Tusass Qeqertani attaveqaasersuinikkut pitsanngorsaalersoq

Attaveqaasersuinermut Naalakkersuisoq siornatigut Qeqertani, Qaanaap nunaqarfiani, attaveqaatitigut pitsanngorsaasoqarnavianngitsoq oqariartuuteqarnikuuvoq. Taamaakkaluartoq nunaqarfimmut attaveqaasersuutinik pitsanngorsaataasussanik tikittoqarsimasoq, Tusass uppernarsaavoq.

Qeqertani attaveqaasersuinermi Tusassip suliffeqarfik isumaqatigiissuteqarfigisaa Eutelsat aqqutigalugu qaammataasakkut attaveqaat OneWeb LEO (Low Earth Orbit) atorlugu pitsanngorsaasoqassaaq.

Assi: Tusass

Masauna Peary Masauna Peary Journalist

Saqqummersinneqarpoq 17. Juuli 2026 - 13:02

Tusassip attaveqaasersuutit pitsanngorsaatissai Qeqertanut tikissimalerput.

- Ilumoorpoq sumiiffimmi attaveqaasersuinissaq siunertaralugu, attaveqaasiinissatsinnut atortut sumiiffimmukaanneqartut. Massakkut annerusumik oqaaseqarsinnaanngilagut atortut qanoq qaqugulu atulersinneqassanersut pillugit, Maasi Brøns Chemnitz, Tusassimi attaveqaqatigiinnermut pisortaq uppernarsaavoq.

Attaveqaqatigiinnermut Naalakkersuisoq Iddimanngiiu Jensen Bianco (IA) juunip pingajuani Sermitsiami allaaserisatsinnut tunngatillugu ilisimatitsigaluarpoq Qeqertani attaveqaasersuinikkut pitsanngorsaasoqarnissaanut neriorsuisinnaanani.

Ussassaarut

Pitsanngorsaanissamulli atortussat maanna tikissimalerput.

AAMMA ATUARUK

Inoqarfik internetimut TV-mut oqarasuaatinullu attaveqanngitsoq

- OneWeb atorlugu Qeqertani attaveqaatilersuinissarput qilanaaraarput. Qaammataasat atorlugit attaveqaateqarfinni attaveqarneq kisimi pitsanngortinneqaannassanngillat, aammali periarfissaqarnerulersitsissaaq nunatsinnilu attaveqaatersuutit digitaliusut nukittunerulernissaannut alloriarnerussalluni, Tusassimi attaveqatigiinnermut pisortaq oqarpoq.

Tusass aamma Eutelsat isumaqatigiissutaat

Tusassip suliffeqarfik Eutelsat siorna novemberip aallaqqaataani isumaqatigiissuteqarfiginerata kingorna, Qeqertani attaveqaasersuutinik pitsanngorsaasoqassasoq siunniunneqarpoq.

Attaveqaasersuinermut suliffeqarfiup isumaqatigiissuteqarfiginerani, nunat tikikkuminaatsut qaammataasatigullu attaveqartut OneWeb atorlugu sukkanerusumik attaveqalernissaannut isumaqatigiittoqarpoq.

OneWeb qaammataasat atorlugit internetimut attaveqarnermut atorneqartarpoq.

Milliuunilikkaanik akeqassangatinneqarsimasoq

Attaveqaqatigiinnermut Naalakkersuisuusup, Iddimanngiiu Jensen Biancop (IA) siulimi Aqqaluaq B. Egedep (IA) Inatsisartunut ilaasortamut Isak Johansen (N) ukiarmi januarimi akissuteqaatigisimasaa innersuussutiginikuua.

AAMMA ATUARUK

Tusass qaammataasatigut attaveqaatit pillugit isumaqatigiissuteqarpoq

Akissummi naliliisoqarpoq Qeqertanut attaveqaateqarnemrut atortunik pilersitsinissaq 3-4 milliuunit koruunit missaanni akeqassasoq, ukiumullu ingerlatsinermut aningaasartuutissatut naatsorsuutigineqartut 0,5-1 milliuunit koruuninut missiliuunneqartut.