Qasigiannguit nunaqarfiullu Ilimanap,
Ilulissanit 15 kilometerit missaanni kujammut ungasitsigisumiittup, akornanni
ujaraaqqanik qallikkamik aqqusinniornissaq ukiuni arlalinni
oqallisigineqarsimavoq, pilersaarutilli piviusunngortinneqarsimanngillat.
Avannaata Kommunia Kommune Qeqertalillu
nunap immikkoortuani takornariartitsisarneq siuarsarniarlugu aqquserniorneq
pineqartoq pillugu maanna suleqatigiilerput, politikerit misilittagaqarluartut
marluk Jens Napaattooq, Naleraq, Avannaata Kommuniani borgmesterip tullia
siulleq Inatsisartunilu ilaasortaq, Kristian Jeremiassenilu, Inuit Ataqatigiit,
Kommune Qeqertalimmi kommunalbestyrelsimut ilaasortaq, takornarialerinermillu
suliffeqarfimmik Experience Qasigiannguit-mik piginneqataasoq, taama oqarput.
Qasigiannguit nunaqarfiullu Ilimanap,
Ilulissanit 15 kilometerit missaanni kujammut ungasitsigisumiittup, akornanni
ujaraaqqanik qallikkamik aqqusinniornissaq ukiuni arlalinni
oqallisigineqarsimavoq, pilersaarutilli piviusunngortinneqarsimanngillat.
Avannaata Kommunia Kommune Qeqertalillu
nunap immikkoortuani takornariartitsisarneq siuarsarniarlugu aqquserniorneq
pineqartoq pillugu maanna suleqatigiilerput, politikerit misilittagaqarluartut
marluk Jens Napaattooq, Naleraq, Avannaata Kommuniani borgmesterip tullia
siulleq Inatsisartunilu ilaasortaq, Kristian Jeremiassenilu, Inuit Ataqatigiit,
Kommune Qeqertalimmi kommunalbestyrelsimut ilaasortaq, takornarialerinermillu
suliffeqarfimmik Experience Qasigiannguit-mik piginneqataasoq, taama oqarput.
Oqaluuserineqartoq
Avannaata Kommuniani borgmesteri Lars Erik
Gabrielsen, Siumut, aamma Kommune Qeqertalimmi borgmesteri Simigaq Heilmann,
Demokraatit, kommunit taakku marluk suleqatigiinnerulernissaat pillugu
oqaloqatigiinniarlutik septembarimi ataatsimeeqatigiipput, tamatumunngalu
atatillugu nunap immikkoortuani inerisaanissaq siuarsaanissarlu
eqqartorneqarput.
Qasigiannguit Ilimanallu akornanni
aqquserniornissaq ukiuni arlalinni kommunini taakkunani marlunni
oqaluuserineqarsimasoq maanna aallartinneqartariaqartoq borgmesterit marluk
isumaqatigiissutigaat. Taamaammat Avannaata Kommuniani kommunalbestyrelsip qanittukkunni
ataatsimiinnerani tamanna oqaluuserineqarmat pilersaarusiorneq massakkorpiaq
aallartinneqassasoq amerlanerussuteqartut akuersissutigaat.
– Aqqusineq taamaattoq inuussutissarsiornermik ineriartortitsinissamut
aningaasaqarnikkullu siuariartornermut tunngaviliissasoq ataatsimiinnermi
isumaqatigiissutigineqarpoq. Aappaagu mittarfik ammarpat takornariat
malunnaatilimmik amerleriaateqarnissaat naatsorsuutigineqarpoq. Takornariat
Ilulissanut tikittussat nunap immikkoortuani allamut
ingerlaqqissinnaaniassammata periarfissaannik ineriartortitsinissaq
pisariaqassaaq, kommunalbestyrelsip ataatsimiinnerani suliamik
saqqummiussinermi ilaatigut tamanna atuarneqarsinnaavoq.
Ilulissat
takornarianit 50.000-init tikinneqartartoq
Avannaata Kommunia naapertorlugu ukiumut
takornariat 50.000-it missaat Ilulissanut tikittarput, taakkualu affaat
timmisartumik affaallu umiarsuarnik takornariartaatinik tikittarmata ingammik
timmisartuussinernik taamaatitsiinnartoqartillugu Ilulissani unnuiffissanik
amigaateqartoqartarpoq.
– Inuussutissarsiornikkut ineriartorneq taamalu siuariartorneq
suleqatigiinnermikkut pilersinneqarsinnaasoq borgmesterit taakkua marluk
qularutiginngilaat. Ilimanap Qasigiannguallu akornanni aqqusineq takornarianik
tikeraartunik siammarterinissamut, najukkami misigisassanik
aningaasarsiornermut nukittorsaataallunilu Ilulissani takornariaqarnerup
annertusiartorneranik annikillisaaqataassaaq, Avannaata Kommunia
ilisimatitsivoq.
Nuannaalersitsisoq
Avannaata Kommuniani borgmesterip tulliata siulliup
Jens Napaattuup, Naleraq, aqquserngup sanaartornissaanut pilersaarusiornerup
kiisami aallartinnissaanut tunngavissaqalermat nuannaarutigaa.
– Kommuninut taakkununnga marlunnut alloriarnerujussuuvoq.
Takornariaqarnerup Qeqertarsuup Tunuani tamarmi iluaqutaanissaa
pingaaruteqarpoq, taanna oqarpoq.
Kristian Jeremiassenip, Inuit
Ataqatigiinneersup, Kommune Qeqertalimmi kommunalbestyrelsimut ilaasortaasup
aqquserngup sananeqarnissaanut periarfissaq ukiorpassuarni tapersersorsimavaa.
– Kommune Qeqertalimmi kommunalbestyrelsip pilersaarutit soorunami
tapersersorpai, kommunilu suliniummut aningaasaliissuteqarusuppoq. Takorluugaq
ukiorpassuarni suliarineqarsimavoq, taamatuttaarlu Qasigiannguit, illoqarfiit
nunaqarfiillu allat Ilulissani mittarfissap nutaap aappaagu
atulersinneqarnissaanut atatillugu takornariaqarnerulernissaat ilimagineqarmat
tamanna nuannaarutigeqaarput, Kristian Jeremiassen oqarpoq, taannalu aamma
takornarialerinermik ingerlatsivimmik Experience Qasigiannguit-mik piginneqataavoq.
