Imigassaq sivikinnerpaamik qaammat ataaseq matoqqassaaq – ammaassiartortoqartussanngorpallu ima pisoqassaaq

Kommune Kujallermi borgmesteri Malene Vahl Rasmussen marlunngornermi unnukkaa apersorneqarnissaminut kiisami piffissaqarpoq. 

Piffissaq kingulleq ulapputit imaaginnavipput. Sulinermini pilersaarutigeriikkami saniatigut sapaatit-akunneri kingulliit marluk allanik aamma ulapputissaneriasaarnikuuvoq.

Imigassarmi kommunerisamini oktobarip aappaa aallarnerfigalugu matuneqarallassasoq aalajangiukkamiulli suliniutit arlallit ataatsimeeqateqarnerpassuillu pilersaarusiortariaqalerpai. 

- Unnuttalerlugu sulisaqattaarpugut ulluni makkunani.

Suunukua ulapputigigisi?

- Suliniutissat assigiinngitsut, taavalu ukua pisussat pilersaarutaareersut, imigassamik matoqqatitsinermut tunngassuteqanngitsut. 

Matoqqatitsinermut tunngatillugu maannamut ataatsimeeqatigisai ilaatigut tassaapput pisiniarfissuit anginerit, tassaasut: Brugsenip, Pisiffiup KNI-llu pisortai.

Tamatuma saniatigut INI A/S aamma ataatsimeeqatigaa, inissiaatileqatigiiffik angerlarsimaffinni eqqissiviilliornernut tunngatillugu qanoq pinaveersaartitseqataasinnaanersoq ilaatigut oqaloqatigiissutigalugu. Imigassamittaaq sassaallernissamut akuersissutaatillit kommunimit aamma ataatsimeeqatigineqarsimapput. 

Imigassaq naassaanngitsumik matuneqanngilaq 

Susassaqartut arlallit naapittaqattaarnerinut ilaatigut peqqutaavoq imigassaq taamaalluni ammaakkiartorneqalerpat iliuusissat assigiinngitsut pisariaqartikkamigit. Imigassarmi naassaanngitsumik matuneqanngilaq. 

- Aap, taanna siunertarinngilarput, Malene Vahl Rasmussen oqarpoq.  

Taamattorli borgmesteri kisitsisinik pisariaqartitsivoq. Kisitsisit pineqartut tassaapput imigassap ammanerani matoqqatinneqarneranilu assigiinngissutsinik takutitsisut. 

Meeqqat pillugit nalunaarutiginninnerit assersuutigeriaraanni, meeqqat inuusuttullu pillugit kommunimut imigassap ammanerani nalunaarutiginninnerit amerlanerujussuunerat paasineqarpoq. 

Qaqortumimi septembarip aappaaniit 19-iata tungaanut kommunimut nalunaarutiginninnerit 32-usimapput. Imigassap matoqqanerani, oktobarip aappaaniit 19-iata tungaanut qulingiluaannaasut. 

- Sullissisut annertoorujussuarmik malugivaat innuttaasut eqqissisimasut. Taava suliat ammasut amerlasoorujussuit suliarinissaanut piffissaniffigeqattaarlugit. Kommunimiinnaanngitsoq, aamma peqqinnissaqarfinni politiinilu.  

Kommuni imminut misiliutissanngortoq

Kisitsisit taakkua tutsuiginartuunissaanut borgmesteri pingaartitsinermini tunngavissaqarpoq. Nunatsinni politikkikkut siuttut aggustimi naapimmata kommunini misiliutissatut imminut suaarutigaaq. 

AAMMA ATUARUK 

Imigassaq aalakoornartoq pillugu politikki sakkortooq immaqa atuutilissaaq

Misiliutaarusunnermut tunngaviusut tassaapput Naalakkersuisut imigassaq aalakoornartortalik pillugu ukiunut arlalinnut politikkissamut, ilisimatusarnermit tunngavilimmut siorna saqqummiussaat. Tassani inassuteqaatit 18-iusut borgmeseterip kommunimi ilaatigut misiliutigerusuppai. 

