Sakkutuut Kalaallit Nunaata illersornissaanut ukioq tamaat sungiusassapput
Kalaallit Nunaanni attaveqaasersuutit pingaarutillit qanoq illersussanerlugit Nato-p ilisimasariaqarpaa, Issittumi Sakkutooqarfimmi generalmajor Søren Andersen oqarpoq. Erseqqissarpaali Kalaallit Nunaat sakkutooqarnikkut ulorianartorsiortinneqanngimmat.
- Kalaallit Nunaat maannakkut sakkutooqarnikkut navianartorsiortinneqanngilaq, aamma nunap Nato-mut ilaasortap nunamut allamut Nato-mut ilaasortamut saassussinissaa takorloorsinnaanngilara, generalmajor Søren Andersen oqarpoq.
Assi: Simon Elbeck / Forsvaret
Nuummi aqqusinerni sakkutuut kingumut takussaaqqilerput.
Danmarkimi sakkutuut, aamma soorlu Nato-mi ilaasortat Frankrigimeersut Sverigemeersullu ulluni kingullerni tikissimalerput.
Kalaallit Nunaanni attaveqaasersuutit pingaarutillit illersorniarlugit sungiusartussaapput, tamanna Nato-mi nunami avannarpasinnerpaami pivoq, Issittumi Sakkutooqarfimmi generalmajor Søren Andersen Sermitsiamut oqarpoq. Tamanna sakkutuut sungiusaqatigiinnerannut qallunaanit aqunneqartumut “Operation Arctic Endurance”-mut ilaavoq.
- Nuummi Kangerlussuarmilu attaveqaasersuutit pingaarutillit illersornissaat sungiusassavarput, generalmajor Søren Andersen oqarpoq.
Issittumi Sakkutooqarfiup aamma Qeqqata Kommuniani borgmesteri Malik Berthelsen (S) Sisimiuni sungiusarsinnaaneq pillugu oqaloqatigisimavaa.
Umiarsualiviit mittarfiillu illersornissaannut sungiusartoqassaaq. Sungiusarnerulli taamaaattup sunaana siunertarigaa?
- Akeqqat tigusarinninnialissagaluarpata qanoq ililluta unitsissinnaassavavut, qanorlu ililluta pinngitsoortissinnaavavut? Akeqqat tikissinnaaffianniittarnitsigut taakkua unitsinnissaat sungiusarlugulu attaveqaasersuutit pingaarutillit paarissavavut.
- Maani Nuummi aammali Utoqqarmiut Kangerluarsunnguanni, Polar Oil aamma uuliaateqarfiit nakkutigissavavut. Kangerlussuarmi pingaarnertut mittarfeqarfik nakkutigissavarput, generalmajor Søren Andersen oqarpoq.
Silami qanoq ikkaluartumiluunniit sungiusarneq
2025-mi juulimi, aggustimi septembarimilu kingullermik Nato Kalaallit Nunaanni sungiusarpoq.
Taamani sila pitsaalluinnarpoq, ukiullu taamaalinerani ullup annersaani qaamasarluni. Taamaammat ukiup taamaalinerani piffimmi tassani aputeqartillugu sungiusarnissaat pingaaruteqarluinnarpoq, aamma taamaasinerani taartarmat.
Søren Andersen nassuiaavoq sungiusarnerit kingulliit assigalugit sungiusartoqassasoq, silami qanoq ikkaluarpat sungiusarsinnaanissaat pingaaruteqarmat.
Taamaattumik “Operation Arctic Endurance”-mik taaneqartartoq kingullermit sivisuneruvoq.
- Ukioq naallugu qimerluuinerput eqqarsaatigisarpara.
- Ukiup ingerlanerani suliassat assigiinngitsut arlallit allanik taarserneqassapput, imaanngilaq tamatigut sungiusartoqartassasoq, kisianni Kalaallit Nunaat Natop avannarpasinnerpaaniittoq illersorneqarsinnaassappat sungiusartariaqarpoq. Tassaapput qallunaat sakkutuui maaniinnerminnut sungiussereersimasut aammali suleqatigisavut maaniinnerminni suli sungiussisimanngitsut, oqarpoq.
Nato-mi suleqataasut ikiuinerat ukiup ingerlanerani siammarterniarsarissavaat, taamaalillutik kalaallit inuiaqatigiit attaveqaqatigiinnerillu tatineqarpallaarnaveersaarneqarnissaat anguneqarsinnaassaaq.
Qallunaat sakkutuui sapaammi januaarip 18-ianni Nuummiittut takuneqarsinnaapput.
Assi: Mads Claus Rasmussen/Ritzau Scanpix
Kalaallit Nunaannut aarlerinaateqanngilaq
Arfininngormat Københavnimi, Nuummi Kalaallit Nunaannilu Danmarkimilu sumiiffinni allani USA-mut akerliussutsimik takutitsisoqarpoq. Amerikamiut præsidentiata inuiaqatigiinni eqqissiviilliortitsisoqarnera ersarippoq. Generalmajor Søren Andersinnili eqqissisaavoq.
- Kalaallit Nunaat maannakkut sakkutooqarnikkut navianartorsiortinneqanngilaq, aamma Nato-mi nunat ilaata nunamut Nato-mut ilaasortamik allamik saassussinissaa takorloorsinnaanngilara, oqarpoq.
Amerikamiut sakkutuui aamma “Operation Arctic Endurance”-mut qaaqquneqarput Nato-mi ilaasortaagamik, tassanilu Nato-p avannarpasinnersaanik illersuinissaq pineqarpoq. Søren Andersenip siunissamut takorluugaa tassaavoq, Ukrainemi sorsunneq qaangiuppat Ruslandip maanga isiginialernissaa.
Aarlerinartoqanngilarli. Taamaattumik Kommuneqarfik Sermersuumi Qeqqatalu Kommuniani borgmesterit suleqatigalugit sumi sungiusartoqassanersoq taassuma aaqqissuuppaa.
- Aamma innuttaasut qanoq annilaangalersinnginissaat pillugu kommunit oqaloqatigisarpavut, annilaangalersitserusunnginnattami.
- Pissutsit ilungersunarsilluinnaraluarpata aamma pisortat allaffeqarfii ingerlatsiviillu Nuummiittut ilaat paarissavavut. Tamakkunanili sungiusarnissaq pissanngitsut aalajangerpunga, innuttaasut eqqissisimanissaat anguniarlugu, oqarpoq.
Naggataatigut inuiaqatigiinnit tapersersorneqarluarnertik qutsatigaa.
- Qujanaq tapersersorneqarnitsinnut, isumaqarpunga tamanna pingaaruteqartoq, Søren Andersen oqarpoq.
