Sermip aanneranit sioqqanit qajuusaasanngornikunik suliniuteqartut nersornaatisisut
Itinnera Solutions Torontomi aatsitassat pillugit nittarsaassinermi Namminersorlutik Oqartussat nersornaasiuttagaannik "Prospector of the Year"-imik nersornaaserneqarpoq. Suliffeqarfiup allaanerusumik eqqarsarsinnaanera nutaaliorsinnaaneralu ilaatigut tunngavilersuutigineqarpoq.
Inuussutissarsiornermut, Aatsitassanut, Niuernermut, Inatsisinut Naligiissitaanermullu Naalakkersuisup Naaja H. Nathanielsenip (IA) Itinnera Solutions ukiumi aatsitassarsioqatigiiffittut ataasinngormat nersornaaserpaa. Ingerlatseqatigiiffimmik pilersitsisoq pisortarlu Minik Rosing nammineq najuutinngilaq, ingerlatsinermili pisortaq Eliot Booth (qiterlermiittoq) aamma suliffeqarfimmik ineriartortitsisoq Samuel Backlund (talerperleq) najuupput.
Assi: Trine Juncher Jørgensen
Itinnera Solutions ApS, ujarassiuumit Minik
Rosingimit 2023-mi pilsersinneqartoq, Torontomi aatsitassat pillugit nittarsaassinermi PDAC-imi Namminersorlutik
Oqartussat aatsitassanut tunngatillugu nersornaasiuttagaannik
"prospector of the year"-mik ataasinngormat nersornaaserneqarpoq.
Itinnera Solutions taassumalu ataaniittoq Rock Flour Company
Nunatsinni misissuinissamut akuersissutinik pingasunik peqarput: Nuup
Kangerluani Ilulialimmi, Sermilimmi aamma Paamiunut eqqaani
Frederikshåb Isblinkimi, sermip aanneranit sioqqanit
qajuusassanngornikunik, sermersuup ingerlaarnermini qaarsunnut
attuussarnerani sioqqat pilersinneqartut inuussutissaqarluartullu,
naggorissaatitut CO2-millu milluaasutut atorneqarsinnaanerat
misissorpaat.
Nunalerinermi atorneqarsinnaaneranik misileraanerup annertusisamik
aallartinnissaa 2026-mi siunertarineqarpoq.
Nutaaliorneq, nutaamillu eqqarsarneq
Aatsitassanut nersornaat Inuussutissarsiornermut, Aatsitassanut, Niuernermut, Inatsisinut Naligiissitaanermullu naalakkersuisumit Naaja H. Nathanielsenimit (IA) tunniunneqarpoq, taassumalu ilaatigut suliffeqarfiup allatut eqqarsarsinnaaneq nutaaliorsinnaanerlu piginnaasaqarfigingaa erseqqissarpaa.
- Kalaallit Nunaanni pinngortitami pisuussutivut
tulluusimaarutigiuarpagut. Taamatulli aamma silatusaartumik
atuinissamut akisussaaffipput tuluusimaarutigalutigu.
Aatsitassarsiornerup siunissaa tassaaginnanngilaq piiaanermik
annertusiinissaq. Aammattaaq ilisimasaqarnerulernissaq,
eqqarsarluarsinnaaneq asuliinnarlu atuinaveersaarnissaq pineqarpoq.
Nutaaliorneq aatsitassarsiornerlu isumaqartuaannanngillat
itinerusumik assaasoqartariaqartoq. Ilaannikkut allatut
eqqarsartoqarsinnaasariaqarpoq.
Ingerlatsinermut pisortaq Eliot Booth (talerperleq) suliffeqarfimmillu ineriartortitsisoq Samuel Backlund nersornaammik tigusisut
Foto: Trine Juncher Jørgensen
Tatiginninnermut takussutissaq
Nersornaat suliffeqarfiup Namminersorlutik Oqartussanik suleqateqarneranik eqqaasitsissutaavoq, aammattaarli tatiginninnerminnut ersiutaalluni.
- Suliarput pillugu nersorniarneqarnerput annertoqaaq. Suliarput
immikkut ittuuvoq, Namminersorlutillu Oqartussanit suliatta
tatigineqarnera paasigakku nuanneqaaq, ingerlatsinermut pisortaq
Eliot Booth nersornaasiinerup kingorna oqarpoq.
Ukiuni siuliini nersornaammik ilaatigut tunineqartut tassaapput Amaroq Minerals, Greenland Resources, Bluejay Mining, Tanbreez, North American Nickel, London Mining aamma Ironbarks Zinc
