Suleqatigiit borgmesteri isornartorsiorpaat: immikkut ittumik ataatsimiittoqarnissaa piumasarineqarpoq

Kommune Kujallermi borgmesteri Malene Vahl Rasmussen (D) imigassamik tuniniaanermik minnerpaamik qaammammi ataatsimi matusiumasoq, Sermitsiaq sisamanngormat allappoq. Imigassamik inerteqqut sapaatip-akunnerini pingasuni atuuppoq, ammaqqinnissaanullu borgmesterip matusinerup kinguneri pillugit paasissutissat amerlanerusut pisariaqartippai.

Borgmesterip tullia siulleq Anders Olsenip tusagassiutitigut nalunaarummi erseqqissarpaa Siumut aalajangiinermut peqataanngitsoq:

AAMMA ATUARUK

Imigassaq sivikinnerpaamik qaammat ataaseq matoqqassaaq – ammaassiartortoqartussanngorpallu ima pisoqassaaq

– Tamanna Siumup Kommune Kujallermi kommunalbestyrelsimut ilaasortaatitaasa aalajangeeqataaffiginngilaat, taamalu aalajangiinerup sivikinnerpaaffilerneqarnera pillugu ilisimatinneqarnatik.

– Taamaattumik Siumup Kujallermi kommunalbestyrelsimi ilaasortaatitaasa matumuuna borgmesterip nassuiaateqarnissaanik piumasaqarfigaat, Anders Olsen allappoq.

Nangilluni oqarpoq borgmesterip nammineerluni ilisimatitseqqaarani aalajangiinera, Siumumit akuersaarneqanngitsoq.

- Taamaattumillu aalajangiussani pingaarutilinni angisuunilu pinngitsoorani tunuliaquttani peqatigisassagai, Siumumit piumasaraarput.

Borgmesterip tulliata aamma piumasaraa Kommune Kujallermi kommunalbestyrelsi piaarnerpaamik immikkut ittumik ataatsimiigiaqquneqassasoq.

Inuit Ataqatigiit kommunalbestyrelsimi illuatungiliuttut aamma isornartorsiuipput.

Inuit Ataqatigiit eqimattaanni siulittaasoq Pipaluk Jakobsen Larsen tusagassiutitigut nalunaarummi allappoq ersarissumik periusissiaqanngitsoq, aamma matusigallarnerup kingorna aaqqissuussaasumik ammaqqinnissaq Inuit Ataqatigiinnit kissaatigineqartoq.

– Assersuutigalugu immaaraq siulliullugu ammarneqarsinnaavoq. Isumaqarpugut tamanna suli oqallisigisariaqartoq, ilaatigut inuussutissarsiortut eqqarsaatigalugit, Pipaluk Jakobsen Larsen siunnersuuteqarpoq.