Siumut Nuuk: Pride suli pisariaqartipparput
Nuummi innuttaasoq kinaassutsini inuusaasinilu pillugit ersissuteqarnani kinaanermik toqqorterinani toqqissisimallunili inuusariaqartoq, Siumut Nuuk oqariartuuteqarpoq.
LGBTQ+-itut kinaassuseqartut Nuup immikkoortuani nuussuarmi kisimiillutik ingerlaarnissaminnut toqqissisimasanngitsut navianartorsiornermillu nalaataqartartut, Siumut Nuuk allappoq
Assi: Siumut Nuuk
Nunatsinni LGBTQ+-tut kinaassusillit pisinnaatitaaffiinik pingaarutilinnik angusaqartoqarsimagaluartoq, suli pitsanngorsaalluni suliassaqartoq, Siumut Nuuk tusagassiutinut nalunaarummini allappoq.
- Inuit LGBTQ+-it suli inuiaqatigiinni toqqissisimannginnermik, immikkoortitaasarnermik akuersaarneqannginnermillu misigisaqartarmata, Siumut Nuuk tunngavilersuivoq.
LGBTQ+ KALAALLISUT ISUMAAT
L = Arnat arnaqatiminoortut
G = Angutit anguteqatiminoortut
B = Arnanik angutinillu atoqateqartartut
T = Inunnguuserinngisaminik suiaassusilik
Q = Suiaassuseq kinguaassiuutillu pillugit amerlanerussuteqartunit kinaassuserluunniit paasinnittaaseq allaanerusoq.
Najoqqutat: Sipineqplus.gl, menneskeret.dk Aamma lex.dk
Toqqissisimaneq
LGBTQ+-itut kinaassuseqartut Nuup immikkoortuani nuussuarmi kisimiillutik ingerlaarnissaminnut toqqissisimasanngitsut navianartorsiornermillu nalaataqartartut, Siumut Nuuk allappoq.
- Nuup kikkunnut tamanut toqqissisimanartumik illoqarfiunissaanik qulakkeerinninnissamut tamatta akisussaaffeqarpugut, Aka Hansen, Siumut Nuummi siulittaasoq allappoq.
'Pride Tamanut' Sipineq+ aaqqissuisoralugu arfininngornermi juunip 13-iani Nuummi ingerlanneqassaaq.
Assi: Leiff Josefsen
Inuusuttorpassuit nammineq suiaassuseqarnertik aamma suiaassutsikkut kinaassusertik pissutigalugit ilaquttaminnit paasineqannginnermik ajattugaanermillu nalaataqartartut, tamannalu akuersaarneqarsinnaanngitsoq partii allappoq.
Inuiaqatigiinni peqataatitsineq
Siumut Nuuk arfininngorpat aaqqissuussaamut peqataassamaarpoq. Tassani oqariartuut LGBTQ+-tut kinaassuseqartunut inuiaqatigiinni peqataatinneqarnissaat isumaqatigaa.
