Sermersooq: Allakkatigut qinersiniaruit piffissaq atorluaruk
Folketingimut qinersinissamut allakkatigut taasinissaq maanna periarfissanngortoq, Kommuneqarfik Sermersooq ilisimatitsivoq. Kaammattuutigineqarporlu piffissaalluarallartillugu taasissasutit, taasinissallu nammineerlutit akisussaaffigissavat.
Toqqorsivimmit: Leiff Josefsen
Maanna innutaasunik sullissivimmut, allattoqarfinnulluunniit allanut saaffiginninnikkut allakkatigut Kommuneqarfik Sermersuumi qinersisoqarsinnaavoq. Allakkatigut qinersisimaguit ullormi qinersiviusumi marsip 24-ani qinersisinnaajunnannginnerit eqqaamassavat.
- Folketingimut qinersinermi taasinerit kisitsinermut ilaassappat, taasivissaq piffissaalluarnerani tunniunneqassaaq ullormilu qinersiffiusumi kingusinnerpaamik nal. 09:00 qinersivimmut apuutereersimassalluni, taama Sermersooq nittartakkamini ilisimatitsivoq. ”Allakkatigut taasinerit piffissaagallartillugu anngutissappat piffissaalluarallartillugu taasinissat nammineerlutit akisussaaffigissagit” naqissuserneqarpoq.
Nunatsinniit folketingimut qinersinermut malittarisassat naapertorlugit allakkatigut taasinerup qaqugu kingusinnerpaamik tunniunneqarsinnaanera aalajangersimasumik piffissaligaanngilaq, kommunimi aqutsisoqarfimmit ilisimatitsissutigineqarpoq.
Nassuiaat
Allakkatigut taasinerit piffissaagallartillugu anngutissappat piffissaalluarallartillugu taasinissat nammineerlutit akisussaaffiginera Sermitsiamut ima nassuiarneqarpoq:
- Kalaallit Nunaanni nunap immikkoortuani angallannermilu pissutsit immikkut ittut tamatumunnga aaqqissuussinermut ilaatigut pissutaavoq. Allakkatigut taasinerit sumiiffinni assigiinngitsorpassuarni tunniunneqarsinnaapput – assersuutigalugu innuttaasut nalunaarsorsimaffiini, suliffeqarfinni, umiarsuartigut, naalagaaffiup sinnerani imaluunniit nunani allani – nassiussinerlu sumi aallartinneqassanersoq aamma assartuinissamut periarfissat apeqqutaatillugit nassiussinerup sivisussusia allanngorarsinnaavoq.
- Taamaattumik piffissaq allakkat apuuffissaat aalajangersimalluinnartumik oqaatigineqarsinnaanngilaq, allakkat piffissaq eqqorlugu apuuffissaminnut apuunnissaat eqqarsaatigalugu.
- Taamaattumik qinersisartut kajumissaarneqarput allakkatigut qinersinerminni piffissaqarluartillutik qinersiartortarnissaannik. Taamaalillutik qinersinerup aallartinnginnerani qinersivimmut taasinermi apuunnissaat qulakkeersinnaassavaat, Kommuneqarfik Sermersuumi aqutsisoqarfimmit nalunaarutigineqarpoq.
