Qeqertarsuup mittarfittaarnissaa kissaatigaa – aningaasaqarnikkulli innersuunneqanngilaq

- Qeqertarsuaq mittarfittaartariaqarpoq. Inuussutissarsiorfiit periarfissagissaarnerpaat malersorlugit ineriartortitsissuugut. Qeqertarsuaq takornariaqarnikkut siunissaraarput, Kommune Qeqertalimmi borgmesteri, Simigaq Heilmann (D), Facebookkimi quppernermini kissaatimik saqqummiussivoq.

Qeqertarsuaq suluusalinnut mittarfeqanngilaq. Silaannakkoorluni illoqarfik tikissagaanni qulimiguullit atorneqartariaqarput. Tamannalu kinguaattoornerpassuarnik taamaatitsiinnarnerpassuarnillu ilaatigut nalaassiffiusarpoq.

Illoqarfik aasaanerani angallatinik tikinneqartarpoq. Ukiarneranit upernarneranut illoqarfik qulimiguuliinnarmik tikitassaasarpoq. Tamanna pitsaanngitsutut kommunimi qullersamit nalilerneqarpoq.

- Qeqertarsuarmi innuttaasut ullumikkut angalanerminni assartuussinerminnilu aamma takornarialerisut unammillernartunik annertuunik nalaataqartarput. Nunavimmut atassuteqannginneq pissutigalugu silaannaap immallu aalajangiisuunerat ulluinnarni inuuneq, inuussutissarsiorneq pisortallu sullissinerat sunnerneqartarpoq.

- Mittarfik pitsaanerusumik patajaatsumillu attaveqaasersuinermik pilersitsissooq, innuttaasut angalanissaat ajornannginnerulersillugu, inuussutissarsiortut niuernerminni periarfissaqarnerulersillugit kiisalu pilersuineq isumannaannerulersillugu, borgmesteri allappoq.

Illoqarfik atorluarneqanngitsoq

Taassuma illoqarfik inuussutissarsiornikkut siuariartortinneqartariaqartoq neriuutigaa. Illoqarfimmi suli atorluarneqanngitsutut borgmesterip nalilerpaa.

- Pinngortitaq asseqanngitsoq, kulturikkut oqaluttuarisaanikkullu pisuussutit kiisalu ilisimatuussutsikkut soqutiginaatit Qeqertarsuaq nunarsuarmi takornarianut immikkut ornigassaqqissunngortippaat. Taamaattorli tikikkuminaassusia ineriartortitsinermut killiliivoq. Mittarfik nutaaliaasoq periarfissanik ammaassissaaq, taanna allappoq.

Innersuunneqanngitsoq

Kommune Qeqertalimmi borgmesterip kissaataa takorloorlugu pitsaasumik nalilerneqarsinnaavoq. Aningaasaqarnikkulli imminut akilersinnaassusaa siusinnerusukkulli ilisimaneqarpoq. Qeqertarsuaq suluusalinnut 650 meterisut takitigisumik mittarfittaarsinnaanngitsoq, aamma 799 meterisullu takitigisumik mittarfittaarnissaa aningaasaqarneq eqqarsaatigalugu innersuunneqanngitsoq, mittarfilli sanaartorneqarsinnaasoq, nalunaarusiami Attaveqaasersuutinut Naalakkersuisoqarfiup 2020-mi saqqummiussaani allaqqavoq.

Qeqertarsuarmi suluusalinnut mittarfiliortoqassappat tamanna ukiumut angusatigut oqimaaqatigiisitsisassanngitsoq, nalunaarusiami aamma inerniliussaavoq. Suluusalinnummi mittarfittaartoqassagaluarpat tamanna ukiumut 2,4 millionit koruunit 3,8 millionit koruunillu akornanni amigartoorfiusartussatut naatsorsuussaavoq. Nalunaarusiamittaaq illoqarfiup qulimiguulinnut mittarfeqaannarnissaa innersuunneqarpoq.