Qimussertartoq qimmit kiisortut pillugit suliami pisuutinneqartoq

Angut 67-inik ukiulik qimminut kiisortunut suliami Nunatta Eqqartuussisuuneqarfiani pisuutinneqarpoq.

AAMMA ATUARUK

Qimmit kiisortut pillugit eqqartuussineq: Sanileriiaallutik saanniilermata eqqarsalerpunga “tassa toqulerpunga”

Angutip nassuiaataa, taassumalu qimmiisa inunnik saassussinikuunerani pisuni pingasuni takunnittut eqqartuussivimmi sapaatip-akunnerata siuliani oqaluttuartinneqareernerisa kingorna tamanna pivoq.

Angut ukiuni pingasuni qimmeqaqqusaajunnaarlugu, qimmilereqqusaajunnaarlugulu aalajangiiffigineqarpoq.

- Qimussertartup qimmit inunnut ulorianartuunnginnissaat, sillimaniarneq eqqarsaatigalugu isumannaarisussaanera, soorlu pisoqartillugu qimmit toqunissaat akisussaaffigigai eqqartuussummi naqissuserneqarpoq.

- Isumannaallisaanermut malittarisassat tamakkua malinneqanngippata qimussertartumut sakkortuumik kinguneqarsinnaavoq, Kalaallit Nunaanni Politiini unnerluussisussaatitaasoq Aprilia Jespersen oqarpoq.

Unnerluutigineqartup qimmiisa inunnik 2023-mi marsimi apriilimilu pisuni assigiinngitsuni pingasuni saassussinerat suliami pineqarput.

2023-mi marsimi pisumi siullermi unnerluutigineqartoq Nunatta Eqqartuussisuuneqarfiani pinngitsuutinneqarpoq. Qimussertartup qimmini kiisortuussut tassani aatsaat paasilersimagaa eqqartuussivimmi nalilerneqarpoq.

Siullermik pisoqarmalli toqunneqarsimasussaagaluartut

Angut 67-inik ukiulik qimmit qimuttut pillugit inatsimmik unioqqutitsisutut, Eqqartuussisoqarfik Qeqqani marsimi 2025-mi eqqartuunneqarpoq.

Angut ukiuni tallimani qimminik allanillu uummasuuteqqusaajunnaarlugu aalajangiiffigineqarpoq, taannali inatsimmik unioqqutitseqqissappat aatsaat atuuttussanngortinneqarluni. Tassa angut ajortoqaqqinngippat qimmeqarsinnaatitaavoq. Unnerluussisussaatitaasup eqqartuussut piumasaqaatitaqanngitsumik atuutilersinneqarnissaa anguniarpaa.

Unnerluussisussaatitaasup Nunatta Eqqartuussisuuneqarfiani sukannernerusumik pineqaatissiisoqarnissaa piumasaraa.

- Ataqqinartoq Nunatta Eqqartuussisuuneqarfia. Suliami uani unnerluutigineqartoq kiisortunik qimmeqarsimanersoq aallaqqaasiininni oqaatigaara. Taassuma qimmimi qaasuttuunerat nammineerluni ilisimasimaneraa ilissi aalajangertussaavarsi, unnerluussisussaatitaasoq Aprilia Jespersen sisamanngornermi juulip qulingiluaani oqarpoq.

Unnerluutigineqartup pisuni siullerni marlunni susoqarnikuunera nalunagu, tassa qimmit qaasunnikuunerat, qimussersinnaasimasussaanani nalilertussaasimagaluaraa taanna isumaqarpoq. Taamaakkaluartoq takornarianik angallassisarnini ingerlatiinnarpaa, tamatumalu ataataasup paniisalu marluk qimminiik saassunneqarneranik kinguneqarluni.

- Pisuni pingasuni qimmit qaasullutik saassusiniarput, pisullu siulliup kingorna toqunneqarsimasussaagaluarput taamaaliornikkummi kingorna pisut pinngitsoortinneqarsimasinnaagaluarput, oqarpoq.

Inuussutissarsiutaarutissasoq

Illersuisup pinngitsuutinneqarnissaa piumasaraa, pisuutinneqassappalli sakkukinnerpaamik pineqaatissinneqarnissaa piumasaralugu.

Illersuisup ajortunik pisoqarnikuunera nassuerutigaa. Taamaammallu unnerluutigineqartut taarsiviginninnissmaik pisussaaffeqarnini nassuerutigalugu. Illersuisuillu 67-inik ukiullip qimmini kiisortunngortinniarlugit piginngilai, inuillu ikiorniarlugit sapinngisaminik iliorsimalluni.

Aamma unnerluutigineqartup pisimasut ilaat ilisimasaqarfiginngikkaa tikkuarpaa, aatsaalli killisiorneqarnermini paasisimagaa.

- Pingasoriarluni taama pisoqarsimanera ilisimanerarneqarnera, oqaluttuarineqartut aallaavigalugit eqqunngilaq, illersuisoq Ulrik Blidorf sisamanngormat oqarpoq.

Aamma unnerluutigineqartup pisumi ataatsimi ernermi qimmerigai oqaluttuarnera tikkuarpaa.

Unnerluutigineqartup qimussiussisarnini inuuniutigigaa, inuttut atugai pillugit illersuisup oqaaseqarnermini oqaatigaa. Qimmeqaqqusaajunnaaruni inussutigisinnaajunnaasavai.

Unnerluutigineqartoq naggataatigut oqaaseqarpoq. Qimmit taakku qimuttoralugit tikeraat hunnorujukkaat qimussiuttarnikuullugit oqarpoq.

- Arlaannaalluunniit ajortumik oqaaseqarnikuua? Kiitittoqarnikuunngilaq. Qimmit qanoq pissuseqarnersut nalornissutigigaluarukkit ernera qimussertittarsimanavianngikkaluarpara. Qimusseqaqqusaajunnarlunga qimmeqaqqusaajunnaarlungalu eqqartuussivimmiit aalajangerneqassappat naapertuutinngilaq.

Qimmit 15-it saassussisut pisut kinguninngua toqunneqarput. Unnerluutigineqartup ernermi qimmii atorlugit kingorna qimussiussisalerpoq.