Kommuneqarfik Sermersuumi aningaasaqarnermut ataatsimiititaliami politikerit unnuk manna perusuersartarfiit pillugit suliaq eqqartussavaat. Aningaasaqarnermut immikkoortortaqarfimmi kukkunermik tunngaveqartoq, ajornartorsiut umiarsuarnut takornariartaatinut aningaasaliissutinit, takornarianut iluaqutaasussaagunanngitsumik, aaqqiivigineqassasoq ingerlatsiviup aalajangereersimagaluaraa suliaq suliarineqassaaq.
2023-mut utissaagut, taamani Qernertunnguit Kangerluani, Inuk Hostelsip eqqaani, tamanut atorneqarsinnaasunik perusuersartarfiliortoqarnissaa kissaatigineqarpoq. Sumiiffimmi pitsanngorsaasoqarnissaa siunertarineqarpoq.
Kommuneqarfik Sermersuumi aningaasaqarnermut ataatsimiititaliami politikerit unnuk manna perusuersartarfiit pillugit suliaq eqqartussavaat. Aningaasaqarnermut immikkoortortaqarfimmi kukkunermik tunngaveqartoq, ajornartorsiut umiarsuarnut takornariartaatinut aningaasaliissutinit, takornarianut iluaqutaasussaagunanngitsumik, aaqqiivigineqassasoq ingerlatsiviup aalajangereersimagaluaraa suliaq suliarineqassaaq.
2023-mut utissaagut, taamani Qernertunnguit Kangerluani, Inuk Hostelsip eqqaani, tamanut atorneqarsinnaasunik perusuersartarfiliortoqarnissaa kissaatigineqarpoq. Sumiiffimmi pitsanngorsaasoqarnissaa siunertarineqarpoq.
Perusuersartarfinnut suliaq Inuussutissarsiornermut immikkoortaqarfiup attaveqaatinut ineriartortitsinermut suliassaqarfianit aningaasaliissutinik atorneqanngitsunik ukioq taanna aningaasalerneqartussaangaluarpoq.
Kukkuneq ima pivoq
Aningaasaqarnermut ataatsimiititaliap ataatsimiinnerani paasissutissiinermi kommunip pisortaaneranut tullersorti Marie Fleischer ima oqarpoq:
- Aningaasaqarnermilli immikkoortortaqarfik
ilisimatinneqarsimanngimmat aningaasat ajoraluartumik suliniummut immikkoortinneqanngitsoorsimapput, aningaasat suliniummut tassunga atorneqassasut.
Aningaasat amigaataasut kommunip 2025-mi umiarsuarnik takornariartaatinik tikinnermi avatangiisinut aserfallatsaaliuinermullu akiliummit isertitaanit, tassa ilaasumut ataatsimut 50 koruuni, suliniut aallarteqqinneqareersimasoq aamma ilisimatitsissutigineqarpoq.
Perusuersartarfiliornissamulli aningaasat qanoq amerlatigisut amigaatigineqarnersut paasissutissiissutigineqanngilaq.
Tamannali immikkoortumi 17-imi saqqummiunneqarpoq: Umiarsuarnik takornariartaatinik takornarianut akiliutinit aningaasanik agguaassineq.
Millionikkaanik nalilik
Umiarsuarnut takornariartaatinut ilaasut 2025-mi akiliutaat 4,5 millionit koruuniusunit 2 millionit koruunit atorneqassasut aamma ilisimatitsissutigineqarpoq. Tassa imaappoq suliniummut ataasiinnarmut kukkunermik tunngaveqartumut aningaasat katillugit 44 procentii atorneqartussanngorput, taakkulu Nuummiinnaanngitsoq aammali Paamiuni, Tasiilami Ittoqqortoormiinilu takornariaqarnermut suliniutinut atugassaapput.
Perusuersartarfiit pillugit oqaluuserisassaq politikerinut ilisimatitsiissutaannaanera maluginiarnarpoq, erseqqissaatigneqanngilarli – oqaluuserisassat immikkoortuisa 17-issaanni – politikerit umiarsuarnut takornariartaatini ilaasut akiliutaat suliniutinut qanoq pingaarnersiorneqarnissaat aalajangertussaanerat. Perusuersartarfinnut suliniut taakkununnga ilaavoq.
Umiarsuarnik takornariartaatinik ilaasut akiliutaannit isertitat assigiinngilluinnartumik agguataarnerat Sermitsiap allaaserereerpaa, Paamiuni – 2025-mi umiarsuarnik takornariaqarnerat amerleriapiloorfiusumi – procentit 19-ingajaat, tassa 850.000 koruunit, taamaallaat illoqarfiup pissarsiarai. Paamiunut umiarsuarnik takornariartut amerlassusaat aallaavigalugit aningaasaliisoqassagaluarput maanna tunniunneqartussat marloriaatigissagaluarpaat.
Kuuffilersuineq akeqarpoq
2 millionit koruunit nalinginut tamanut ammasumik perusuersartarfiliortoqarnissaata pisariaqartinneqarnera paasiuminaatsillugu atuartartut ilaata Sermitsiamut saaffiginnissutigaa.
Inuk Hostelsip perusuersartarfii takornarianit allaneersunit suliffeqarfinniillu tatineqartut suliamik septembarimi 2024-mi saqqummiussinermi nassuiarneqarpoq. Sumiiffillu taanna takornariaqarnermik ineriartortitsinissamut toqqarneqarpoq. Pingaartumik kuuffinnut aqqusiornissaq suliniummut millioninik aningaasartuutaalerpoq. Perusuersartarfiit Inuk Hostelsip biilinut inissiisarfiata eqqaani inissinneqassapput.
