Avannaata Kommuniani timigissarneq ukiumut 50 koruuniinnaqalertoq - akeerutitsiniarneq naapertuutinngilaq

Timigissartarfinni Avannaata Kommuniata ingerlataani, atuisut akikinnerusumik akileerusuttut, nuannaarutissaqarput. Avannaata Kommuniani kommunalbestyrelsimi amerlanerussutillit, Siumut Nalerarlu, timigissartarfinnik kommunip ingerlataanik atuinermi akinik allannguipput.

Timigissartarfimmik ukiumut atuineq inummut ataatsimut 50 koruuneqalerpoq.

- Timersuut una imaassanngilaq akissaqarnerusuinnaat periarfissarissagaat. 

- Timersuutit allat akikittuararsuarmik atugassaqartitaallutik timersortarfimmik atuisuupput, borgmesteri, Lars Erik Gabrielsen (S), siunnersuumminik tunngavilersuinermini ilaatigut oqarpoq.

Kommunip timigissartarfinnik ingerlataanut atuineq, ukiumut 2500 koruuninik atuisumut ataatsimut akeqaraluarpoq.

Atuineq atuisunut akikilligaluartoq aningaasartuutit kommunimit akilerneqartussanngorput. Isertinneqartussatut missingersuutaagaluartut, 400.000 koruunit kommunip karsianit akilerneqassasut aalajangerneqarpoq.

Akiulersut allanngornerat maanna politikkikkut aalajangerneqarpoq. Tamassumalu atuutilersinnissaa ingerlatsiviup maanna suliassarileraa, Sermitsiap paasivaa.

Akeerutsikkusukkaluaraa - tamannali pitsaasuusorineqanngitsoq

Timigissartarfinnik atuineq borgmesterip aallaqqaammut tamanut akeerutsikkusukkaluaraa, allagaatini Sermitsiap pissarsiaani atuarneqarsinnaavoq.

Avannaata Kommunia Nunamut Namminermut Naalakkersuisoqarfimmut akeerutitsisinnaaneq pillugu paasiniaalluni allagaqaraluarpoq. Akeerutitsinissarli naalakkersuisoqarfiup tulluartuusorinngilaa.

- Kommunip innuttaasut tamaasa akeqanngitsumik fitnessertarfinnik atuisinnaatillugit aaqqissuussinissaa kommuninut pisinnaatitsissummi malittarisassanik naapertuutsinniarnissaa assut ajornakusoortussaavoq. Kommuninut pisinnaatitsissut naapertorlugu kommuni tunngaviusumik namminersorlutik ingerlataqartunik niuerfimmit namminersortunit ingerlanneqarsinnaasumit tunuartitsisussaanngilaq.

- Kommunip akileraarutitigut isertitanik aningaasalersorlugu akeqanngitsumik neqerooruteqarnissaa piviusumik namminersortumik ingerlataqartup kommunimi ingerlatsilernissaanut akornutaalluinnarsinnaavoq, tamannalu tassaalluni unammilleqatigiinnermut ajoqutaasumik sunniuteqartitsineq, tamannarpiaavorlu kommuninut pisinnaatitsissutip pinaveersaartinniagassaa, Nunamut Namminermut Naalakkersuisoqarfik Avannaata Kommunianut mianersoqqusilluni allappoq.

Akeerutitsinissap pinaveersaarnissaanut tunngavilersuut borgmesterip paasiuminaatsikkaa allagaatini aamma allassimavoq. Taamaakkaluartoq aalajangiiffigisassamik saqqummiussinermi ukiumut atuineq 50 koruuneqassasoq siunnersuutaavoq.

Sermitsiap Ilulissani namminersorluni timigissartarfimmik siusinnerusukkut ingerlataqartoq, Fitnessgl, illoqarfimmi timigissartarfimmik ingerlatseqqinnissamut pilersaaruteqarnersoq pillugu paasiniaaffigaa. Suliffeqarfilli taama pilersaaruteqanngitsoq, tassanngaanniit akisoqarpoq.