Socialdemokraatit illoqarfinni ilaasortaatitaat Mette Frederiksenip tunuarnissaanik piumasaqartut
Mette Frederiksen partiip allanngortinnissaanut siulittaasussatut piukkunnanngitsoq Socialdemokratit sinnerlugit kommunalbestyrelsimut ilaasortat 41-t isumaqarput.
Maanna kommunalbestyrelsimut ilaasortat arlallit ministeriuneq Mette Frederiksen tunuaqquaat. (Toqqorsivimmiit assi)
Assi: Emil Nicolai Helms/Ritzau Scanpix
Socialdemokraatit illoqarfiup sinniisaanut ilaasortat arlallit Mette Frederiksen Socialdemokratit ingerlaviannik allannguinissamut siulittaasussatut tulluanngitsoq isumaqarlutik maanna oqarput.
Tamanna DR-ip apersuinera naapertorlugu erserpoq.
Arlallit atiminnik saqqummiussipput.
- Folketingimut qinersinermi ajugaassagutta nutaamik siulittaasussarsiortariaqartugut aaqqiissutissatut taamaallaat takusinnaavara. Aallaqqaataaniit aallartittariaqarpugut, Skivemi illoqarfiup siulersuisuinut ilaasortaq Jan D. Andersen (S), sapaatip-akunnerani kingullermi kommunimut qinersinermi qinigaaqqinngitsoq, DR-imut oqarpoq.
Isumasiuinermi illoqarfimmi siulersuisuni ilaasortat socialdemokraatit 41-t Mette Frederiksenip aappaagu folketingimut qinersisoqarnissaanut pissutsit allanngortinnissaannut siulittaasutut piukkunnartuunnginnerarpaat.
130-lli angerlutik akipput, 62-illu akinatik.
Illoqarfiup siulersuisuini ilaasortanit socialdemokraatineersuniit 729-usunit katillugit 233-t akissuteqarput.
Inuit Norddjursimeersut, Svendborgimeersut, Høje-Taastrupimeersut, Tønderimeersut, Frederikshavnimeersut, Halsnæsimeersut, Horsensimeersut Ishøjimeersullu isornartorsiuisut ilagaat.
Akissuteqartulli ikippallaartut Socialdemokratit politikkikkut oqaaseqartartuata Christian Rabjerg Madsenip erseqqissarpaa.
Isumaqarpoq partiimi „siulittaasuulluarlunilu ministeriunerulluartoq“.
- Aperineqartut 5,5 procentii taama isumaqartut maluginiarpara. Taakkulu isumaqatiginngilluinnarpakka, Christian Rabjerg Madsen oqarpoq.
Illoqarfiup siulersuisuini ilaasortat partiimi siulittaasussamik nutaamik piumasaqarnerat Socialdemokratit kommunalbestyrelsimi qinersinermi pakatsinartumik angusaqareernerisa kingorna pivoq.
Partii kommunini 98-iusuni 87-inut kinguariartoq borgmesteritut inissisimaffinnik katillugit 18-inik annaasaqarpoq.
Socialdemokratit kommunimut qinersinermi kingullermi taaguunneqartunit 5,2 procentinik ikinnerusunit qinerneqarput.
Partii 23,2 procentinik taaguunneqarami 1970-imiilli kommunimut qinersinermi taama ajortigisumik angusaqarsimanngisaannartoq DR-ip maluginiarpaa.
Mette Frederiksenip ministeriunertut tunuaqquneqarnini itigartitsissutigaa.
- Kinguariarnerput ilumoorpoq, Folketingimili qinersinermi kingullermi siuariarpugut. Ministeriunertut atorfinniit tunuarnissannik pilersaaruteqanngilanga, tusagassiutinut taama sapaatit-akunnerisa siuliani oqarpoq.
/ritzau/
