Tasiilami kommunip allaffia imermut ruujorit qereqqanerat peqqutigalugu matoqqavoq

Tasiilami piffissap imaalinerani piterartarnera nalinginnaavoq, piterarli massakkut takkusimaartoq siuliminit allaaneruvoq.

- Sivisuumik anorersuarpoq issittorujussuullunilu. Anori ilanngukkaanni issittorujussuuvoq, ullunilu arlalinni taama issitsigisarnera nalinginnaanngilaq, Kommuneqarfik Sermersuumi nunap immikkoortuani Tunumi pisortaq Hjørds Viberg oqarpoq.

Isserujussuarnera arlalitsigut ajornartorsiortitsivoq. Kommunip imermut ruujorii qerisimammata allaffik imeqanngikkallarpoq.

- Ajornartorsiutip aaqqinneqarnissaata tungaanut matoqqasariaqarpugut. Neriuppugut aqagu iluarsineqarsinnaassasut, Hjørdis Viberg oqarpoq.

Imermut ruujorit ajornartorsiortitsisareerput

Tasiilami kommunip allaffiata imermut ruujoriisa qerrussimanerat peqqutigalugu sulisut angerlartinneqarput, angerlarsimaffimminni sulisinnaasut sulillutik.

Kommunip allaffiani imermut ruujorit qerinerat tallimanngormat aamma ajornartorsiutaammat allaffik matoqqatinneqarpoq. Ajornartorsiut iluarsineqaraluarpoq, issinneratali kingunerisaanik qerisooqqittoqarluni.

Kommunip sunngiffilerisuisa allaffiat katersortarfimmut nuukkallarneqarnikuummat sunngiffilerisunut saaffiginninniartut katersortarfiliarsinnaapput. 

Innuttaasut piterarnerata nalaani kommunimut attaveqarnissamik pisariaqartitsisut, kommunip upalungaarsimasuinut sianerlutik attaveqarsinnaapput. Sianerfissat ukuupput: 113 aamma 36 77 89.

Paaqqinnittarfiit atuareernerullu kingorna ornittakkat piteraq peqqutigalugu ippassaq matoqqatinneqartut ullumi ammaqqinneqarput.

Silasiorfiup DMI-p ilimasaarutaa malillugu sakkortuumik anoraasuartarnera ullumi pingasunngornermi februaarip 25-ani nal. 17.00-miit aallarteqqissaaq, unnuarulu marlup missaaniit inoriaqquumiartussangatinneqarluni.