Sarfaq Ittuup angallassisarnissaa ukiunik marluk sivitsorneqartoq
Naalakkersuisut Arctic Umiaq Linelu Sarfaq Ittummik ilaasunik 2026-mi 2027-milu angallassinissaq pillugu isumaqatigiissuteqarput.
Sarfaq Ittuk sapaatip-akunneranut ataasiarluni Nuummut, Maniitsumut, Kangaamiunut, Sisimiunut, Aasiannut, Qeqertarsuarmut, Ilulissanut, Qeqertarsuatsiaanut, Paamiunut, Arsummut, Qaqortumut aamma Narsamut angallassisarnissa isumaqatigiissutaavoq.
Assi: Arctic Umiaq Line
Sinersortaatip Arctic Umiaq Linep ataaniittoq Sarfaq Ittuk 2024-mi ilaasukinnerujussuunerata kingorna millioninik amigartoorutaavoq.
Sinersortaatillu ingerlaannarnissaa qulakkeerlugu kiffartuussinissamik isumaqatigiissusiortoqartoq Naalakkersuisut maanna nalunaarutigaat.
Kiffartuussinissamut isumaqatigiissut ingerlatsinermut tapiissutaavoq, taannalu 2026-mi aamma 2027-mi atuulluni. Taamaasilluni Sarfaq Ittuk sapaatip-akunneranut ataasiarluni Nuummut, Maniitsumut, Kangaamiunut, Sisimiunut, Aasiannut, Qeqertarsuarmut, Ilulissanut, Qeqertarsuatsiaanut, Paamiunut, Arsummut, Qaqortumut kiisalu Narsamut angallassissaaq.
Arctic Umiaq Linemi pisortaanerup, Taitsianguaq Olsenip, isumaqatigiissutip naammassineqarnera nuannaarutigaa:
- Arctic Umiaq Line A/S-miit nuannaarutigaarput Namminersorlutik Oqartussanut sullissinissamik isumaqatigiissuterput sinersortaatip ukiunik marlunnik sivitsorneqarmat. Taamaasilluni ilaasartaat ‘Sarfaq Ittuk’ ukiuni 2026-mi 2027-milu ilaasunik assartuinissaa qulakkeerneqarpoq. Atuisutta ujartugaattut Qaqortup Ilulissallu akornanni sapaatip akunnikkaartumik angalasarluni sullissisoqartassaaq, pisortaq oqarpoq.
Kiffartuussinissamut isumaqatigiissut siornatigut ukiuni tallimani atuuttaraluarpoq, maannalu isumaqatigiissutigineqartoq sivikinnerusumik atuuttussaalluni. Pisortaanerup Taitsianguaq Olsenip nutaamik umiarsuartaarnissamik kissaateqarnini siusinnerusukkut oqaatiginikuuaa.
Qaqortumi Ilulissanilu mittarfiit nutaat 2026-mi atulerpata nunami angallannerup allanngornissaa ilimagineqarmat isumaqatigiissut ukiuni marlunni atuuttussanngortinneqartoq Naalakkersuisut paasissutissiipput.
Timmisartumik, umiarsuarmik sinerissamilu angallanneq eqqarsaatigalugu.
- Taamaattumik angalanerup ilusai nutaat naammattumik ilisimaneqalerpata, sinersortaammik siunissami ilaasunik angallassineq qanoq aaqqissuunneqassanersoq Naalakkersuisut aalajangiissasut pillugu Naalakkersuisoqarfik aamma Arctic Umiaq Line isumaqatigiissuteqarput.
