqatigiit assigiinngisitaartuunerat nukittoqutaassasoq aamma kikkut tamarmik toqqissillutik namminiullutik inuiaqatigiinnut peqataasinnaanissaat kissaatigaarput, borgmesteri Avaaraq Olsen (IA) tusagassiutitigut nalunaarummi oqarpoq.

Pridemik nalliuttorsiorneq kommunip naligiissitaanermut akuutitsinermullu politikkianut „Assigiinngisitaarnermut inissaqarpoq“-mut naapertuuppoq, tassanilu kinaluunniit suiaassuseq, atoqatigiinneq, upperisaq, ukiut innarluutilluunniit pissutigalugit ilaajunnaarsitaassanngitsoq erseqqissarneqarpoq.

Pride Month Nuummi arfininngornermi juunip 13-ianni ingerlaaqatigiinnermik Pridemik borgmesterillu oqalugiarneranik aaqqissuussisoqarneratigut immikkut ittumik malunnartinneqassaaq. Nuuk Pride 2026 Sipineq+ suleqatigalugu aaqqissuunneqarpoq.