Tasiilami festivalertoqarnissaa kommunimit tapersersorneqartoq

Nipilersornermik festivali IKUMA Music Festival Tasiilami tallimanngorpat ingerlanneqartussaq, Kommuneqarfik Sermersuumit aningaasatigut tapersersorneqarpoq.

Kommuneqarfik Sermersooq tusagassiutitigut nalunaarummi taama allappoq.

Tasiilami ikinngutigiit sisamat Carl Florian Sørensen, Mathias Stenbakken, Pappi Zaki Henriksen aamma Paakkannaq Henriksen festivalimik aaqqissuussipput.

Suliniut nipilersornermik workshoppertitsinertut tusarnaartitsinertullu aaqqissuussinernik aallartinneqartoq, festivalertitsinertut maanna ingerlanneqartussanngorpoq.

Kommuunimi aningaasaateqarfik Sermeq 50.000 koruuninik tapiissuteqarpoq. Kommuunimi ineriartortitsinermut aningaasaateqarfik suliniutinut, sammisassaqartitsinermik, ataatsimoornermik ineriartortitsinermillu pilersitsisinnaasunik tapersersuisarpoq. Tamatuma saniatigut Tasiilami kultoreqarnermut immikkoortortaqarfik festivalip aallartinnissaanut 15.000 koruuninik aningaasaliissuteqarpoq.

- IKUMA Music Festivalimut tapersersuinerput tulluusimaarutigaarput. Festivali Tasiilami ataatsimooqatigiinnermik pilersitsissaaq, kulturilerinermut nukittorsaataassaaq aamma ataatsimoorluta kivitseqatigiikkaangatta sunik angusaqarsinnaanitsinnik ersersitsissaaq, Tasiilami Sunngiffimmi Kulturikkullu ingerlatsivimmi pisortaq Magnus Kristiansen oqarpoq.

Rasmus Lyberth aamma Small Time Giants tusarnaartitsissapput

Aningaasaliissuteqarnerup saniatigut Tasiilami festivalertitsisunut atortussanik assigiinngitsunik kommuni atugassaqartitsissaaq. Kommune tusarnaartitsivimmik, nerrivinnik, issiavinnik, pissittaartarfimmik nipilersornermullu atortunik atugassaqartitsivoq.

Nipilersornermik siunnersorti Ferdinand Sivertsen-Ignatiussen festivalip ilusilersorneqarnissaanut siunnersuissaaq, aammattaaq nipilersornerup ingerlanneqarnerani nipilersuutinik aaqqissuussinermi ikiuutissalluni. Tamatuma saniatigut Magnus Kristiansen sapinngisaminik sunut tamanut ikiuutissaaq.

Aammattaaq kajumissutsimik sulisoqarniarneq kommunip aaqqissuutissavaa, Tasiilamilu najukkami ataatsimiititaliaq, grillerutinik atugassaqartitsissaaq, taamatuttaaq tupeq nipilersortarfiusoq festivalertitsisut attartorsinnaasaat pisiarisimavaat.

Kommuneqarfik Sermersooq festivalimut tapersersuinermigut Tasiilami innuttaasunik takornarianillu katerisimaartitsinissamut sinaakkutissanik pitsaasunik pilersitseqataajumavoq.

IKUMA Music Festival, Tasiilap arsaattarfiani tallimanngornermi juulip 24-ani ullup qeqqanut aallartissaaq. Peqataaneq akeqanngilaq. Ullormi tassani ilaatigut Rasmus Lyberth aamma Small Time Giants tusarnaartitsissapput.

Festivali sioqqullugu nipilersortartut Lysteriet illoqarfimmi meeqqanut nipilersornermik workshoppertitsipput. Tassani meeqqat nipilersorneq pillugu suliaqarnissamut piginnaanitik ineriartortinnissaannut periarfissinneqarput, festivalertitsisoqarnerani kalaallit nipilersortartut tusaamasat peqatigalugit ullormi tassani, scenemi tusarnaartitsinissamut aamma periarfissaqartitsisoqassaaq.