Qimmit kiisortut pillugit eqqartuussineq: Sanileriiaallutik saanniilermata eqqarsalerpunga “tassa toqulerpunga”

MALUGIUK: Eqqartuussinermit nassuiaatit sakkortusinnaasut mianersoqqussutigineqarput. Allaaserisaq mianersortumik atuarneqassaaq.

Angut 67-inik ukiulik qimmimi inuit arlallit saassutereeraallu kiisortunik qimmeqarsimasutut pisuutinneqassava? 

Tamanna Nunatta Eqqartuussisuuneqarfiani sisamanngornermi paasiniassavaa. 

Angut 67-inik ukiulik kiisortunik qimmeqarneq pillugu suliani pingasuni najukkami eqqartuussivimmit eqqartuunneqarluni pisuutinneqarpoq. Taanna ukiuni tallimani uumasuuteqaqqusaajunnaarpoq, eqqartuussulli aatsaat ukiut tallimat ingerlanerani inatsisinik unioqqutitseqqippat pineqaatissiissutaassaaq.

Pisut pingasut taakku Nunatta Eqqartuussisuuneqarfiani nassuiaateqarfigai. Pisuni pingasuni takunnittuusimasut namminneq eqqaamasatik naapertorlugit nassuiaateqarfigisussanngorlugit aamma aggersarneqarput.

 Qimmip arnaq erneralu upakkai

Unnerluutigineqartup takornariat pingasut 2023-mi marsip 26-ani qimussiuppai. Arnaq erneralu qimussit aqqutaatigut ingerlapput. Qimussit qanillisullu qimmeq inuit taakku marluk tungaanut pangalippoq.

Arnaq eqqartuussivimmi nassuiaagami ernini ersilerluni arpalersimasoq oqaatigaa. Nammineq aamma arpalersimallunilu aput aqeriarmat orlusimavoq. Qimmit unitsinniarlugit suaartaraluartoq tamarmik kiitipput.

Unnerluutigineqartoq iperaatani nassarlugu ornigussimalluni qimmerlu peersissimallugu nassuiaavoq. Oqarasuaatimi normua arnamut tunniussimavaa. Kingorna ingerlaqqissimavoq. Angerlarami qimmeq toquppaa.

Unnerluutigineqartoq taakku kiitinnerat takusimanagu, arnalli sianerfigimmani aatsaat paasisimallugu nassuiaavoq.

- Nalunngitsuugukku ingerlaannarsimanavianngikkaluarpunga, angut 67-inik ukiulik eqqartuussivimmi oqarpoq.

Unnerluutigineqartup qimmini taamatut pissusilersortut takusimanngisaannarlugit nassuiaavoq. Qimmeq piaraavoq sungiusarneqarpiaranilu, kisianni kiisorneranik qaasunneranilluunniit ersiuteqanngilaq.

Arnap qimmit qassiunersut eqqaamanagu, qimmerli ataasiinnaanngitsoq oqaluttuarpoq.

Arnaq erneralu marluullutik nakorsartariaqakkanik niumikkut kimmillanneqarput.

Qimmit arnamut saassussiniartutut pissusillit

Unnerluutigineqartoq ernini ilagalugu ulluni pingasuni Kangerlussuarmiippoq, tassani illersornissaqarfimmeersunik qimusseqateqarput. Pisoq 2023-mi apriilip qulingiluaani pivoq. Qimussit marluupput, Kangerlussuarmullu tikikkamik qimmit ataatsimoortillugit pituppaat.

Arnaq ilisarisimasani oqaloqatigilerpaa.

Arnaq aqaguani qamuteralamminukartilluni qimmit tamarmik pituussaarsimasut takusimallugit eqqartuussivimmi oqaluttuaraa. Qimmiut saassusseriaannaarpasillutik ungujartuaarlugu qanilliartorput.

- Sanileriiaarlutik saanniilermata eqqarsalerpunga, "tassa toqulerpunga," ilisimannittoq eqqartuussivimmi oqarpoq.

Qimmit qimaatinniarsarigaluarpai, qamuteralaminullu ingerlalluni. Quaalluni orlungajannermini qamuteralammi tunui tiguai. Uiata ornillugu ikiorpaa.

Qimmit saassussiniarlutik siulliusussamik utaqqiinnartut uiata takusinnaasimallugit eqqartuussivimmi oqaluttuaraa.

- Qimmit taamaaligaangata takuneqarsinnaasarput. Takunnittup kialuunniit qimmit qanoq pissusilersornersut takusinnaavai. Kalaallit qimmii kiisortuupput, eqqortumik perorsarsimanngikkaanni aqunneqarsinnaanatik, oqarpoq.

