Sermersooq: Qarasaasiatigut suli ajornartorsiortoqarpoq

Kommunip innuttaasunik kiffartuussinera sullissineralu pingasunngornermi nalinginnaasutut ingerlalersimanissaa innuttaasut naatsorsuutigissanngikkaat Kommuneqarfik Sermersooq ilisimatitsivoq. Immikkut ilisimasallit avataaneersut systemit aallarteqqinniarlugit sulipput.

Qarasaasiatigut ajornartoorneq innuttaasunik kiffartuussinermut suli sunniuteqarallassasoq Kommuneqarfik Sermersuumit nalunaarutigaat.

Assiliisoq: Leiff Josefsen

Arnaq Nielsen Arnaq Nielsen Tusagassiortoq

Saqqummersinneqarpoq 27. Maaji 2026 - 11:02

Annonse

Qarasaasiatigut ajutoortoqarnera innuttaasunut sullissinermut pingasunngornermi suli sunniuteqassasoq Kommuneqarfik Sermersuup marlunngornermi ualingaatsiartoq nalunaarutigaa.

Ajornartorsiornerlu ingerlatsinermut ulluni tulliuttuni killilersuissammat innuttaasut nalinginnaasumik sullissineq naatsorsuutigissannngikkaat kommuni allappoq.

- Pissutsit suli taamaatsillugit piffissami aggersumi sullissiniarnerup ilungersunarsinnaanissaa ilimagineqarpoq. Taamaammat kommunip kiffartuussinerata aamma nalinginnaasumik sullissinerata aqagu eqqorneqarnissaat innuttaasut ilimagisariaqarpaat, Kommuneqarfik Sermersooq allappoq.

IT-systemit oqarasuaatillu ajutoornermit eqqugaapput. Sulisullu mailinut isernissamut oqarasuaatinillu killilimmik atuisinnaanerat sulianik suliaqarnissamut innuttaasunullu sullissinissamut sunniuteqarpoq.

- Ajornartorsiorneq allaffissornermut sunniuteqarpoq, sulisullu sullissinerminni aamma innuttaasunik kiffartuussinerminni atortagaat eqqorneqarput, taamatuttaaq oqarasuaatit, mailit allallu digitalimik sullississutit sunnerneqarlutik. Tamanna kommunip nalinginnaasumik kiffartuussineranut sullissineranullu maanna killeqarnerulersitsingaatsiarpoq, kommuni allappoq.

Kommunip suliassai pingaarnerit ingerlaannassapput

Ajoqutaasup qanoq annertutiginera kommunip marlunngornermi annertunerusumik paasisaqarfigaa. Ajornartorsiullu aaqqinniarlugu immikkut ilisimasallit kommunimi sulisut avataaneersullu suli sulipput.

- Taamaammat kommunip kiffartuussinerata aamma nalinginnaasumik sullissinerata aqagu (pingasunngornermi aaqq.) eqqorneqarnissaat innuttaasut ilimagisariaqarpaat. Kommunimili suliffeqarnermut isumaginninnermullu ingerlatsivimmi sulineq nalinginnaasumik ingerlassaaq, kommunimit taama allapput.

Qarasaasiatigut ajornartorsiuteqartoqaraluartoq kommunip suliassai pingaarnerit, tassa atuarfiit, ulluunerani paaqqinnittarfiit, utoqqarnik paaqqutarinninneq allallu innuttaasunut toqqaannartumik attaveqarnermut aamma isumaginninnermut tunngasut suli ammassasut sulisoqassasullu kommunip ilanngullugu ilisimatitsissutigaa.