Tusagassiorfik: Nuummi Københavnimilu Teams-imi ataatsimiinnermi oqallinneq sakkortooq – siulittaasup attaveqatigiinneq pitsanngorsarusuppaa
Danskit kalaallillu politikerii ataatsimeeqatigiinnerminni qallunaat nunasiaatilittut nutaatut aamma kalaallit mianersuaalliortutut imminnut pasilleqattaapput, DR allappoq. Folketingimi nunanut allanut tunngasunut ataatsimiititaliami siulittaasup naalagaaffeqatigiinni nunanut allanut tunngasunut ataatsimiititaliat pingasut akornanni attaveqarneq isumannaatsoq maanna pilersikkumallugu aalajangerpoq.
Christian Friis Bach pingasunngormat Folketingip siulittaasuanut Søren Gademut allakkaminik naalagaaffeqatigiinnermi nunanut allanut tunngasunut ataatsimiititaliat pingasuusut — Danmarkip, Kalaallit Nunaata Savalimmiullu — attaveqatigiilluarnerat qulakkeerniarlugu, allassimalluni DR-imut oq
Assi: Emil Helms/Ritzau Scanpix
USA-p Kalaallit Nunaannut soqutiginninnera pissanganartoq marlunngornermi danskit kalaallillu politikeriisa attaveqaqatigiittarfik Teams aqqutigalugu ataatsimiissutigaat.
Ataatsimiinneq tamanna danskit folketingimi ilaasortaatitaasa arlallit tupaqqassutigigaat, kalaallillu inatsisartuni ilaasortaatitaat suli kamassutigineruleraat, tamannalu siunertap akerlerluinnaanik kinguneqartoq, DR allappoq.
Ataatsimiinneq Christian Friis Bachip, Folketingimi nunanut allanut tunngasunut ataatsimiititaliami siulittaasup, aaqqissuussaraa. Kalaallit Nunaannit peqataasut ilagaat Pipaluk Lynge (IA), Inatsisartut Nunanut Allanut Sillimaniarnermullu Ataatsimiititaliaanni Siulittaasoq.
Ataatsimiinnermi Pipaluk Lyngep Folketingi sakkortuumik isornartorsiorpaa USA-mi pissutsit pillugit matoqqasumik ataatsimiinnissaannut, marlunngornermi kingusinnerusukkut Christiansborgimi inimi isumannaatsumi pisussamut, peqataatitsinngimmata.
Attaveqaqatigiinnermik toqqissisimanartumik qinnutiginnittut
DR-ip paasissutissaatai naapertorlugit oqqanneqangaatsiarpoq, Christian Friis Bachilu DR-imut oqarpoq ataatsimiinnermi pisut oqaluttuarerusunnagit, kalaallilli inatsisartuni ilaasortat pakatsisimanerat tusaatissatut tigullugu.
Christian Friis Bach DR-imut oqarpoq pingasunngornermi Folketingip siulittaasuanut Søren Gademut allakkaminik naalagaaffeqatigiinnermi nunanut allanut tunngasunut ataatsimiititaliat nunat pingasut ilaasortaasut — Danmarkip, Kalaallit Nunaata Savalimmiullu — attaveqatigiilluarnerunissaat anguniarlugu:
- Aammattaaq qinnuigivara Folketingimi paasissutissat nunanit tamalaanit pissarsiarisavut Kalaallit Nunaanni Savalimmiunilu suleqatitsinnut ingerlateqqinnerulernissaat, DR-imut oqarpoq.