Uiata qimmit qimaatinnissai iluatsippaa. Arnap angut qimmilik pisut pillugit oqaluttuunniarlugu attaveqarfiginngilaa. Unnerluutigineqartup qimmii pisuni allani qanoq iliorsimanersut aatsaat paasigamiuk kommuni attaveqarfiginiarlugu aalajangerpoq.

Unnerluutigineqartup arnaq qimmit saassussimagaat ilisimanagu oqarpoq, aatsaat killisiorneqarnermini angut maanna 67-inik ukiulik taama pisoqarsimasoq paasivaa.

Qimmit arnamik saassussisut ernermi qimmerigai eqqartuussivimmi oqaatigaa. Ernera taamani 18-inik ukioqarpoq qimminillu piginnittuulluni. Unnerluutigineqartup qimmerigai ilisimannittoq isumaqarpoq.

Angut paniilu marluk qimminit upanneqartut

Pisut pingajuat 2023-mi apriilip ulluisa 16-ianni sakkortunerpaavoq.

Ataataasoq paninilu marluk, qulingiluanik pingasunillu ukiullit, sisoraariarput. Nukarleq qamutinik uniarpaa, ataarutitillu peernikuullugit ingerlatillutik qimussit aqqutikkoortut takusimallugit, ataataasup eqqartuussivimmi oqaluttuaraa.

Unnerluutigineqartup qimmerinngikkai neriuutigisimallugu oqaluttuarpoq, taassumami qimmit taakku inunnik saassussisinnaasartut pillugit Facebookikkut saqqummiunneqartoq atuarnikuuaa. Unnerluutigineqartoq taassumalu qimmii illoqarfimmi tusaamanerlutaapput.

Qimmit tungiminnut aallartut takugamigit nukarlequnni kissumissiuteriarlugu tunumut ingerlalluni aallarpoq. Sangusaarpoq, qimmillu taanna maliinnavippaat. Qimmit ersiteriaraluarpai, taakkuali meerai ilanngullugit upappaat.

Unnerluutigineqartup takornarianik ilaqarluni qimussilinnginnermini qimmini nerisissimallugit oqaluttuaraa. Qimmit ilaqutariit takugamikkit tamarmik sangusimapput. Ima sangoriataartigisimapput qimussiniit katataangajassimalluni.

Qimmit angummut meeraanullu paannikkunnaartinniarlugit kalinnernik saviminiusunik anaalerpai. Qimussiusup niviarsiaq pingasunik ukiulik tigoriarlugu takornariamut qimussimiittumut tunniuppaa, ataataasullu niviarsiaraq qulingiluanik ukiulik illersorniarsaralugu.

Unnerluutigineqartoq tupassimaqaaq nalunagulu qimmit unitsinngikkunigit ajorluinnartumik pisoqarsinnaasoq.

Tamatuma kingorna qatserisartut ataatasoq meeraalu ikiorniarlugit aggersarneqarput.
Unnerluutigineqartup qimmini tamaasa toquppai. Kingorna aamma qimussiussisarpoq, ernermilu qimmii kisiisa atorlugit.

Pisup kingorna tamarmik kingunerlutsitsillutik ataataasup oqaatigaa.

- Inuunerput marlunnut avippoq, ajutoornerup siorna kingornalu. Sisimiut qimmeqarfiuvoq, killeqartorujussuaq. Nukarliup misigissutsimigut ajoquserneqangaarnini pissutigalugu, sivisuumik qimmit akornitigoorsinnaajunnaarnikuuvoq, sisorariaqqikkusukkunnaarnikuullunilu.

Ajutoornerup kingorna sisorariarput, meeqqalli qimmeq pituussaarnikoq takugamikku ersilerput, kingornalu sisorarumajunnaarlutik.

Ataataasoq timimigut, niumigut talimigullu saamerlikkut kiisalu assamminik arlaleriarluni ajoquserpoq, arlaleriarlunilu mersorneqartariaqarluni. Pania angajulleq itisuumik ikilerneqarpoq, qungatsigut kimillalluni, niaqqumigut, siutimigut, talimigut, isimigut niumigullu ikilerneqarpoq, timimigullu assigiinngitsuni mersorneqartariaqarluni. Nukarleq aamma ajoquserneqarpoq, nuaqqumigut, qungatsimigut, talimigut niumigullu kiineqarpoq.

Suliaq Nunatta Eqqartuussisuuneqarfiani ataasinngorpat nalunaaqutaq ulloqeqqanut aalajangiiffigineqassaaq. Angut piumasaqaatitaqanngitsumik ukiuni tallimani uumasuuteqaqqusaajunnaassasoq unnerluussisussaatitaasup piumasaraa, illersuisuatali pinngitsuutinneqassasoq imaluunniit sakkukinnerpaamik pineqaatissinneqassasoq piumasaraa.