Savissivimmiu EU-p aningaasaliinera pillugu: Neriuppunga internetsi kiisami sukkanerulissasoq

Qaanaami Savissivimmilu qaammataasat atorlugit internetsikkut attaviit pitsaanerulerlutik sukkatsissasut, EU-p Danmarkip Kalaallit Nunaatalu ataasinngornermi isumaqatigiissutigaat.

Tamanna Savissivimmiup, Olennguaq Kristensenip, 50-inik ukiullip tusarluarpaa. Talinili quleralugit nuannaanngikkallarpoq.

- Sukkatsissinnaanera neriulluarnaraluarpoq. Ukiuni kingullerni atortunik taarsersuilluni nutarterisoqartaraluartoq pitsanngoriartunnginnami. Tamakkua nutarteraluartut internetserput sukkatsikkiartunnginnami. Neriuppunga maanna iluatsikkumaartoq, taanna Sermitsiamut oqarpoq.

EU-Kommissionenip siulittaasua, Ursula von der Leyen, ministeriuneq, Mette Frederiksen (Soc.) aamma Naalakkersuisut Siulittaasuat, Jens-Frederik Nielsen (D), pitsanngorsaanissamik isumaqatigiissuteqartuupput. Isumaqatigiissummi aningaasat katillugit 9 million eurot, tassa 67 millionit koruunit missaat isumaqatigiissutaapput. Taakkunannga 5 millionit eurot EU-mit, 2 millionit eurot Danmarkimit kingulliillu 2 millionit eurot Kalaallit Nunaannit akilerneqassapput.

- Neriuppunga kiisami iluameersumik aaqqiisoqarumaartoq. 

- Attaveqaateqarnikkut maani pissutsit sineriammi kujasinnerusumitulli ajornanngitsiginnginnamik, Olennguaq Kristensen oqarpoq.

Soqutigisani qaangiaannartarai

Olennguaq Kristensen piniartuuvoq takornarianik filmiliortartunillu aamma sullitaqartartoq. Ukiut 30-it sinnerlugit nunaqarfimmi Savissivimmi najugaqarpoq. Internetsimik atuilluartuuvoq.

AAMMA ATUARUK

Isumaqatigiissut: Isorliunerusuni internetsi sukkanerulissaaq

- Avatitsinni pisunut inoqatinut attaveqaatit atorlugit malinnaasorujuusarpunga. Suliassannuttaaq aamma atorluartarpara, taanna oqarpoq.

Taamaakkaluartorli soqutigisani internetsip arriillunilu pitsaannginnera peqqutigalugu takunngitsoorlugillu atuanngitsoortarpai.

- Soqutiginarsinnaasut qaangiaannartarpagut. Ilaatigut qulequtaannai atuarsinnaasarpagut annerusumillu iserfigisinnaanagit. Tamanna assut kipiluttunartarpoq. Ilaatigut allaat akuleruffiginngiinnartarpagut akuuffigisinnaasaraluagut, Olennguaq Kristensen oqaluttuarpoq.

Savissivimmi Qaanaamilu internetsip sukkassusaa isumaqatigiissuteqarneq sioqqullugu issariarnermut 6 megabitsimik sukkassuseqarsimasoq maanna marloriaat sinnerlugu sukkanerulerluni 15 megabitsinngortoq, Tusassip pisortaanerata, Jonas Hasselriis ataasinngornermi oqaatigaa.

Kalaallit Nunaata avannarpasissuani inoqarfiit internetsimik pitsaanerusumik atugassaqalernerat Naalakkersuisut Siulittaasuata nuannaarutigaa. Taanna Tusassip tusagassiorfinnut ataasinngornermi nalunaarutaani ima allappoq:

- Nuannaarutigeqaara EU Danmarkillu suleqatiginerisigut, nunatsinni attaviit pitsanngorsarsinnaagatsigit. Ullumikkuminngaanniit innuttaasut Qaanaamiittut aammalu Savissivimmiittut internetitigut attaveqaatinik pitsaanerusunik pissarsisinnaanngussapput, Jens-Frederik Nielsen allappoq.