Siumut Nuuk: Spiralilersuisimaneq pillugu nalunaarusiap suli saqqummiunneqannginnera isornarpoq
Spiralilersuinermi suliami eqqugaasut inuiaqatigiillu immikkut ilisimasallit nalunaarusiaata saqqummiunneqarnissaa suli utaqqivaat. Isornartorujussuuvoq, Siumut Nuummi siulittaasoq Aka Hansen oqarpoq.
Oscar Scott Carl
Immikkut ilisimasallit spiralilersuinermut tunngatillugu nalunaarusiaat suli utaqqineqarpoq. Siumut Nuup spiralilersuinermi suliami eqqugaasut immikkut ilisimasallit nalunaarusaata saqqummiunneqarnissaa suli utaqqigaat, tusagassiuutitigut nalunaarutigalugu eqqaasitsissutigaa.
- Kalaallit arnat ukiuni amerlasuuni innarliinerit taakku kingunerisaannik inuuneqarsimasut akissutissanik pisinnaatitaapput. Ammasuunermik pisinnaatitaapput. Ataqqineqarnissamillu pisinnaatitaallutik.
- Nalunaarusiaq tigummineqartillugu anniarnerat oqaluttuaallu politikki eqqarsaatigalugu suli tunulliunneqarsinnaanerat ersersinneqarpoq, Siumut Nuummi siulittaasoq Aka Hansen oqarpoq.
Nalunaarusiaq qaammatinik marlunnik kinguartinneqaqqittoq
Immikkut ilisimasallit spiralilersuinermik suliaq pillugu nalunaarusiaat utaqqilluarneqarpoq, spiralilersuisoqarnikuuneranimi inuiannik nungusaasoqarsimanersoq nalilerneqartussaavoq. Immikkulli ilisimasallit suleqatigiissinneqartut iluanni isumaqatigiinngitsoqarnera pissutigalugu tamanut saqqummiunneqarnissaa kinguartinneqartoq, Naalakkersuisut marsip qaammataani nalunaarutigaat. Tamanna taamani Naalakkersuisuusup, Naaja H. Nathanielsenip ilisimatitsissutigaa.
Immikkut ilisimasalinni sisamaasuni marluk suleqatigiinniit tunuarlutik namminneq nalunaarusiaminnik tunniussipput. Taamaasilluni nalunaarusiat marluk saqqummiunneqannginneranni arlaannaannulluunniit atassuteqanngitsunik nalilersorneqaqqaartussanngorlutik. Naalakkersuisut taamani nalunaarutiginninnerminni nalunaarusiap ukioq manna maajip qaammataani saqqummersinneqarnissaa naatsorsuutigalugu paasissutissiissutiginikuuaat.
- Politikkikkut iliuuseqarnissamut periarfissatsinnut tunngammat isornarpoq. Nalunaarusiaq saqqummiunneqanngippat, Danmarkimiit akisussaaffik, naapertuilluassuseq taarsiivigineqarnissarlu pillugit politikkikkut sulineq kinguarsarneqarpoq, Aka Hansen oqarpoq, nangillunilu:
- Kalaallit arnat sivisuallaamik utaqqereerput. Maanna nalunaarusiaq saqqummiunneqartariaqarpoq.
Naalakkersuisut nalunaarusiap saqqummiunnissaata kinguartinneqarnera, nunat tamalaat akornanni politikkikkut ajornartooqqanermik pissuteqanngitsoq siusinnerusukkut oqaatigaat.
Peqqissutsimut inunnullu innarluuteqartunut Naalakkersuisup, Anna Wangenheimip (D), Inatsisartuni ullumi apeqqarissaarneqarnermini oqaatigaa nalunaarusiaq Mariane Paviasen Jensenip saqqummiukkumaaraa.
