Timigissartarnerup akitsoqqiinnarnissaa siunnersuutaasoq: Allannguigaluarneq malitassanik malinninnerunngitsoq

Avannaata Kommuniata timigissartarfiit ingerlataanni, atuisut qanoq akiliisartigissanersut qinikkat ataatsimiinnerini tulleriinni marlunni oqaluuserineqassaaq.

AAMMA ATUARUK

Avannaata Kommuniani timigissarneq ukiumut 50 koruuniinnaqalertoq - akeerutitsiniarneq naapertuutinngilaq

Sammisaq kommunalbestyrelsemit juunip 26-ani aalajangiiffigineqaqqaarmat atuisut ukiumut atuinerminnut 50 koruuneertarnissaat Siumup Naleqqallu amerlanerussuteqarlutik akuersissutigaat. Borgmesteri Lars Erik Gabrielsen (S), taamanikkut siunnersuuteqartuuvoq. Illuatungiliuttut aalajangiinermi tassani misissuisoqarnissaanik kissaateqarput.

Misissuineq eqqartuussissuserisunit suliarineqartoq maanna naammassisimalerpoq. Inerniliussaq ersarippoq, aalajangiineq naapertuuttuunngilaq. Tamanna allagaatini Sermitsiap pissarsiarisaani allaqqavoq.

- Aalajangiineq unammilleqatigiinnermi malunnaatilimmik allanngortitsisinnaanermut aarlerinaateqarpoq, taamaammallu kommunit inuussutissarsiornikkut ingerlataannut kommunimut pisinnaatitsissutip killiliussaasa avaqqunnerattut isigineqartariaqarpoq, eqqartuussissuserisut kommunimut allakkiaminni ilaatigut allapput. Nangippullu:

- Taamaattumik inassutigineqarpoq kommunalbestyrelsip 26. juni 2026-imi aalajangiinera atorunnaarsinneqassasoq, kommunillu timigissartarfimmik ingerlatsinermut aaqqissuussineq maannamut atuuttoq, akigitinneqartut atuuttut ilanngullugit, utertillugu atuutilerseqqissagaa, eqqartuussissuserisut kommunip misissuitissimasai allapput. 

Ataatsimiititaliaq akuersisoq

Eqqartuussissuserisut inassuteqareernerisa kingorna kommunimi atorfilittat inassuteqaat aallaavigalugu suliamik qinikkanut saqqummiussipput. Allattoqarfiup aningaasaqarnermut ataatsimiititaliamut inassutigaa ukiumut 50 koruuniiginnarluni timigissartarfimmik atuisinnaaneq atorunnaarsinneqassasoq aamma siornatigut akiusimasut atuutilerseqqinneqarnissaat akuerineqassasoq. Tamanna allannguinissamik siunnersuuteqaqqaartumit, borgmesterimit, siulersorneqarluni aningaasaqarnermut ataatsimiititaliamit akuerineqarsimalerpoq. 

Ataatsimiititaliap aalajangernera kommunalbestyrelsip akuerissagaa ataatsimiititaliamit inassutaavoq. Suliarlu taanna qinikkat tallimanngornermi augustip 28-ani ataatsimiinnerminni isummerfigisussanngorpaat. Tamanna akuerineqassappat timigissarniartut ukiumut atuinermut akiliisarnerat 50 koruuniujunnaarluni 2500 koruuneqaleqqissaaq.

Akeerutsikkusukkaluaraa - tamannali pitsaasuusorineqanngitsoq

Timigissartarfinnik atuinermut suliaq borgmesterip juunimi siunnersuutigeqqaartussanngoramiuk, atuineq tamanut akeerutsikkusukkaluaraa, allagaatini Sermitsiap siusinnerusukkut pissarsiaani atuarneqarsinnaavoq.

Avannaata Kommunia Nunamut Namminermut Naalakkersuisoqarfimmut akeerutitsisinnaaneq pillugu paasiniaalluni taamanikkut allagaqaraluarpoq. Akeerutitsinissarli naalakkersuisoqarfiup tulluartuusorinngilaa.

- Kommunip innuttaasut tamaasa akeqanngitsumik fitnessertarfinnik atuisinnaatillugit aaqqissuussinissaa kommuninut pisinnaatitsissummi malittarisassanik naapertuutsinniarnissaa assut ajornakusoortussaavoq. Kommuninut pisinnaatitsissut naapertorlugu kommuni tunngaviusumik namminersorlutik ingerlataqartunik niuerfimmit namminersortunit ingerlanneqarsinnaasumit tunuartitsisussaanngilaq.

- Kommunip akileraarutitigut isertitanik aningaasalersorlugu akeqanngitsumik neqerooruteqarnissaa piviusumik namminersortumik ingerlataqartup kommunimi ingerlatsilernissaanut akornutaalluinnarsinnaavoq, tamannalu tassaalluni unammilleqatigiinnermut ajoqutaasumik sunniuteqartitsineq, tamannarpiaavorlu kommuninut pisinnaatitsissutip pinaveersaartinniagassaa, Nunamut Namminermut Naalakkersuisoqarfik Avannaata Kommunianut mianersoqqusilluni taamanikkut allappoq.

Akeerutitsinissap pinaveersaarnissaanut tunngavilersuut borgmesterip paasiuminaatsikkaa allagaatini aamma allassimavoq.