- Killiffipput naammaginnginnatsigu, iliuuseqarnissatsinnut akisussaaffimmik tiguseqataarusulluta. Utaqqisinnaanata, kommuni misiliutitut tassani immitsinnut suaarutiginerput samminikuuarput. Akuerineqarlunilu. 

Borgmesterip oqarnera naapertorlugu imigassamik matusineq misiliutaarusunnermut attuumassuteqanngilaq. Kisitsisilli tutsuiginassusillit matoqqatitsinermi pigineqalissappata piffissaq pisariaqarpoq. 

- Kisitsisit sivikinnerpaamik qaammammi ataatsimeersut pisariaqartippagut, taanna oqarpoq.

- Pingaartippara piffissaq una matoqqanerani paasissutissat katersukkagut, taakkua aamma kommunit allat Naalakkersuisullu iliuuseqarnissaminnut tunngavissatut atorsinnaassagaat. Kisitsisit ullut 14-iinnaat pigigutsigit taakkua tutsuiginassusaat killeqarpoq, taanna oqarpoq.  

Ammaasseqqikkiartorneq ima pissaaq 

Kisitsisit ammaasseqqikkiartuuarnissami tunngavigineqartussat pigineqassappata imigassap sapaatit-akunnerini tulliuttuni ammarnissaa innuttaasut naatsorsuutigissanngilaat.

Kisitsisilli maannamut pigineqalersut aallaavigalugit matoqqatitsineq suliassaqarfiit ilaannut pitsaasumik kinguneqartoq borgmesterip qularinngilaa.

AAMMA ATUARUK 

Qaqortumiit eertaaneq: Innuttaasut atugarliortut ikiorneqarneq ajorput

- Sulinngitsoortarnerit ikilipput suliffeqarfik tamaat isigalugu. Inuit suliartortussat suliartukaasarput. Narsami utoqqaat illuanni sulisut aalaakkaanerusumik sulilernerat aamma maluginiarneqarpoq. 

- Kisitsisit maannamut pigilikkatta aamma takutippaat atuanngitsoortarnerit ikilisut. Atuartut peqquteqaratik atuariartunngitsoortartut ikilipput. 

Ammaasseqqikkiartornissamut tunngavissat pigineqaleriartuaartut borgmesterip oqaluttuaraa. Ammaasseqqikkiartuaarnissamulli pisiniarfiit ilaatigut aamma oqaloqatigineqaqqaassapput.  

- Assersuutigalugu pisiniarfinni ammasarfiit, pisiniarnermi ukiut killissarititaat, aamma ussassaarineq. Tamakkua tamaavimmik. Aamma pisiniarfiit suut oqaloqataaffigisinnaaneraat, suut isumaqataaffigineraat tassani oqimaaloqutaasussaavoq. Massakkumut paasisagut aallaavigalugit ammaffigisorujussuuaat suliniutit suulluunniit peqataaffigissallugit. 

Ammaassinissaq ullulernianngikkaa

Kommune Kujallermiullu qaqugu imigassarsiaqqissinnaalersinnaanerat erseqqissumik oqaatigisinnaanngilaa. 

- Taanna oqaatigisinnaanngikkallarpara. Aamma politikkikkut isumaqatigiinniarnerit taakkua ingerlaqqaartussaapput. Massakkut pingaartinnerpaavara tunngavissatta katersornissaat. Una iluatsissappat taava aamma suliniutit tullinnguuttut apeqqutaasussaagamik iluaqutaanersoq imaluunniit iluaqutaannginnersoq una matoqqatitsinerput. 

 Taava 2026 imaluunniit 2027 qaninnerorpaluppa? 

- Taanna oqaatigisinnaanngilara. 

Ataaserli qularnanngilaq.

- Ammaasseqqiinnarnaviannginnatta pissutsitoqqanut uterluta. Iliuusissat taakkua 18-it atuutileriartuaarnerani, siulianut sanilliullugu kisitsisit ajunnginnerunersut takusinnaaniassagatsigit, kisitsisit taakkua malinnaaffigalugit, borgmesteri naggasiivoq.