Nuna tamakkerlugu peqqinnissaqarfimmi sulisussaaleqisoqarnera aaqqiiviginiarlugu Peqqinnissaqarfik Danmarkimi nunap immikkoortuini peqqinnissaqarfimmi sulisunik paarlakaalluni suliartortoqartalernissaanut isumaqatigiissuteqarpoq.
Peqqissaasut nunami napparsimmavinni atorfiit inuttaqanngitsut suliartorfigisalernissaannik tamanna kinguneqarpoq.
Nuna tamakkerlugu peqqinnissaqarfimmi sulisussaaleqisoqarnera aaqqiiviginiarlugu Peqqinnissaqarfik Danmarkimi nunap immikkoortuini peqqinnissaqarfimmi sulisunik paarlakaalluni suliartortoqartalernissaanut isumaqatigiissuteqarpoq.
Peqqissaasut nunami napparsimmavinni atorfiit inuttaqanngitsut suliartorfigisalernissaannik tamanna kinguneqarpoq.
Peqqissaasut Kattuffianni (PK) siulittaasoq Navarana Helena Johansenip iluaqutissaqartutut isigaa:
- Isumaqarpunga isumaqatigiissut pitsaasoq, naammanngilarli.
- Pisariaqartitsisorujussuuvugut. Peqqinnissaqarfik erngertumik iliuuseqarfigisarialimmik amigaateqaqaaq. Taamaammallu Danmarkimiit paarlakaalluni suliartortoqartalernissaanik aaqqissuussineq pisariaqartitsinerujussuarmut matussusiisoq isumaqarpunga. Kisianni siunissaq ungasinnerusoq eqqarsaatigalugu aaqqiisst taanna kisimi naammanngilaqSermitsiamut oqarpoq.
Navarana Helen Johansen naapertorlugu, Kalaallit Nunaanni peqqissaasutut atorfiit 140-t missaanniittut inuttaqanngitsut paarlakaalluni suliartortoqartalernissaanik aaqqiissummiit 30-t inuttalerneqarsinnaapput.
Tikisitat akisuut
Danskit peqqissaasut Kalaallit Nunaanni aningaasarsiat pillugit isumaqatigiissut malillugu sulissapput, Danmarkimilu naalagaaffimmit paarlakaalluni sulinermut isumaqatigiissummut ilaanerminnut tapisisassallutik. Tapeq Danmarkimi isumaqatigiinniutigineqassammat PK-p sunniuteqarfigisinnaanngilaa.
Aaqqissuussaq nalunaarutigineqarmalli isornartorsiorneqarpoq, inuppassuimmi qallunaat peqqissaasut kalaallinit suleqatiminnit akissarsiaqarnerussasut ernummatigaat.
- Ilaasortat ilaasa avataaniit tikisitat piffissami sivikitsumi maaniinnerminni aningaasarsiaqarnerunissaat pissutigalugu naapertuilluanngissorinnittut paasisinnaavakka. Tamanna paasilluarsinnaavara. Aatsaalli taamaattoqassanngilaq. Tassa peqqissaasut paarlattaajartorlutik tikittareerput. Danmarkimi akileraartarlutillu sulisuniit aalajangersimasuniit marloriaammik aningaasarsiaqarput.
Paarlakaalluni suliartortoqartarnissamut aaqqissuussaq sulisunut aalajangersimasunut qanoq sunniuteqarnissaa malinnaaviginissaa Navarana Helena Johansenimut PK-mullu pingaartinneqarpoq.
Assi: Nivi Poulsen
Peqqissaasut paarlattaajartorlutik tikittut assigiinngitsut marluusut Navarana Helena Johansen oqarpoq. Namminersorlutik Oqartussanit tikisitaq, Kalaallit Nunaanni isumaqatigiissutit naapertorlugit sulisitsisumit atorfinitsinneqartoq, immikkut ittumik isumatigiissuteqarluni aningaasarsialik. Paarlatsit Danmarkimi kiffartuussivimmiit atorfinitsinneqartut, kiffartuussivimmiit aningaasarsiallit, taakkuusullu aalajangersimasumik atorfilinniit aningaasarsiaqqortunerit.
- Peqqissaasut Danmarkimi kiffartuussivimmiit tikisitat akisuut taarserlugit paarlakaalluni suliartortitsisoqartalissappat pitsaavoq. Tamanna maannamiit naligiinnerulersitsisinnaavoq, Navarana Helena Johansen oqarpoq, nangipporlu:
- Paarlatsit Namminersorlutik Oqartussanit tikisinneqartartut, tassaanngitsut peqqissaasut paarlatsit akisunerujussuit, paarlakaajaattarnissamik aaqqissuussamut ilanngukkusulernissaa aarleqqutigisinnaavara. Taamatut pisoqarsinnaavoq. Taamaasilluni ukiup affaani imaluunniit ukioq ilivitsoq paarlattaajartorlutik suliartortartut annaaneqarsinnaapput, taakkumi paarlakaajaalluni tapiminik aningaasasisinnaalerunik taanna orniginerulersinnaassagamikku.
Siunissaq ungasinnerusoq
Navarana Helen Johansenip paarlakaalluni suliartorluni tikittoqartalernissaamik aaqqissuussaq iluaqutissartaqarluartoq, sulisussaaleqinermut siunissaq ungasinnerusoq eqqarsaatigalugu aaqqiissutaanngitsoq naqissuserpaa.
Kalaallit Nunaanni peqqissaasunut ikiortit sivikillisaaffigineqarlutik peqqissaasunngorniarsinnaanngortinneqarnerat aaqqiissutissanut ilaasinnaasoq taanna isumaqarput.
- Peqqissaasunut ikiortinik pikkorissorpassuarnik peqarpugut, taakku piginnaanngorsarnerisigut peqqissaasunngortinneqarsinnaapput, Navarana Helena Johansen oqarpoq.
Aallaqqaammulli PK-mi siulittaasup paarlakaalluni suliartortoqartarnera takoqqaarusuppaa.
- Uannut PK-mullu sulisutsinnut aalajangersimasunut qanoq sunniuteqassaanera takoqqaassallugu pingaaruteqarpoq. Iluarineraat imaluunniit ilinniartittarialinnik tikittuaannartoqarnera artukkiissanersoq, soorlu pissutsit maanna taamaattut.
- Paarlakaalluni suliartortarnermi una siunertaavoq suliartoriarluni kingorna aallaqqilluni, piffissamilu kingusinnerusumi aamma uteqqittoqartarluni. Taamaaliornikkut tikittunik nutaanik ilinniartitsisoqartarunnaassaaq. Isumaqatigiissummi pissutsit taamaattussaasutut atuarpakka.
- Paarlakaallutik suliartortartut sulinermik sungiussisinnaanerat neriuutiginarpoq, aamma maannartarnertik nuannaralugu paarlattaajartortartutut atorfeqarunnaarlutik aalajangersimasumik sulisunngorusussinnaanerat.
Paarlakaalluni suliartortarnermut aaqqissuussaq nakorsanut, peqqissasunut sulisunullu allanut atuuppoq, kiisami Dronning Ingridip Napparsimmavissuanut Nuummiittumi napparsimmavinnilu sinerissamiittunut atuulluni.
