KL

DK

Siulittaasoq saammaasseqatigiinneq pillugu: Sulineq aallartitsigu

Saammaasseqatigiinnermut isumalioqatigiissitaq Kalaallit Nunaannit aallaaveqassaaq, sapinngisamillu piaarnerpaamik sulinerminik aallartitsissalluni, taama Jens-Frederik Nielsen isumaqarpoq, nunallu allat isumassarsiffittut taallugit.

Jens-Frederik Nielsen ministeriuneq lagmandilu peqatigalugit kangerluup iluanut angalapput.
Morten Okkels Morten Okkels Tusagassiortoq
Saqqummersinneqarpoq

Naalakkersuisut siulittaasuata Kalaallit Nunaata Danmarkillu ataatsimoorlutik oqaluttuarisaanitsinnik samminniffiusumik saammaasseqatigiinnissamik isumalioqatigiissitaqarnissaq kissaatigaa – tassani kapitalit nuanniitsut ilanngullugit. 

Tamanna Jens-Frederik Nielsenip (D) ataasinngornermi Mette Frederiksenimik (Soc.) Savalimmiullu lagmandiannik Beinir Johannesenimik (Fólkeflokkurin) naalagaaffeqatigiinni ataatsimeeqateqareerluni Qooqquni tusagassiortunik naapitsinermini oqarpoq.

Sapinngisamik piaarnerpaamik sulinerup aallartinnissaa siulittaasup pingaarnertut kissaatigaa. 

– Saammaasseqatigiinnissamik isumalioqatigiissitarpiaassaaq, taannalu Kalaallit Nunaannit aallaaveqassasoq kissaatigaarput. 

– Sulinerup sukkasuumik aallartinnissaa pingaarnerpaavoq. Oqaluttuarisaanitsinnik misissuisussamik  saammaasseqatigiinnissamik isumalioqatigiissitaqartariaqarpugut.

Tamatumuunakkut Danmark peqatigalugu

Kalaallit Nunaat siusinnerusukkut danskit pisortatigoortumik peqataasorinagit saammaasseqatigiinnermik suliaqarpoq, Jens-Frederik Nielsen erseqqissaavoq. Tamannartaallu maannakkut allaanerussutaassaaq.

Jens-Frederik Nielsen Qooqquni tusagassiortunit apersorneqartoq.

– Qanorpiaq aaqqissuutissanerlutigu kingusinnerusukkut saqqummiutissavarput.

Saammaasseqatigiinnissamullu isumalioqatigiissitap qanoq oqaluttuarisaanermik qulaajaanermik allaanerussanersoq pillugu apeqqummi akissut saqqummerpoq.

Mette Frederiksenip tamanna sioqqutsitsiarlugu nammineq Danmarki sinnerlugu Naalakkersuisut saammaasseqatigiinnissamik eqqarsaataat tigulluarsimagini, tusagassiortunut oqaluttuaraa. 

Taassumali sulinerup qanorpiaq pissanera aamma sukumiisumik oqaatiginngilaa.

Eqimattat arlallit sammineqartut

Oqaluttuarisaanermik sulineq taamaallaat spiralilersuinermut tunnganngitsoq, Jens-Frederik Nielsenip inatsisitigut ataataqanngitsut meerarsianngortitallu pillugit aperineqarnermini uppernarsarpaa. 

– Arnat spiralilersorneqarsimasut sammineqarput. Eqimattanilli allanik ilisimasaqarpugut, taakkulu aamma iliuuseqarfigineqartussaapput.

Taamattaarlu Kalaallit Nunaata Danmarkillu nunanit allanit misilittakkat ilikkagaqarfigisinnaagai, Jens-Frederik Nielsen isumaqarpoq.

– Canadami, New Zealandimi piffinnilu allani isumassarsiorsinnaavugut, Naalakkersuisut siulittaasuat oqarpoq.

saammaasseqatigiinneq naalakkersuisut naalagaaffiit ataatsimeeqatigiinnerat kalaallit nunaat jens-frederik nielsen inuiaqatigiit danmark saammaasseqatigiinnermut ataatsimiititaliarsuaq

Atorfiit tamaasa takukkit

PODCASTI

Powered by Labrador CMS